រដ្ឋអំណាចចិននៅទីក្រុងប៉េកាំងលុបចោលជើងហោះហើរជាង ១ពាន់ជើងនៅថ្ងៃម្សិលមិញ បន្ទាប់ពីករណីឆ្លងកូវីដ១៩ថ្មីចេញពីផ្សារបន្លែធំបំផុតរបស់ទីក្រុងត្រូវបានរកឃើញជាបន្តបន្ទាប់ ហើយព្រមានពលរដ្ឋពីគ្រោះថ្នាក់នៃរលកចម្លងរបស់មេរោគរាតត្បាតថ្មី។
សារព័ត៌មានរដ្ឋចិនរាយការណ៍នៅថ្ងៃនេះថា យ៉ាងហោចណាស់ ជើងហោះហើរ ១២៥៥ជើង ស្មើប្រមាណ ៧០ភាគរយនៃការធ្វើដំណើរឡើងនិងចុះទាំងអស់នៅព្រលានយន្តហោះក្រុងប៉េកាំង ត្រូវបានលុបចោលនៅថ្ងៃពុធនេះ ហើយពលរដ្ឋក្នុងសហគមន៍ទាំងអស់ត្រូវបានហាមមិនឱ្យចេញពីទីក្រុង។
តាមសេចក្តីរាយការណ៍ពីកាសែតរដ្ឋចិន Xinhua ឱ្យដឹងថា ការបង្កើនការរឹតបន្តឹងការធ្វើដំណើរឡើងវិញនេះ ធ្វើឡើងក្រោយករណីឆ្លងថ្មីចេញពីផ្សារបន្លែ Xinfadi ត្រូវបានរកឃើញច្រើនករណីជាបន្តបន្ទាប់ក្នុង១សប្តាហ៍ចុងក្រោយ ដោយសរុបបានកើនដល់ ១៦៩ករណី។
ប្រភពដដែលឱ្យដឹងបន្ថែមថា អាជ្ញាធរក៏បានបិទសាលារៀន ផ្អាកកម្មវិធីជួបជុំនានា និងហាមពលរដ្ឋចេញចូលតំបន់ក្បែរតំបន់កើតហេតុទាំងអស់ ហើយអំពាវនាវឱ្យអ្នកដែលបានទៅផ្សារបន្លែ Xinfadi ទាំងអស់ចាប់ពីថ្ងៃទី៣០ ខែឧសភា មកតេស្តរកមេរោគ។
អនុប្រធានមជ្ឈមណ្ឌលបង្ការ និងគ្រប់គ្រងជំងឺឆ្លងក្រុងប៉េកាំង លោក Pang Xinghuo លើកឡើងពីការលំបាកក្នុងការគ្រប់គ្រងការចម្លងរបស់មេរោគ និងព្រមានពីការវិលត្រឡប់នៃរលកចម្លងរបស់មេរោគជាលើកទីពីរ ខណៈករណីឆ្លងថ្មីបន្តរកឃើញច្រើនករណីក្នុងមួយថ្ងៃ។
តាមប្រភពដដែល លោក Pang ឱ្យដឹងបន្ថែមថា ផ្សារ Xinfadi គឺជាទីផ្សារលក់បន្លែ ត្រីសាច់ និងគ្រឿងសមុទ្រធំបំផុតក្នុងទីក្រុង ដោយមានពលករអន្តោប្រវេសន៍ធ្វើការរាប់ពាន់នាក់ និងអ្នកដំណើររាប់ម៉ឺននាក់មកកាន់ផ្សារនេះដើម្បីទិញម្ហូបជារៀងរាល់ថ្ងៃ។
ប្រភពដដែលបន្ថែមថា ដោយសារកត្តាចំនួនមនុស្សបម្លាស់ទីទៅមកក្នុងទ្រង់ទ្រាយធំដូច្នេះ ទើបធ្វើឱ្យអាជ្ញាធរពិបាកគ្រប់គ្រងការចម្លង។ លោកថា តួលេខឆ្លងថ្មីនឹងកើនឡើងនៅប៉ុន្មានថ្ងៃខាងមុខ។
ឆ្លើយតបនឹងហានិភ័យនេះ អាជ្ញាធរក្រុងបានបង្កើនបុគ្គលិកទប់ស្កាត់ការចម្លងរបស់មេរោគឡើងដល់ ១សែននាក់ ហើយមនុស្សប្រមាណ ២សែននាក់ ដែលធ្លាប់ទៅផ្សារបន្លែ ត្រូវបានទាក់ទងសួរនាំដល់ផ្ទះ តាមទូរសព្ទ តាមកម្មវិធីទូរសព្ទចល័ត និងតាមវិធីផ្សេងទៀត។ អាជ្ញាធរកំពុងបង្កើនការតេស្តរហ័សលើពួកគេទាំងនេះ ខណៈស្នើឱ្យបង្ខាំងខ្លួនក្នុងផ្ទះរង់ចាំការតាមដានសុខភាព។
នៅថ្ងៃម្សិលមិញ អាជ្ញាធរចិនបានប្រកាសតេស្តរកមេរោគកូវីដ១៩ លើផលិតផលសាច់នាំចូលពីក្រៅប្រទេសទាំងអស់ ពិសេសពីសហរដ្ឋអាមេរិក និងអឺរ៉ុប បន្ទាប់ពីផ្ទុះករណីឆ្លងចេញពីផ្សារ Xinfadi ហើយគេសង្ស័យថា ឆ្លងពីត្រីសាម៉ុងដាក់លក់នៅផ្សារនោះ។
នៅថ្ងៃទី១០ ខែឧសភា ជំងឺកូវីដ១៩ បានចាប់ផ្តើមកម្រើកឡើងវិញចេញពីអគារលំនៅដ្ឋានមួយកន្លែងនៅទីក្រុងវូហាន ហើយអាជ្ញាធរខេត្តបានបិទខ្ទប់ការធ្វើដំណើរចេញចូលតំបន់នោះ រួចបើកយុទ្ធនាការ ១០ថ្ងៃ តេស្តរកមេរោគលើមនុស្ស ១១លាននាក់។
យុទ្ធនាការនេះ ធ្វើឡើងចំពេលអាមេរិក អឺរ៉ុប និងប្រទេសជាច្រើនផ្សេងទៀតដែលរងការវាយប្រហារធ្ងន់ធ្ងរពីមេរោគ បង្កើនការដាក់សម្ពាធឱ្យរដ្ឋាភិបាលក្រុងប៉េកាំងបើកផ្លូវឱ្យក្រុមអ្នកវិទ្យាសាស្រ្តអន្តរជាតិ ចុះស្រាវជ្រាវប្រភពដើមនៃមេរោគកូវីដ១៩ និងមូលហេតុនៃការឆ្លងរាលដាលនៅក្រុងវូហាន៕