ក្រសួងកសិកម្ម រុក្ខាប្រមាញ់ និងនេសាទ ប្រកាសចាត់វិធានការទៅលើបទល្មើសនេសាទ និងការកាប់រានដីព្រៃឈើ រួមទាំងព្រៃលិចទឹក ដោយថា ដើម្បីរក្សាធនធានធម្មជាតិឱ្យមានប្រសិទ្ធភាព។
សេចក្ដីជូនដំណឹងកាលពីថ្ងៃសុក្រសប្ដាហ៍មុន ក្រសួងកសិកម្មសម្រេចឱ្យមន្ទីរកសិកម្ម និងអាជ្ញាធរខេត្ត ចាត់វិធានការ និងទប់ស្កាត់បទល្មើសព្រៃឈើ ជលផល និងការកាប់រាន ដុត ឈូសឆាយដីព្រៃឈើ រួមទាំងព្រៃលិចទឹក ដើម្បីធានាពីប្រសិទ្ធភាពនៃការគ្រប់គ្រងធនធានធម្មជាតិ ជាពិសេសព្រៃឈើ និងជលផល។
ការសម្រេចនេះ ដោយក្រសួងថា សកម្មភាពនេសាទ ការកាប់រានដីព្រៃឈើ និងព្រៃលិចទឹក រួមទាំងការដឹកជញ្ជូនផលអនុផលព្រៃឈើ ដោយការកាប់រានដុត ឈូសឆាយដីរដ្ឋខុសច្បាប់នៅតែបន្តកើតមានឡើងតាមបណ្ដាខេត្តមួយចំនួន។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍ថា សកម្មភាពកាប់រានដីព្រៃឈើ និងព្រៃលិចទឹក យកធ្វើជាកម្មសិទ្ធិផ្ទាល់ខ្លួន កំពុងកើតឡើងនៅជាប់បឹងទន្លេសាប មានដូចជា ខេត្តកំពង់ឆ្នាំង ពោធិ៍សាត់ បាត់ដំបង សៀមរាប និងខេត្តមណ្ឌលគិរី។
លោកបន្តថា អ្នកដែលកាប់រានដុត ឈូសឆាយដីព្រៃឈើ និងព្រៃលិចទឹកកន្លងមក មានប្រជាពលរដ្ឋ និងក្រុមឈ្មួញ ហើយបច្ចុប្បន្ននេះ លោកថា ក្រសួងកំពុងចុះស្វែងរកឈ្មោះម្ចាស់ដីទាំងនោះ មុននឹងចាត់វិធានការ។
លោក វេង សាខុន ប្រាប់ថា៖ «យើងបានឱ្យអភិបាលខេត្តឱ្យនិរាករណ៍នូវលិខិតស្នាមដែលបានបញ្ជាក់ ដែលធ្វើតាមឃុំ-ស្រុក វាអត់ស្របច្បាប់ ហើយដីជាដីរបស់រដ្ឋ ហើយយើងទៅធ្វើអ៊ីចឹង វាខុសច្បាប់។ យើងបានចុះធ្វើសេចក្ដីណែនាំមួយជុំហើយ យើងនឹងត្រឡប់ទៅតាមដានវិញទៀត ហើយតាមដានបន្តបន្ទាប់ តើវិធានការដែលយើងដាក់ទៅអនុវត្តអត់? ជាចុងក្រោយ បើសិនជាគណៈបញ្ជាការឯកភាពមិនចូលរួមអនុវត្ត យើងនឹងធ្វើសេចក្ដីរាយការណ៍ទៅប្រមុខរាជរដ្ឋាភិបាលពិនិត្យ និងដោះស្រាយ»។
សមាជិកសហគមន៍ផាត់សណ្ដាយនៅស្រុកកំពង់ស្វាយ ខេត្តកំពង់ធំ លោក ហ៊ុន សុខសេក ចាត់ទុកវិធានការរបស់ក្រសួងថា ជារឿងល្អ ដោយថា កន្លងមក សកម្មភាពកាប់រាន ដុត ដីព្រៃឈើ និងព្រៃលិចទឹក ដើម្បីយកដីនោះ បានកើតឡើងជាបន្តបន្ទាប់។
លោក ហ៊ុន សុខសេក ប្រាប់ថា៖ «ប្រជាពលរដ្ឋធម្មតាជាអ្នកកាប់រាន ប៉ុន្តែ មិនមែនប្រជាពលរដ្ឋនៅក្នុងភូមិទេ [មកពីខេត្តផ្សេងៗ។ វិធានការរបស់ក្រសួងជារឿងល្អ [ព្រោះ] ជួយរក្សាធនធានធម្មជាតិឱ្យនៅបានច្រើន ហើយជាជម្រកត្រីផងដែរ»។
អ្នកសម្របសម្រួលគម្រោងទន្លេសាបភាគខាងជើង នៃអង្គការសម្ព័ន្ធភាពដើម្បីអភិរក្សធនធានជលផល លោក មិញ ប៊ុនលី បានបង្ហាញការគាំទ្រចំពោះវិធានការរបស់ក្រសួងក្នុងទប់ស្កាត់ពាក់ព័ន្ធនឹងការកាប់រានដីព្រៃឈើ និងព្រៃលិចទឹក។ លោកមើលឃើញថា អាជ្ញាធរថ្នាក់ក្រោមហាក់ដូចជាមានការយោគយល់ ដែលធ្វើឱ្យសកម្មភាពកាប់រានដីព្រៃឈើ និងព្រៃលិចទឹក ចេះតែបន្តកើតមានដដែល។
លោក មិញ ប៊ុនលី ប្រាប់ថា៖ «ទាក់ទងនឹងការចាត់វិធានការអ្នកនៅខាងក្រោមមួយចំនួន ខ្ញុំសូមមិននិយាយថា ស្ថាប័នៗណាទេ ប៉ុន្តែ អ្នកនៅស្ថាប័នថ្នាក់ក្រោមជាតិ មានការត្រូវរ៉ូវគ្នា ឬមិនបានចាប់អារម្មណ៍ និងបិទភ្នែកខ្លះ និងខ្លះចាំមើលបំណាំគ្នា វាជាឱកាសរបស់ប្រជាពលរដ្ឋវាទ កាប់បំផ្លាញបន្ថែម អ្នកមានដីចាស់ គាត់លួចកាប់បន្ថែម ហើយអ្នកមួយចំនួនទៀតលួចដុត»។
មន្ត្រីពង្រឹងសិទ្ធិអំណាចសហគមន៍នៃសមាគមការពារសិទ្ធិមនុស្សអាដហុក(ADHOC) លោក ប៉ែន ប៊ុណ្ណារ៍ ចាត់ទុកវិធានការរបស់រដ្ឋាភិបាលថា មិនមែនជារឿងថ្មីទេ ប៉ុន្តែ លោកថា លោកនឹងធ្វើការតាមដានចំពោះករណីនេះ។ លោកបន្តថា ដើម្បីទប់ស្កាត់ និងបង្រ្កាបការកាប់រានដី ព្រៃឈើ និងព្រៃលិចទឹកឱ្យមានប្រសិទ្ធភាព លុះត្រាតែរដ្ឋមន្ត្រី ក្រសួងពាក់ព័ន្ធ ហ៊ានចេញមុខប្ដឹងចំពោះអ្នកដែលកាប់រានដីព្រៃឈើ និងព្រៃលិចទឹក។
លោក ប៉ែន ប៊ុណ្ណារ៍ ប្រាប់ថា៖ «មន្ត្រីជាន់ខ្ពស់ចេញមុខប្ដឹង ដើម្បីឱ្យឆ្លើយតបនឹងទំហំអ្នកប្រព្រឹត្តធំៗ។ បើសិនជាមន្ត្រីជាន់ខ្ពស់ធំៗនៅក្រសួងចេញមុខប្ដឹងបរិហារ អ៊ីចឹងបានយើងគិតថា បានមានប្រសិទ្ធភាព ហើយចំពោះបទល្មើសល្មមៗ ទុកឱ្យមន្ត្រីថ្នាក់ក្រោមធ្វើការទៅ។ អ៊ីចឹង ដំបូងបំផុត យើងចង់ឱ្យមន្ត្រីជាន់ខ្ពស់នៅថ្នាក់ក្រសួង តំណាងរាស្ត្រទៀត ឱ្យចេញមុខប្ដឹង ចំពោះមន្ត្រីធំៗ ឬក៏ឧកញ៉ាទៅតុលាការ ដើម្បីរុញយ៉ាងម៉េចឱ្យមានប្រសិទ្ធភាព ហើយបើសិនគ្រាន់តែចេញលិខិតដើម្បីព្រមានអីហ្នឹង ខ្ញុំគិតថាដដែលៗ មិនបានលទ្ធផលទេ»។
លោកបន្តថា ប្រសិនបើមន្ត្រីនៅតាមក្រសួងពាក់ព័ន្ធ នឹងមិនហ៊ានចេញមុខប្ដឹងទេ លោកថា វិធានការទប់ស្កាត់កាប់រានដីព្រៃឈើ និងព្រៃលិចទឹកមិនមានប្រសិទ្ធភាពឡើយ ដោយសារ អ្នកដែលកាប់រានដីព្រៃឈើ និងព្រៃលិចទឹកកន្លងមក ភាគច្រើនជាអ្នកមានអំណាច មិនមែនប្រជាពលរដ្ឋជាអ្នកធ្វើនោះទេ។
បើតាមអង្គការអភិរក្សព្រៃឈើដែលមានឈ្មោះថា Global Forest Watch បានប៉ាន់ប្រមាណថា ប្រទេសកម្ពុជាបានបាត់បង់ព្រៃឈើ ២,១៧ លានហិកតា ចាប់ពីចន្លោះឆ្នាំ២០០១ ដល់ឆ្នាំ២០១៨ គឺស្មើនឹង ១ភាគ៤ នៃការបាត់បង់គម្របព្រៃឈើចាប់តាំងពីឆ្នាំ២០០០។
ចំពោះតំបន់បឹងទន្លេសាបវិញ អង្គការអភិរក្សព្រៃឈើ រកឃើញថា ព្រៃលិចទឹកបានបាត់បង់ប្រមាណ ១៦.៨០០ហិកតា ចាប់ពីចន្លោះឆ្នាំ២០០១ និងឆ្នាំ២០០៨ ដោយសារការកាប់រាន៕