បុរសជនជាតិកម្ពុជា វ័យ ២៩ឆ្នាំម្នាក់ បានជាសះស្បើយពីវីរុសកូវីដ១៩ ហើយត្រូវបានអនុញ្ញាតឱ្យចាកចេញពីមន្ទីរពេទ្យមិត្តភាពខ្មែរ-សូវៀតក្នុងក្រុងភ្នំពេញ។ នេះបើតាមការបញ្ជាក់ពីក្រសួងសុខាភិបាលនៅថ្ងៃចន្ទនេះ។
ក្រសួងសុខាភិបាល បានប្រកាសនៅក្នុងសេចក្ដីប្រកាសព័ត៌មានថា បុរសកម្ពុជាដែលត្រូវបានរកឃើញឆ្លងវីរុសកូវីដ១៩ កាលពីថ្ងៃទី១៤ ខែមិថុនា ពីរថ្ងៃក្រោយវិលត្រឡប់ពីប្រទេសឥណ្ឌូនេស៊ីនោះ ត្រូវបានព្យាបាលជាសះស្បើយកាលពីថ្ងៃម្សិលមិញនេះ។
ក្រសួងបញ្ជាក់ថា បុរសកម្ពុជារូបនេះ ត្រូវបានអនុញ្ញាតឱ្យចាកចេញពីមន្ទីរពេទ្យហើយ ក្រោយពីធ្វើតេស្តចំនួន ២លើក ហើយរកមិនឃើញមេរោគកូវីដ១៩។
មកដល់ពេលនេះ មានមនុស្ស ១១នាក់ដែលឆ្លងវីរុសកូវីដ១៩ កំពុងសម្រាកព្យាបាលនៅទូទាំងប្រទេស ហើយចំនួនឆ្លងសរុបមាន ១៤១ករណី ចាប់តាំងពីខែមករា៕
