លោកនាយករដ្ឋមន្ត្រី ហ៊ុន សែន លើកឡើងថា លោកមិនចង់ឃើញមានការរឹបអូសទ្រព្យសម្បត្តិកូនបំណុលដែលជំពាក់ធនាគារក្នុងស្ថានភាពវិបត្តិជំងឺកូរ៉ូណា ឬកូវីដ១៩នោះឡើយ ប៉ុន្តែ លោកនឹងគាំទ្រឱ្យមានការរឹបអូសទ្រព្យកូនបំណុល ប្រសិនបើពួកគេស្តាប់តាមការឃោសនា ឬបន្តឃោសនាមិនឱ្យមានការសងប្រាក់កម្ចីទៅធនាគារនោះ។
សំណេរនៅលើទំព័រហ្វេសប៊ុករបស់លោកកាលពីដើមខែមិថុនានេះ អតីតប្រធានគណបក្សសង្រ្គោះជាតិ លោក សម រង្ស៊ី ដែលកំពុងរស់នៅនិរទេសខ្លួនឯងនៅប្រទេសបារាំង បានរៀបរាប់ថា គ្រឹះស្ថានមីក្រូហិរញ្ញវត្ថុនៅកម្ពុជាជិតដួលរលំហើយ ដោយសារកូនបំណុលតូចៗជិត ៣លាននាក់ គ្មានលទ្ធភាពសងត្រឡប់ទៅវិញ។
លោក សម រង្ស៊ី បន្តថា៖ «វិធានការមួយទៀត គឺកុំទៅរឹបអូសផ្ទះសម្បែងរបស់ប្រជាពលរដ្ឋ។ លោកសល់តែប៉ុណ្ណឹង ឥលូវលោកអត់លុយសងបំណុលទេ លោកមិនដឹងទៅបបេះទៅបបោចពីណាទេ សុំពន្យារដែរ បីខែម្តងៗ គឺថារយៈពេល ៣ខែដំបូង ផ្អាកទាំងអស់។ មិនមែនថាមិនសងទេ ប៉ុន្តែ សុំលើកទៅថ្ងៃក្រោយ ពេលណាយើងមានលទ្ធភាព»។
អតីតមេបក្សប្រឆាំងរូបនេះ បានជំរុញទៅប្រជាពលរដ្ឋ ឱ្យផ្អាកការបង់សងប្រាក់ត្រឡប់ទៅធនាគារ ឬគ្រឹះស្ថានមីក្រូហិរញ្ញវត្ថុវិញនៅក្នុងស្ថានភាពវិបត្តិជំងឺកូវីដ១៩នេះ។
ថ្លែងក្នុងពិធីប្រកាសជាផ្លូវការកម្មវិធីឧបត្ថម្ភសាច់ប្រាក់ជូនប្រជាពលរដ្ឋក្រីក្រ និងងាយរងគ្រោះក្នុងអំឡុងពេលជំងឺកូវីដ១៩ ប្រមាណ ៦០ម៉ឺនគ្រួសារ នៅព្រឹកថ្ងៃទី២៤ ខែមិថុនា លោក ហ៊ុន សែន ថា វិស័យធនាគារ និងមីក្រូហិរញ្ញវត្ថុ នឹងមិនដួលរលំទេ ត្បិតមានធនាគារខ្លះសល់សាច់ប្រាក់កាន់តែច្រើន ដោយសារមិនមានអ្នកខ្ចីទៀតផង។
លោក ហ៊ុន សែន បានលើកទឹកចិត្តធនាគារ ឬគ្រឹះស្ថានមីក្រូហិរញ្ញវត្ថុនៅកម្ពុជា ប្តឹងទៅតុលាការ ដើម្បីរឹបអូសទ្រព្យសម្បត្តិអ្នកដែលជំពាក់ធនាគារ ហើយបន្តឃោសនា ឬបំផុសចលនាទៅអ្នកដទៃមិនឱ្យបង់ប្រាក់ទៅធនាគារនោះ។
លោក ហ៊ុន សែន ថ្លែងថា៖ «ហើយខ្ញុំសូមបញ្ជាក់ថា ខ្ញុំលើកទឹកចិត្តឱ្យការរឹបអូស [ទ្រព្យ] ប្រសិនបើអ្នកឯងជឿទៅលើអ្នកដែលឃោសនា ឬចលនាកុំឱ្យសងលុយធនាគារ។ ខ្ញុំគ្រាន់តែអំពាវនាវឱ្យធនាគារធ្វើការយោគយល់នៅក្នុងដំណាក់កាលនៃការលំបាក ប៉ុន្តែ ការសង [ប្រាក់] នៅតែសងហ្នឹង។ ប៉ុន្តែ មានអ្នកចលនាទីមួយ កុំឱ្យមនុស្សសងលុយទៅធនាគារ។ ខ្ញុំនឹងគាំទ្រឱ្យធនាគារប្តឹងទៅតុលាការ ដើម្បីរឹបអូស បើសិនជាជននោះគាំទ្រនូវនយោបាយរបស់អាអ្នកអំពាវនាវ»។
សមាជិកក្រុមប្រឹក្សាភិបាលនៃសមាគមគ្រឹះស្ថានហិរញ្ញវត្ថុនៅកម្ពុជា លោក ប៊ុន មុនី មានប្រសាសន៍ថា តាមពិត ប្រសាសន៍របស់លោកនាយករដ្ឋមន្ត្រី ជាការខឹងនឹងក្រុមប្រឆាំងលោកប៉ុណ្ណោះ ប៉ុន្តែ ធាតុពិតលោកតែងណែនាំដល់ខាងគ្រឹះស្ថានហិរញ្ញវត្ថុឱ្យអនុគ្រោះដល់ពលរដ្ឋ ហើយទៅមុខទៀត ខាងធនាគារ ឬគ្រឹះស្ថានហិរញ្ញវត្ថុ ក៏គ្មានការរឹបអូសទ្រព្យកូនបំណុលនោះដែរ។
លោក ប៊ុន មុនី ប្រាប់ថា៖ «តាមការពិត គឺគាត់ [លោក ហ៊ុន សែន] កំពុងតែទន់ភ្លន់ ហើយកំពុងតែណែនាំឱ្យយើងហ្នឹងអនុគ្រោះឱ្យប្រជាពលរដ្ឋ។ កន្លងមក សមាគមយើង ក៏ដូចជាខាង Individual MFI [គ្រឹះស្ថានមីក្រូហិរញ្ញវត្ថុ] Bank [ធនាគារ] អីហ្នឹង គឺយើងមិនដែលទៅរឹបអូសប្តឹងផ្តល់អីទេ យើងអត់មានទេ យើងមានតែការពន្យារពេលនៃការសង និង Restructure Loan [កែសម្រួលឥណទាន] ហ្នឹងឡើងវិញ តាមការស្នើសុំរបស់គេហ្នឹង»។
លោក ប៊ុន មុនី បានឱ្យដឹងបន្ថែមថា អ្នកប្រើប្រាស់កម្ចីរហូតដល់ ១៨ម៉ឺននាក់ បានស្នើទៅធនាគារ និងគ្រឹះស្ថានមីក្រូហិរញ្ញវត្ថុ ឱ្យកែសម្រួលឥណទានរបស់ពួកគេ ឬពន្យារពេលសងត្រឡប់ទៅស្ថាប័នផ្ដល់កម្ចីនៅក្នុងប្រទេសកម្ពុជា។
អ្នកស្រាវជ្រាវការអភិវឌ្ឍសង្គម លោកបណ្ឌិត សេង សារី យល់ឃើញថា ប្រសាសន៍របស់លោកនាយករដ្ឋមន្ត្រី អាចនឹងធ្វើឱ្យពលរដ្ឋជាកូនបំណុល មានគ្រោះទ្វេដង ដោយមួយជាគ្រោះពីវិបត្តិកូវីដ១៩ និងគ្រោះអាសន្នមួយទៀត ទាក់ទងការរឹបអូសទ្រព្យសម្បត្តិពួកគាត់ពីសំណាក់ធនាគារ ប្រសិនបើធនាគារ ឬអាជ្ញាធរអនុវត្តតាម។
លោកបណ្ឌិត សេង សារី បន្តថា៖ «ក្នុងស្ថានភាពនេះ ត្រូវតែអនុវត្តការជួយគាំទ្រគាត់ [ពលរដ្ឋ] សិន ហើយអ្វីដែលសំខាន់ហ្នឹង យើងត្រូវសួរត្រឡប់ទៅវិញថា តើពលរដ្ឋបែបណាដែលស្តាប់ ដែលយើងហៅថា គណបក្សប្រឆាំងបំផុសនោះ? អាចពួកគាត់ជាជនរងគ្រោះពិតប្រាកដ ហើយមិនមានលទ្ធភាពសងពិតប្រាកដ។ អ៊ីចឹង ដំណោះស្រាយល្អបំផុត មិនគួរមានការរឹបអូស [ទ្រព្យ] ទេ គឺជួយគាំទ្រគាត់សិនទៅ ហើយបន្ទាប់មកទៀត មានការសិក្សាឱ្យបានច្បាស់លាស់ថា តើការមិនសងលុយរបស់គាត់ហ្នឹង គឺជាចេតនាក្នុងការមិនសងតាមរយៈការញុះញង់ពិតមែន ឬក៏គាត់ពិតជាមិនមានលទ្ធភាពសងទៅធនាគារពិតប្រាកដ»។
កាលពីថ្ងៃទី២៧ ខែមេសា ឆ្នាំ២០២០ ក្រុមអង្គការសង្គមស៊ីវិលជាង ១៣០ស្ថាប័ន បានចេញសេចក្តីថ្លែងការណ៍រួមមួយ ដោយអំពាវនាវទៅរដ្ឋាភិបាលជួយអន្តរាគមន៍ឱ្យមានការផ្អាកសងប្រាក់កម្ចី និងការប្រាក់ទាំងអស់ យ៉ាងតិចណាស់ចំនួន ៣ខែ និងប្រគល់ជូនម្ចាស់ទ្រព្យវិញនូវប័ណ្ណកម្មសិទ្ធិដីធ្លី ឬទ្រព្យបញ្ចាំ។
ក្រុមអង្គការសង្គមស៊ីវិល លើកឡើងថា វិធានការទាំងនេះ គឺមានភាពចាំបាច់ ដើម្បីធានាថា ប្រជាពលរដ្ឋអាចបន្តរស់នៅក្នុងពេលមានវិបត្តិនេះ ដោយគ្មានហានិភ័យចំពោះសុខភាព ឬលំនៅដ្ឋានរបស់ពួកគេ ព្រមទាំងអាចបញ្ចៀសពីកម្ចីឥណទានមានហានិភ័យ ដែលអាចនាំឱ្យកើតមានករណីធ្វើការងារដោះបំណុល ការជួញដូរមនុស្ស និងការរំលោភសិទ្ធិមនុស្សដទៃទៀត។
សេចក្តីថ្លែងការណ៍ដដែល បញ្ជាក់ថា បច្ចុប្បន្ន ពលរដ្ឋកម្ពុជាច្រើនជាង ២លាន ៥សែននាក់ ជាប់ជំពាក់កម្ចីខ្នាតតូច ជាមួយនឹងអត្រាកម្ចីជាមធ្យម ៣,៨០០ដុល្លារក្នុងមួយកម្ចី ដែលជាចំនួនច្រើនជាងគេនៅលើពិភពលោក។
ប្រភពដដែលថា បញ្ហានេះធ្វើឱ្យជីវភាពរស់នៅ សុខភាព និងសុវត្ថិភាពកម្មសិទ្ធិដីធ្លីរបស់ប្រជាពលរដ្ឋកម្ពុជារាប់លាននាក់ ប្រឈមនឹងហានិភ័យ៕
