ប្រធានរាជ្យបណ្ឌិតសភាកម្ពុជា អំពាវនាវដល់អ្នកពាក់ព័ន្ធឱ្យឈប់លុបបឹង ទុកធ្វើជាកន្លែងរំដោះទឹកកុំឱ្យលិចរាជធានី ហើយមើលគំរូអភិវឌ្ឍន៍តាមប្រទេសរីកចម្រើន និងកែប្រែទម្លាប់រក្សាគុណភាពបរិស្ថាន ដើម្បីជាប្រយោជន៍ដល់មនុស្សជំនាន់ក្រោយ។
ក្នុងកិច្ចពិភាក្សាតុមូលលើប្រធានបទ«តើកម្ពុជាត្រៀមអ្វីខ្លះ ដើម្បីស្ដារសេដ្ឋកិច្ចក្រោយចប់កូវីដ១៩» កាលពីម្សិលមិញ ប្រធានរាជ្យបណ្ឌិតសភាកម្ពុជា លោក សុខ ទូច ថ្លៃងថា ប្រទេសកូរ៉េខាងត្បូងមានផ្ទៃដីតូចជាងកម្ពុជា ហើយមានប្រជាជនដល់ទៅ៥២ លាននាក់ តែប្រទេសនោះមិនដែលលុបបឹងដូចប្រទេសកម្ពុជាឡើយ។ ក្នុងឱកាសនោះលោក៏បានសរសេរពីការគ្រប់គ្រងកាកសំណល់នៅប្រទេសថៃដែរ។
លោកបន្ថែមថា៖«ខ្ញុំដឹងថាខ្ញុំនិយាយហ្នឹងប៉ះ ប៉ុន្តែត្រូវតែទទួលការឈឺចាប់ ត្រូវតែទទួលយក បើមិនទទួលយក ហើយបន្តលុបបឹងទៀត ហើយពេលភ្លៀងមកលិចភ្នំពេញ។ វាអត់អីហូរ។ ស្រុកគេទៅមើលថៃ មុននឹងបញ្ជូនទៅកាកសំណល់ទៅក្នុងទន្លេគេត្រូវស្តុកទុកឱ្យកក់សិន បីដំណាក់កាលបានគេបង្ហូរចូលទន្លេ។ យើងក៏ដូចគ្នាដែល យើងត្រូវតែកែសង្គមយើង ប្រទេសរបស់យើងទាំងអស់គ្នា ខ្ញុំរស់នៅក៏មិនបានយូរ លោកក៏រស់នៅមិនបានយូរលោករស់នៅក៏មិនបានយូរ ប៉ុន្តែកូនរបស់យើង។ អ៊ីចឹងយើងត្រូវតែរក្សា»។
លិខិតទីស្តីការគណៈរដ្ឋមន្ត្រី ផ្ញើទៅក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដី នគរូបនីយកម្ម និងសំណង់ ក្រសួងធនធានទឹក និងឧតុនិយម និងសាលារាជធានីភ្នំពេញ កាលពីថ្ងៃទី១៣ ខែមីនា ឆ្នាំ២០២០ ឱ្យដឹងថា រដ្ឋាភិបាលសម្រេចកាត់ផ្ទៃដីបឹងតាមោក (បឹងកប់ស្រូវ) ចំនួន៧៥ហិកតា ស្ថិតនៅសង្កាត់គោករកា ខណ្ឌព្រែកព្នៅ ឱ្យសាលារាជធានីភ្នំពេញ ដើម្បីបង្កើតសួន និងឧទ្យានធម្មជាតិសាធារណៈ។
កាលពីខែមិថុនា ឆ្នាំ២០១៨ រដ្ឋាភិបាលក៏សម្រេចកាត់ផ្ទៃបឹងតាមោកចំនួន២០ហិកតា តាមសំណើរបស់សាលារាជធានីភ្នំពេញ ដើម្បីអភិវឌ្ឍធ្វើផ្សារបន្លែ និងចំណតរថយន្តផងដែរ។
កាលពីថ្ងៃទី៨ ខែឧសភា ឆ្នាំ២០២០ក្រសួងធនធានទឹកស្នើទៅអាជ្ញាធររាជធានី-ខេត្តឱ្យជួយទប់ស្កាត់ការចាក់ដីលុបចំណីច្រំាង ស្ទឹង ព្រែក អូរ ប្រឡាយ និងអាងទឹកបឹងបូ ដោយថា ការចាក់ដីលុបនេះ នឹងបង្កជាគ្រោះថ្នាក់មហន្តរាយទឹកជំនន់។
កាលពីដើមខែកុម្ភៈ ឆ្នាំ២០១៦ រដ្ឋាភិបាលកម្ពុជាបានចេញអនុក្រឹត្យស្ដីពីការកំណត់ផ្ទៃបឹងតាមោកជាសម្បតិ្តរបស់រដ្ឋ ដែលមានផ្ទៃដីសរុបប្រមាណ ៣ ២៣៩ហិកតា សម្រាប់ស្តុកទឹកកខ្វក់ និងរំដោះទឹកចេញពីរាជធានីភ្នំពេញ។
របាយការណ៍ដែលចេញផ្សាយដោយសមាគមធាងត្នោត កាលពីថ្ងៃទី២៦ខែធ្នូឆ្នាំ២០១៩ បង្ហាញថា បឹងធម្មជាតិទាំងអស់នៅរាជធានីភ្នំពេញកំពុងប្រឈមចាក់ដីលុបអស់ទាំងស្រុង។ របាយការណ៍បញ្ជាក់ថា គិតចាប់ពីឆ្នាំ១៩៩០មក បឹងនៅកម្ពុជាមានចំនួន២៦ ហើយក្នុងចំណោមនោះ១៦លុបអស់ទាំងស្រុង និង បឹងដែលនៅសល់កំពុងតែមានសកម្មភាពបន្តចាក់លុប៕