អភិបាលរាជធានីភ្នំពេញ បានលើកឡើងថា រាល់ទម្រង់នៃការដោះស្រាយបញ្ហាជម្លោះដីធ្លីនៅរាជធានី នឹងងាយស្រួលដោះស្រាយ ប្រសិនបើជម្លោះដីធ្លីនោះ មិនមានអ្នកនយោបាយញុះញង់នៅពីក្រោយ។
ថ្លែងក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រីនាព្រឹកថ្ងៃអង្គារនេះ លោក ឃួង ស្រេង មានប្រសាសន៍ថា ជម្លោះដីធ្លីដែលពិបាកដោះស្រាយគឺ ដោយសារក្រុមអ្នកតវ៉ាខ្លះជាអ្នកតវ៉ាអាជីព ហើយខ្លះទៀត ដោយសារមានអ្នកនយោបាយនៅពីក្រោយផងដែរ។
លោកមានប្រសាសន៍ថា៖ «បញ្ហាដីធ្លី បើវាជាបញ្ហាទំនាស់ដីធ្លីពិតប្រាកដសុទ្ធសាធ គឺងាយស្រួលក្នុងការដោះស្រាយ ហើយកុំឱ្យអ្នកនយោបាយកេងចំណេញលើបញ្ហានេះ ឬក៏អុជអាលលើបញ្ហានេះ យើងងាយស្រួលក្នុងការដោះស្រាយណាស់»។
តំណាងសហគមន៍ជ្រោយចង្វារ ដែលមានជម្លោះដីធ្លីជាមួយក្រុមហ៊ុន OCIC និងអះអាងថា ជាអតីតនាយទាហានកងទ័ពជើងអាកាសឋានៈផ្កាយ១ លោក ជា សុផាត យល់ឃើញថា ការលើកឡើងរបស់អភិបាលក្រុងភ្នំពេញ ជាការលាបពណ៌ទៅលើពលរដ្ឋមានជម្លោះដីធ្លីពិតប្រាកដ ពិសេសសហគមន៍ជ្រោយចង្វាររបស់លោក ហើយក៏ជាការគំរាមកំហែងរបស់ពួកគាត់ផងដែរ។
លោកបន្តថា មូលហេតុជំរុញឱ្យពលរដ្ឋសហគមន៍លោកតវ៉ាកន្លងមក ដោយសារភាពអយុត្តិធម៌ ត្បិតដីធ្លីតំបន់សហគមន៍ជ្រោយចង្វារដែលពួកគាត់កាន់កាប់ គឺធ្វើឡើងដោយស្របច្បាប់ ប៉ុន្តែយន្តការដោះស្រាយសំណងផលប៉ះពាល់ ប្រជាសហគមន៍លោកមិនអាចទទួលយកបាន។
លោកមានប្រសាសន៍ថា៖ «អាហ្នឹងជាការលាបពណ៌មួយហើយ។ ជាការលាបពណ៌ដល់ការតស៊ូមតិរបស់ប្រជាពលរដ្ឋដែលរងផលប៉ះពាល់ ដល់យូរទៅ គ្នាហ្នឹងរួញ [ខ្លាច]។ ដល់បញ្ហាសព្វថ្ងៃហ្នឹង បញ្ហាកូវីដ១៩ផង បញ្ហាសម្ពាធនយោបាយផ្សេងៗទៀតផង។ ពួកខ្ញុំចេញទៅ [ចេញតវ៉ា] សឹងគេយកច្បាប់អាជ្ញាសឹកយកមកដាក់ហ្នឹង គេដាក់គុកយើងថ្មើរណាក៏បានដែរ។ វាជាបញ្ហាមួយដែលធ្វើឱ្យយើងបាត់បង់ស្មារតីទាមទាររកយុត្តិធម៌ហ្នឹង»។
លោកបន្ថែមថា សហគមន៍របស់លោក ចាប់ផ្តើមមានជម្លោះដីធ្លីជាមួយក្រុមហ៊ុន OCIC តាំងពីឆ្នាំ២០១០ ហើយបច្ចុប្បន្ន ពលរដ្ឋនៅមិនទាន់ទទួលបានការដោះស្រាយសមស្របមានចំនួន ៦៧គ្រួសារទៀត លើទំហំផ្ទៃដីជាង ៤០ហិកតា។
អតីតមន្ត្រីជាន់ខ្ពស់គណបក្សសង្រ្គោះជាតិ លោក អ៊ូ ច័ន្ទរ័ត្ន មើលឃើញថា កន្លងមក អតីតបក្សប្រឆាំង រួមទាំងអង្គការសង្គមស៊ីវិលខ្លះផង តែងរងការចោទប្រកាន់បែបនេះ ប៉ុន្តែ នេះជាលេសដើម្បីគេចវេះពីការដោះស្រាយ ដើម្បីផ្តល់ភាពយុត្តិធម៌ជូនពលរដ្ឋរងគ្រោះតែប៉ុណ្ណោះ។
លោកបន្តថា កន្លងមក អតីតបក្សសង្រ្គោះជាតិមិនដែលយកបញ្ហាដីធ្លីដើម្បីកេងចំណេញនយោបាយឡើយ ប៉ុន្តែ ដោយសារភាពអយុត្តិធម៌ក្នុងការដោះស្រាយជូនពលរដ្ឋមានជម្លោះដីធ្លី ទើបការដោះស្រាយអូសបន្លាយយូរ និងជំរុញឱ្យមានការតវ៉ាជារឿយៗ។
លោក អ៊ូ ច័ន្ទរ័ត្ន បន្ថែមថា៖ «ខ្ញុំមើលឃើញថា ដោយសារការកេងប្រវ័ញ្ច កេងចំណេញពីប្រជាពលរដ្ឋ។ ប្រសិនបើមានការដោះដូរ ការដោះស្រាយដោយយុត្តិធម៌ជូនគាត់ [ពលរដ្ឋមានជម្លោះដីធ្លី] អាហ្នឹងមិនបង្កឱ្យមានបញ្ហាវែងអន្លាយអីចឹងទេ»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា ការលើកឡើងនេះ ជាការលាបពណ៌ទៅលើពលរដ្ឋមានជម្លោះដីធ្លីតែប៉ុណ្ណោះ។
លោកមើលឃើញថា ពលរដ្ឋមានវិវាទដីធ្លីទាំងនោះ កន្លងមកតវ៉ាដើម្បីទាមទារឱ្យអាជ្ញាធរដោះស្រាយបញ្ហាដីធ្លីរបស់ពួកគាត់ដោយសមស្របតែប៉ុណ្ណោះ ដោយមិនយករឿងនយោបាយមកពាក់ព័ន្ធនោះឡើយ។
លោកបន្ថែមថា៖ «បាទ! ពីព្រោះអីទាក់ទងនឹងរឿងដីធ្លីដែលបាត់បង់ផ្ទាល់ហ្នឹង ដោយគាត់មិនគិតរឿងនយោបាយអីទេ។ គាត់គិតរឿងគោលនយោបាយមែន ប៉ុន្តែ គាត់មិនគិតរឿងហ្នឹងទេ ពិសេសគាត់ចង់បានដីគាត់មកវិញ ឬចង់បានដំណោះស្រាយដែលពួកគាត់អាចទទួលយកបាន»។
ជម្លោះដីធ្លីនៅរាជធានីភ្នំពេញ ដែលគេសង្កេតឃើញថាមានភាពចម្រូងចម្រាសរហូតដល់មានការចាប់ខ្លួនតំណាងរបស់ពួកគេដាក់ពន្ធនាគារទៀតផង ដូចជា ករណីជម្លោះដីធ្លីតំបន់បឹងកក់ តំបន់បុរីកីឡា តំបន់ដីក្រហម តំបន់ដីសំបុកចាបជាដើម។
វិវាទដីធ្លីនៅភ្នំពេញដែលចម្រូងចម្រាសទាំងនោះ ករណីខ្លះប្រើរយៈពេលដោះស្រាយយូររហូតដល់ជិត ១០ឆ្នាំ ឬជាង ១០ឆ្នាំក៏មាន៕