រដ្ឋអំណាចចិន ហាមពលរដ្ឋប្រមាណ ៤សែននាក់ក្នុងស្រុកមួយនៃខេត្តហ៊ឺប៉ី មិនឱ្យចេញក្រៅ ក្រោយរកឃើញករណីឆ្លងជំងឺកូវីដ១៩ ផ្ទុះឡើងជាចង្កោមតូច។
អាជ្ញាធរបានរាយការណ៍នៅថ្ងៃម្សិលមិញថា ខ្លួនបានរកឃើញករណីឆ្លងជំងឺផ្លូវដង្ហើមថ្មីចំនួន ១៣ករណី នៅស្រុក Anxin ចម្ងាយ ១៤០គីឡូម៉ែត្រពីរដ្ឋធានីប៉េកាំង ទីដែលផ្ទុះការឆ្លងជាចង្កោមចុងក្រោយក្នុងប្រទេស ដោយចេញពីផ្សារបោះដុំបន្លែ ត្រីសាច់ និងគ្រឿងសមុទ្រ Xinfadi។
ក្រោយផ្ទុះការចម្លង មនុស្ស ២សែននាក់ត្រូវបានប៉ាន់ប្រមាណថា បានទៅកាន់ផ្សារនោះ ក្នុងរយៈពេល ២សប្តាហ៍ចុងក្រោយ ហើយមនុស្សជាង ៣០០នាក់ ត្រូវបានរកឃើញថាឆ្លងមេរោគចេញពីប្រភពផ្សារបន្លែបោះដុំធំបំផុតរបស់ទីក្រុងមួយនេះ គិតចាប់តាំងពីថ្ងៃទី១១ ខែមិថុនា។
តាមប្រភពពីគណៈកម្មការសុខាភិបាលចិន មនុស្សចំនួន ៧លាន ៧សែននាក់ដែលជាប់សង្ស័យ និងរស់នៅជុំវិញតំបន់កើតហេតុនៃសង្កាត់ Fengtai ត្រូវបានតេស្តរកឃើញវិជ្ជមានកូវីដ១៩ តាមបច្ចេកវិទ្យាថ្មីដែលអាចដឹងលទ្ធផលឆាប់រហ័ស គិតត្រឹមថ្ងៃសៅរ៍ ទី២៧ ខែមិថុនា។
តាមកាសែត South China Morning Post ឱ្យដឹងថា កាលពីចុងសប្តាហ៍មុននេះ អាជ្ញាធរតំបន់បានប្រកាសដាក់បម្រាមគោលចរ បិទផ្ទប់ការចេញចូលស្រុក Anxin ទាំងមូល ហើយតម្រូវឱ្យគ្រួសារទាំងអស់សម្ងំក្នុងផ្ទុះ លើកលែងសមាជិកម្នាក់ដែលអាចចេញក្រៅបានម្តងក្នុង១ថ្ងៃ បើមានករណីចាំបាច់។
ប្រភពដដែលឱ្យដឹងបន្ថែមថា អ្នកស្រុកចំនួន ១៨នាក់ហើយ ក្នុងនោះមាន ៥នាក់មិនបង្ហាញរោគសញ្ញា និងករណីឆ្លងមួយចំនួនទៀតក្នុងខេត្តចំនួន៥ ត្រូវបានរកឃើញមានប្រភពមកពីក្រុងប៉េកាំង ចាប់ពីផ្ទុះករណីឆ្លងនៅ ២សប្តាហ៍មុន ចេញពីផ្សារបន្លែរបស់ទីក្រុង។
តាមសេចក្តីរាយការណ៍ដដែល ក្រោមវិធានការរឹតបន្តឹងការធ្វើដំណើរនេះ អាជ្ញាធរដែនដីបានតម្រូវឱ្យពលរដ្ឋម្នាក់ៗត្រូវចុះឈ្មោះដោយប្រើអត្តសញ្ញាណបណ្ណរបស់ពួកគេ ហើយត្រូវស្ទង់កម្ដៅក្នុងខ្លួនរាល់ពេលឆ្លងកាត់ច្រកចេញចូលភូមិ សហគមន៍ ឬអាគារស្នាក់នៅ។
អាជ្ញាធរ និងសមាជិកបក្សកុម្មុយនីស្តប្រចាំភូមិស្រុក ក៏បានអំពាវនាវឱ្យពលរដ្ឋម្នាក់ៗកុំចេញក្រៅផ្ទះ ឬចុះផ្លូវ ហើយជំរុញឱ្យពួកគេណែនាំដល់សមាជិកក្រុមគ្រួសារ និងមិត្តភក្តិ ឱ្យគោរពវិធានការរបស់អាជ្ញាធរ និងត្រូវជូនដំណឹងដល់ពួកគេ បើមាននរណាម្នាក់ល្មើសនឹងបម្រាម។
ក្រុមការងារប្រយុទ្ធប្រឆាំងនឹងមេរោគឆ្លងថ្មី លើកឡើងថា ស្ថានភាពឆ្លងរាលដាលរបស់មេរោគកំពុងស្ថិតក្នុងហានិភ័យខ្ពស់បំផុត ដែលចាំបាច់ត្រូវចាត់វិធានការតឹងរ៉ឹង ដើម្បីទប់ស្កាត់ការរីកសាយភាយក្នុងតំបន់ និងឆ្លងរាតត្បាតទៅដល់ខេត្តក្រុងដទៃ។
កាលពីពាក់កណ្តាលខែឧសភា រដ្ឋអំណាចក្រុង Jilin នៃខេត្ត Jilin ភាគឦសានប្រទេសចិន បានដកមន្រ្តីបក្ស និងរដ្ឋបាលតំបន់ ៥រូបចេញពីតំណែង ដែលបណ្តាលឱ្យកើតមានករណីឆ្លងក្នុងមូលដ្ឋានរបស់ពួកគេគ្រប់គ្រង និងរាលដាលដល់ខេត្តក្បែរខាង។
បន្ទាប់មក អាជ្ញាធរខេត្តបានបិទផ្ទប់តំបន់ផ្ទុះជំងឺដែលមានប្រជាជន ៧សែននាក់ភ្លាមៗ ហើយធ្វើយុទ្ធនាការតេស្តរកករណីវិជ្ជមានជំងឺកូវីដ១៩ ក្នុងទ្រង់ទ្រាយធំ លើមនុស្សជាង ១០លាននាក់ ដោយកំណត់រយៈពេលត្រឹម ១០ថ្ងៃ។
គណៈកម្មការសុខាភិបាលចិន ឱ្យដឹងនៅថ្ងៃនេះថា ខ្លួនបានតេស្តរកមេរោគនៅទូទាំងដែនដីគោក បានសំណាក ៩០លានសំណាកហើយ គិតចាប់តាំងពីករណីឆ្លងថ្មីត្រូវបានរកឃើញជាបន្តបន្ទាប់ ក្រោយស្ងប់ស្ងាត់អស់រយៈពេលជិត ២ខែ។
យុទ្ធនាការនេះដែរ ធ្វើឡើងចំពេលអាមេរិក អឺរ៉ុប និងប្រទេសធំៗជាច្រើន ដែលរងគ្រោះធ្ងន់ធ្ងរពីមេរោគកូវីដ១៩ បង្កើនការដាក់សម្ពាធឱ្យរដ្ឋាភិបាលក្រុងប៉េកាំងបើកផ្លូវឱ្យក្រុមអ្នកវិទ្យាសាស្រ្តអន្តរជាតិ ចុះស្រាវជ្រាវប្រភពដើមនៃមេរោគកូវីដ១៩ និងមូលហេតុនៃការឆ្លងរាលដាលនៅក្រុងវូហាន។
គិតត្រឹមថ្ងៃចន្ទនេះ ករណីកូវីដ១៩ ដែលមានប្រភពចម្លងពីក្រុងវូហាន នៃខេត្តហ៊ឺប៉ី ប្រទេសចិន បានកើនដល់ជាង ១០លានករណី និងសម្លាប់មនុស្សអស់ជាងកន្លះលាននាក់ហើយ។ អាមេរិក ជាប្រទេសរងការឆ្លងរាតត្បាតខ្លាំងជាងគេ ដោយមានករណីឆ្លងជាង ២លាននាក់ បន្ទាប់មកគឺប្រេស៊ីល រុស្ស៊ី ឥណ្ឌា និងចក្រភពអង់គ្លេស៕