ក្រសួងសុខាភិបាលវៀតណាម អះអាងថា កាលពីថ្ងៃទី៨ ខែមិថុនាម្សិលមិញនេះ យុវជនវៀតណាមម្នាក់ អាយុ ១៨ឆ្នាំ ធ្វើដំណើរចាកចេញពីកម្ពុជាចូលវៀតណាម មានផ្ទុកមេរោគកូវីដ១៩។ នេះបើយោងតាមការចុះផ្សាយរបស់សារព័ត៌មាន VN Express។
តាមការចុះផ្សាយរបស់ VN Express បញ្ជាក់ថា យុវជនវៀតណាមរូបនោះ ឆ្លងពីប្រទេសកម្ពុជាទៅកាន់ប្រទេសវៀតណាម កាលពីថ្ងៃទី២៥ ខែឧសភា។ ប្រភពដដែលបញ្ជាក់ថា យុវជនរូបនោះ ឆ្លងតាមច្រកព្រំដែន Thuong Phuoc។
វីអូឌីមិនទាន់អាចសុំការបញ្ជាក់បន្ថែមពីអ្នកនាំពាក្យក្រសួងសុខាភិបាលទេ ជុំវិញករណីនេះ។
គិតត្រឹមថ្ងៃទី០៨ ខែមិថុនានេះ ក្រសួងសុខាភិបាល បានប្រកាសថា អ្នកជំងឺឆ្លងវីរុសកូរ៉ូណាម្នាក់ទៀត ត្រូវបានព្យាបាលជាសះស្បើយ ដែលធ្វើឱ្យចំនួនអ្នកជាសះស្បើយពីជំងឺនេះកើនដល់ ១២៤នាក់ ខណៈអ្នកជំងឺ ២នាក់ទៀត កំពុងស្ថិតនៅក្រោមការព្យាបាលនៅឡើយ។
ចំណែកវៀតណាម ប្រកាសថា គិតត្រឹមថ្ងៃនេះ មនុស្សជាង ៩០០០នាក់ កំពុងដាក់ឱ្យស្ថិតនៅក្នុងការពិនិត្យ និងព្យាបាលមេរោគកូវីដ១៩៕
