អ្នកភូមិអះអាងថា អាជ្ញាធរប្រមាណ ៥០នាក់ និងសន្តិសុខក្រុមហ៊ុនប្រមាណ ១០នាក់ បានដាក់គ្រឿងចក្រ ៤គ្រឿងឈូសឆាយដំណាំលើដីរបស់ពលរដ្ឋ ស្ថិតក្នុងភូមិសុខសាន្ត សង្កាត់កោះរ៉ុង ក្រុងកោះរ៉ុង ដោយមិនបានដោះស្រាយសំណងជាមុននោះឡើយ។
លោក ផឹង ដុះ ដែលអះអាងថា បានទិញដីបន្តពីគេទំហំ ១៤ហិកតា តាំងពីឆ្នាំ២០០៦ ដើម្បីសង់លំនៅឋាន និងដាំដំណាំហូបផ្លែផងនោះ បានប្រាប់វីអូឌីថា កាលពីម្សិលមិញ អាជ្ញាធរក្រុងកោះរ៉ុងបានចេញលិខិតជូនដំណឹងឱ្យប្រជាពលរដ្ឋ ៥៣គ្រួសារ នៅភូមិសុខសាន្ត សង្កាត់កោះរ៉ុង រុះរើផ្ទះចេញ ដើម្បីយកទីតាំងដីតំបន់នោះទៅឱ្យក្រុមហ៊ុនមួយ ដែលលោកប្រាប់ថាឈ្មោះ «រ៉ូយ៉ាល់ គ្រុប» ដើម្បីធ្វើការអភិវឌ្ឍ។
លោក ផឹង ដុះ បន្តថា អាជ្ញាធរកោះរ៉ុងចេញសេចក្តីជូនដំណឹងម្សិលមិញ និងបានយកគ្រឿងចក្រឈូសឆាយនៅថ្ងៃនេះ ពលរដ្ឋក៏បានចេញតវ៉ា ហើយអាជ្ញាធរក្រុងក៏បានគំរាមចាប់ខ្លួនថែមទៀតផង។
លោក ផឹង ដុះ ប្រាប់ថា៖ «គេឈូសឆាយ គេដាក់កម្លាំងព័ទ្ធ មិនឱ្យពួកខ្ញុំជាប្រជាពលរដ្ឋប្រមូលផ្តុំតវ៉ាទេ ឬចេញចូលមើលកន្លែងឈូសឆាយទេ ហើយលោកអភិបាលរងក្រុងហ្នឹងបញ្ជាកូនចៅគាត់ឱ្យដើរដកទូរសព្ទរបស់ប្រជាពលរដ្ឋទៀត។ បើរូបខ្ញុំផ្ទាល់ គាត់ច្រានទ្រូងខ្ញុំ ហើយបញ្ជាឱ្យប៉ូលិសចាប់ខ្ញុំពីរនាក់ដែលមានសម្តីតវ៉ាច្រើន ប៉ុន្តែ ពួកខ្ញុំមកច្រូងច្រាងច្រើន ហើយគេមិនហ៊ានចាប់។ ពួកខ្ញុំមានដៃទទេទេ ខាងក្រុមហ៊ុនហ្នឹងមានប៉ូលិស មានប៉េអឹម និងកម្លាំងសន្តិសុខរបស់ក្រុមហ៊ុនប្រដាប់ដោយកាំបិត»។
ពលរដ្ឋម្នាក់ទៀត អ្នកស្រី អ៊ូ មករា និយាយថា កាលពីឆ្នាំ២០១៨ អាជ្ញាធរជាតិបានចុះវាស់វែង និងចេញលិខិតបញ្ជាក់ក្បាលដីជូនពលរដ្ឋនៅក្នុងភូមិសុខសាន្តនេះរួចរាល់ហើយ ដោយពុំមានភាគីណាជំទាស់ឡើយ។
ពលរដ្ឋរូបនេះ អះអាងថា គ្រួសារគាត់បានទៅទិញដីនៅតំបន់នោះដើម្បីសង់ផ្ទះ និងដាំដំណាំតាំងពីឆ្នាំ២០១១ ដោយមិនធ្លាប់មានជម្លោះ ឬបញ្ហាជាមួយអ្នកណាឡើយ។ អ្នកស្រីថា ទើបតែម្សិលមិញនេះ អាជ្ញាធរនៅក្រុងកោះរ៉ុង ចេញលិខិតជូនដំណឹងឱ្យពួកគាត់រុះរើផ្ទះចេញទៅវិញ។
អ្នកស្រី អ៊ូ មករា បន្ថែមថា៖ «បើអត់ដី និងផ្ទះនៅ ពួកខ្ញុំស្មើនឹងងាប់ ស្មើនឹងសូន្យ។ សន្តិភាពៗ តែពួកខ្ញុំស្មើនឹងសូន្យ។ ឥលូវ ពួកខ្ញុំមិនដឹងជាទៅពឹងអ្នកណាឱ្យជួយទេ បើយើងសង្ឃឹមលើមេភូមិមេឃុំចៅហ្វាយក្រុងជាពុកជាម៉ែ តែបែរជាគាត់នាំគេមកឈូសឆាយរបស់ពលរដ្ឋអស់អ៊ីចឹង»។
ពលរដ្ឋរងផលប៉ះពាល់ម្នាក់ទៀត លោក អ៊ិន និមល ប្រាប់ថា ដំណោះស្រាយដែលអ្នកភូមិចង់បាន គឺសុំឱ្យអាជ្ញាធរកាត់ឆ្វៀលដីរបស់ពួកគាត់ចេញពីគម្រោងអភិវឌ្ឍន៍របស់ក្រុមហ៊ុន។ លោកថា ប្រសិនជាអាជ្ញាធរបណ្តេញពួកគាត់ចេញនោះ គឺពួកគាត់មិនដឹងជាទៅរស់នៅទីណានោះទេ។
លោក អ៊ិន និមល ប្រាប់ថា៖ «បើពួកគាត់ឈូសឆាយអស់ ឱ្យពួកខ្ញុំទៅណា? បើពួកខ្ញុំមានដីតែប៉ុណ្ណឹង ដែលមករស់នៅជាង ១០ឆ្នាំ ហើយក្រុមហ៊ុនទើបកើតក្រោយសោះ គាត់បែរមកបំពានដីរបស់ពួកខ្ញុំ។ អ្នកភូមិនៅទីនេះចង់ឱ្យគេកាត់ឆ្វៀលដីចេញ ដូចសម្តេចគាត់មានប្រសាសន៍ថា បើពលរដ្ឋរស់នៅ និងមានដំណាំនៅទីហ្នឹង ត្រូវកាត់ឆ្វៀលស្បែកខ្លាជូនប្រជាពលរដ្ឋ ហើយចេញប័ណ្ណកម្មសិទ្ធិជូនពួកខ្ញុំ»។
វីអូឌីបានព្យាយាមសុំការឆ្លើយពីអភិបាលក្រុងកោះរ៉ុង លោក នួន ប៊ុនថុល ច្រើនដងដែរ ប៉ុន្តែ លោកប្រាប់ថា ស្តាប់អត់បានដោយសារទូរសព្ទអត់សេវា។
អ្នកនាំពាក្យសាលាខេត្តព្រះសីហនុ លោក ឃាង ភារម្យ មានប្រសាសន៍ថា នៅថ្ងៃនេះ សមត្ថកិច្ចចម្រុះរបស់ខេត្តព្រះសីហនុ បានចុះអនុវត្តកាយព្រំដីឱ្យក្រុមហ៊ុន រ៉ូយ៉ាល់ គ្រុប ដែលទទួលបានសម្បទានពីរដ្ឋាភិបាលដើម្បីអភិវឌ្ឍតំបន់នោះតាំងពីឆ្នាំ២០០៨។
អ្នកនាំពាក្យរូបនេះ អះអាងថា ដីដែលអាជ្ញាធរកំពុងកាយកំណត់ព្រំឱ្យក្រុមហ៊ុននោះ មានទំហំ ៣៥ហិកតា ជាដីរបស់ក្រុមហ៊ុន មិនប៉ះពាល់លើដីរបស់ប្រជាពលរដ្ឋឡើយ។
លោក ឃាង ភារម្យ ប្រាប់ថា៖ «ប្រសិនជាបងប្អូនប្រជាពលរដ្ឋគាត់មានប័ណ្ណកម្មសិទ្ធិ យើងមិនអាចទៅប៉ះពាល់របស់គាត់បានទេ ហើយប្រសិនបើក្រុមហ៊ុនមានសិទ្ធិស្របច្បាប់ ក៏អាជ្ញាធរមិនអាចទៅប៉ះពាល់ក្រុមហ៊ុនបានដែរ។ អ៊ីចឹង អាជ្ញាធរ គឺយើងឈរលើគោលការណ៍ច្បាប់ យើងឈរនៅកណ្តាល»។
បើតាមលោក ឃាង ភារម្យ កាលឆ្នាំ២០១៦ រដ្ឋាភិបាលសម្រេចកាត់ដីទំហំ ៥២៨.៣៧ហិកតាចេញពីដីឯកជនរបស់រដ្ឋទៅឱ្យអង្គភាពរដ្ឋ និងប្រជាពលរដ្ឋ ២៩៨គ្រួសារ ដោយមិនជាប់ពាក់ព័ន្ធជាមួយដីក្រុមហ៊ុនទៀតឡើយ។
ទោះជាយ៉ាងណា អ្នកភូមិអះអាងថា ពួកគេមួយចំនួនបានទៅរស់នៅលើដីដែលកំពុងមានជម្លោះតាំងពីឆ្នាំ១៩៩១ ដោយពុំធ្លាប់មានជម្លោះ ឬការរារាំងពីសំណាក់អាជ្ញាធរនៅតំបន់នោះឡើយ៕