តួលេខរបស់រដ្ឋាភិបាល អះអាងថា កម្មករ-កម្មការិនី និងបុគ្គលិកក្នុងវិស័យសេវាកម្មជាង ១៦ម៉ឺននាក់ដែលត្រូវបានព្យួរការងារនោះ ទទួលបានប្រាក់ឧបត្ថម្ភពីរដ្ឋាភិបាលតាមរយៈធនាគារវីងគិតត្រឹមថ្ងៃទី២៣ ខែមិថុនា ឆ្នាំ២០២០។
ក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃម្សិលមិញនេះ បានបញ្ចេញបញ្ជីចំនួនរោងចក្រសហគ្រាស ក្រុមហ៊ុនអាជីវកម្ម និងចំនួនកម្មករនិយោជិត ដែលត្រូវទទួលបានប្រាក់ឧបត្ថម្ភពីរដ្ឋាភិបាល ក្រោយពីដំណើរការអាជីវកម្មរបស់ពួកគេត្រូវបានព្យួរ ហើយប៉ះពាល់ដល់ការងាររបស់កម្មករនិយោជិតរាប់ម៉ឺននាក់ ដែលបណ្ដាលមកពីវិបត្តិសុខភាពសកល។
បើតាមរបាយការណ៍របស់ក្រសួងការងារ កម្មករ-កម្មការិនី និងបុគ្គលិកជិត ១៧ម៉ឺននាក់(១៦៨,៥៣៥) នៃរោងចក្រសហគ្រាស ឬក្រុមហ៊ុនចំនួន ៥២៦ នៅក្នុងវិស័យកាត់ដេរ និងវិស័យទេសចរណ៍ បានទទួលប្រាក់ឧបត្ថម្ភពីរដ្ឋាភិបាលរួចហើយ នៅត្រឹមថ្ងៃម្សិលមិញនេះ ក្រោយពីការងាររបស់ពួកគេត្រូវបានព្យួរ។
ក្រសួងការងារបញ្ជាក់នៅក្នុងរបាយការណ៍របស់ខ្លួនថា ប្រាក់ឧបត្ថម្ភទៅដល់បុគ្គលិក និងកម្មករដែលត្រូវបានព្យួរការងារទាំងនោះ ត្រូវបើកតាមធនាគារឯកទេសវីង ហើយថា ប្រាក់ឧបត្ថម្ភនេះ ត្រូវបើកឱ្យជាប្រាក់រៀល និងអាស្រ័យលើចំនួនថ្ងៃនៃការព្យួរកិច្ចសន្យាការងាររបស់បុគ្គលិក និងកម្មករម្នាក់ៗ។
ក្រសួងការងារ បន្ថែមថា ដើម្បីបើកប្រាក់ឧបត្ថម្ភនេះបាន គឺកម្មករ-កម្មការិនីត្រូវយកអត្តសញ្ញាណប័ណ្ណសញ្ជាតិខ្មែរ និងទូរសព្ទដៃដែលទទួលបានសារពីធនាគារឯកទេសវីង ទៅបើកនៅទីភ្នាក់ងារវីងដែលនៅជិតខ្លួនបំផុត។
ក្រសួងលើកឡើងថា ក្នុងករណីកម្មករទទួលបានសារហើយ ប៉ុន្តែ ខកខានមិនបានទៅបើកប្រាក់ឧបត្ថម្ភនេះ ក្នុងរយៈពេល ១០ថ្ងៃបន្ទាប់ពីទទួលបានសារ គឺខាងធនាគារនឹងបង្វិលលុយនោះជូនរដ្ឋាភិបាលវិញ ហើយថា ប្រសិនបើកម្មកររបស់សហគ្រាសទាំងនោះ មិនទទួលបានសារទូរសព្ទពីធនាគារវីងទេ គឺកម្មករត្រូវទំនាក់ទំនងទៅរដ្ឋបាលរោងចក្រ ឬសហគ្រាសរបស់ខ្លួនដើម្បីសួរព័ត៌មាននេះ។
វីអូឌីបានសុំការបញ្ជាក់បន្ថែមពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ អំពីចំនួនទឹកប្រាក់សរុបដែលរដ្ឋាភិបាលបានទូទាត់ទៅដល់បុគ្គលិក និងកម្មករចំនួន ៧លើកមកហើយ ប៉ុន្តែ លោកបានប្រាប់ឱ្យទៅមើលសេចក្ដីរាយការណ៍របស់សារព័ត៌មាន Fresh News។
ក្នុងអត្ថបទចុះផ្សាយដោយសារព័ត៌មាន ហ្វ្រេស ញូវស៍ កាលពីថ្ងៃម្សិលមិញនេះ លោក ហេង សួរ បាននិយាយថា រដ្ឋាភិបាលបានផ្ដល់ប្រាក់ឧបត្ថម្ភដល់ចំនួន ៣.៩លានដុល្លារអាមេរិកហើយទៅដល់បុគ្គលិកកម្មករសរុបដល់ទៅ ១៦៩,១៦១នាក់ ដែលត្រូវបានព្យួរការងារ។
កាលពីថ្ងៃទី៧ ខែមេសា លោកនាយករដ្ឋមន្ត្រី ហ៊ុន សែន ប្រកាសថា អំឡុងពេលព្យួរការងារ កម្មករនឹងទទួលបានប្រាក់ ៧០ដុល្លារក្នុងមួយខែ ដោយក្នុងនោះ រដ្ឋាភិបាលរួមចំណែក ៤០ដុល្លារ ហើយថៅកែរោងចក្រត្រូវចេញ ៣០ដុល្លារ។
កាលពីថ្ងៃទី១ ខែឧសភា ក្រុមសហជីពបានដាក់លិខិតមួយទៅខុទ្ទកាល័យនាយករដ្ឋមន្ត្រី ដើម្បីទាមទារទៅរដ្ឋាភិបាលឱ្យរក្សាការផ្តល់ប្រាក់ឈ្នួលប្រចាំខែយ៉ាងតិច ៦០ភាគរយ ជូនក្រុមកម្មករ ដោយរដ្ឋាភិបាលចេញ ២០ភាគរយ និងនិយោជកចេញ ៤០ភាគរយនៃប្រាក់ឈ្នួលរបស់កម្មករគ្រប់វិស័យនៅអំឡុងពេលនៃការរីករាលដាលជំងឺកូវីដ១៩។
សហជីពទាំងនោះ អះអាងថា ប្រាក់ ៧០ដុល្លារដែលផ្តល់ដោយភាគីរោងចក្រ និងរដ្ឋាភិបាលនោះ គឺមិនអាចជួយផ្គត់ផ្គង់ជីវភាពគ្រួសាររបស់កម្មករបានឡើយ៕
