អាជ្ញាធរកម្ពុជា អះអាងថា នឹងបើកការស៊ើបអង្កេតជុំវិញព័ត៌មាននៃការចាប់ខ្លួនសកម្មជននយោបាយថៃ លោក វ៉ាន់ឆាឡឺម សាតស័ក្តិសិទ្ធ ក្នុងរាជធានីភ្នំពេញ។
ហេតុការណ៍ចាប់ពង្រាត់សកម្មជនបក្សប្រឆាំង លោក វ៉ាន់ឆាឡឺម សាតស័ក្តិសិទ្ធ (Wanchalearm Satsaksit) ត្រូវបានទម្លាយឱ្យដឹងពីសំណាក់អង្គការឃ្លាំមើលសិទ្ធិមនុស្ស (Human Rights Watch) កាលពីថ្ងៃទី០៥ ខែមិថុនា។ អង្គការនេះរាយការណ៍ថា ជនប្រដាប់អាវុធមួយក្រុមជិះរថយន្តពណ៌ខ្មៅមួយគ្រឿង បានចាប់ខ្លួនលោក វ៉ាន់ឆាឡឺម នៅពេលដែលគាត់ដើរតាមផ្លូវទិញអាហារមុខអគារស្នាក់នៅនារាជធានីភ្នំពេញ កាលពីវេលាម៉ោងជិត ៦ល្ងាច ថ្ងៃទី៤ ខែមិថុនា។
ប្រតិកម្មជុំវិញការចាប់ខ្លួនសកម្មជននយោបាយអាវក្រហមថៃនៅពេលនេះ កើតឡើងជាបន្តបន្ទាប់រហូតដល់ក្រុមអ្នកគាំទ្រ និងសាច់ញាតិលោក វ៉ាន់ឆាឡឺម ចេញមុខធ្វើបាតុកម្មនៅខាងមុខស្ថានទូតខ្មែរប្រចាំទីក្រុងបាងកកនៅថ្ងៃម្សិលមិញ។
អ្នកនាំពាក្យក្រសួងការបរទេសកម្ពុជា លោក កុយ គួង បញ្ជាក់ថា ស្ថានទូតខ្មែរប្រចាំទីក្រុងបាងកកប្រទេសថៃ ទទួលបានញត្តិចំនួនពីរពីក្រុមបាតុករដែលជាសាច់ញាតិ និងអ្នកគាំទ្រលោក វ៉ាន់ឆាឡឺម ជុំវិញករណីបាត់ខ្លួនបុរសជនជាតិថៃរូបនេះ។
លោកបន្តថា កម្ពុជាទើបតែបានទទួលកំណត់ទូតជាផ្លូវការពីសំណាក់ស្ថានទូតថៃកាលពីម្សិលមិញ ដើម្បីស្នើសុំឱ្យអាជ្ញាធរកម្ពុជាស៊ើបអង្កេតរឿងនេះ។
លោក កុយ គួង ប្រាប់ថា ៖ «ទើបតែថ្ងៃនេះ [ថ្ងៃទី០៨ ខែមិថុនា] ក្រសួងបានទទួលកំណត់ទូតពីស្ថានទូតថៃនៅទីក្រុងភ្នំពេញ សាកសួរពីបញ្ហានេះពីព័ត៌មានដែលផ្សាយថា មានបុរសថៃម្នាក់ត្រូវបានចាប់ខ្លួននៅភ្នំពេញនេះ។ ក្រសួងការបរទេសបានបញ្ជូនរឿងនេះទៅស្ថាប័នពាក់ព័ន្ធរួចហើយ។ កន្លងមក យើងបានដឹងត្រឹមតែព័ត៌មានតាមប្រព័ន្ធផ្សព្វផ្សាយប៉ុណ្ណោះ»។
ទាក់ទងនឹងបញ្ហានេះ អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ថ្លែងដោយខ្លីប្រាប់វីអូឌីថា កម្លាំងនគរបាលត្រូវស៊ើបអង្កេតជាមុនសិនថា ព័ត៌មានស្ដីពីការចាប់ខ្លួននោះជាព័ត៌មានពិត ឬអត់។
លោក ឆាយ គឹមខឿន៖ «យើងកំពុងបើកការស៊ើបអង្កេតអូន! ប៉ុន្តែ មិនមែនស៊ើបអង្កេតរឿងចាប់ហ្នឹងទេ តែស៊ើបអង្កេតថា ព័ត៌មានហ្នឹងពិតកម្រិតណា មិនពិតកម្រិតណា»។
វីអូឌីមិនអាចទាក់ទងអ្នកនាំពាក្យក្រសួងមហាផ្ទៃ លោក ខៀវ សុភ័គ ដើម្បីបំភ្លឺបន្ថែមពីបញ្ហានេះលម្អិតនៅឡើយទេ។
ទោះជាយ៉ាងណាក្ដី ស្ថាប័នព័ត៌មាន ហ្វ្រែសញូយ៍ (Fresh News) បានផ្សាយដោយស្រង់ប្រសាសន៍លោក ខៀវ សុភ័គ ដែលបានអះអាងថា លោក វ៉ាន់ឆាឡឺម បានចេញពីកម្ពុជាតាំងពីឆ្នាំ២០១៧មកម្ល៉េះ។
មន្ត្រីជាន់ខ្ពស់ក្រសួងមហាផ្ទៃរូបនេះថែមទាំងស្នើឱ្យសាក្សីដែលឃើញហេតុការណ៍ចាប់ខ្លួននេះ ចេញមកផ្ដល់ព័ត៌មានជូនសមត្ថកិច្ចទៀតផង។
សមាជិកសភាអាស៊ានដើម្បីសិទ្ធិមនុស្ស បានចេញសេចក្ដីថ្លែងការណ៍មួយកាលពីថ្ងៃទី០៨ ខែមិថុនា ដោយស្នើឱ្យអាជ្ញាធរកម្ពុជាបើកការស៊ើបអង្កេតករណីចាប់ពង្រាត់អ្នកទោសនយោបាយថៃដែលបាននិរទេសខ្លួនមករស់នៅកម្ពុជានេះ។
ប្រធានក្រុមសមាជិកសភាអាស៊ានដើម្បីសិទ្ធិមនុស្ស និងជាសមាជិកសភាម៉ាឡេស៊ី លោក ឆាលស៍ សាន់ទីអាហ្គោ (Charles Santiago) លើកឡើងក្នុងសេចក្ដីប្រកាសព័ត៌មាននៅថ្ងៃនេះថា ហេតុការណ៍ចាប់ពង្រាត់សកម្មជននយោបាយថៃក្នុងប្រទេសកម្ពុជាដោយគ្មានញញើតនេះជារឿងគួរឱ្យព្រួយបារម្ភបំផុត។ ការណ៍ដែលរដ្ឋាភិបាលប្រទេសក្នុងតំបន់អាស៊ានបណ្ដោយឱ្យរឿងបែបនេះកើតឡើងក្នុងប្រទេសខ្លួន ជាការប្រែក្លាយតំបន់អាស៊ានជាឋានសួគ៌របស់ជនផ្ដាច់ការគ្មានទីបញ្ចប់។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ស្នើឱ្យអាជ្ញាធរកម្ពុជាស៊ើបអង្កេតករណីនេះដោយតម្លាភាព ដើម្បីធានាថា កម្ពុជាជាប្រទេសមានច្បាប់ និងគោរពច្បាប់។
លោក ស៊ឹង សែនករុណា លើកឡើងថា៖ «បើសិនជាមិនធ្វើការស្រាវជ្រាវទេ កម្ពុជានឹងរងការរិះគន់ពីសហគមន៍អន្តរជាតិ រួមទាំងជនជាតិថៃដែលគេស្រលាញ់ប្រជាធិបតេយ្យផង ហើយអន្តរជាតិគេនឹងសម្លឹងមកកាន់កម្ពុជាថា ជាប្រទេសដែលមិនមានសុវត្ថិភាព»។
លោក វ៉ាន់ឆាឡឺម សាតស័ក្តិសិទ្ធ គឺជាសកម្មជនគាំទ្រប្រជាធិបតេយ្យសំខាន់ម្នាក់ ដែលជាប់ពាក់ព័ន្ធក្រុមប្រឆាំងរបបផ្តាច់ការ។ លោកបានភៀសខ្លួនមករស់នៅកម្ពុជា ក្រោយរដ្ឋប្រហារយោធាក្នុងឆ្នាំ២០១៤ រួចបន្តសកម្មភាពនយោបាយរិះគន់រដ្ឋាភិបាលថៃថ្មីតាមបណ្តាញសង្គម។
កាសែត Bangkok Post រាយការណ៍កាលពីថ្ងៃទី០៨ ខែមិថុនា ថា ចាប់ពីក្រោយរដ្ឋប្រហារឆ្នាំ២០១៤មក យ៉ាងយោចណាស់ សកម្មជនថៃ ៨នាក់ បានរត់ភៀសខ្លួនទៅកាន់ប្រទេសឡាវ កម្ពុជា និងវៀតណាម ។
ប្រភពដដែលបន្ថែមថា លោក វ៉ាន់ឆាឡឺម សាតស័ក្តិសិទ្ធ គឺស្ថិតនៅក្នុងចំណោមសកម្មជននិរទេសខ្លួន ២៩នាក់ ដែលរងបទចោទប្រមាថព្រះមហាក្សត្រថៃ។
ក្រុមសមាជិកសភាអាស៊ានដើម្បីសិទ្ធិមនុស្ស បានកត់សម្គាល់ក្នុងសេចក្ដីថ្លែងការណ៍របស់ខ្លួនផងដែរថា អាជ្ញាធរថៃ វៀតណាម កម្ពុជា និងម៉ាឡេស៊ី សុទ្ធតែរងការចោទប្រកាន់ថា បានចាប់បញ្ជូនអ្នករិះគន់របបដឹកនាំខ្លួនទៅកាន់ប្រទេសកំណើតវិញ។
សេចក្ដីថ្លែងការណ៍ដដែលបានលើកឡើងករណីអ្នកសរសេរប្លុកជនជាតិវៀតណាមដែលត្រូវបានបាត់ខ្លួនកណ្ដាលទីក្រុងបាងកក ប្រទេសថៃ នៅផ្សារទំនិញមួយកន្លែង។
ប៉ុន្មានខែក្រោយមក នៅឆ្នាំដដែល ជនជាតិថៃបីនាក់ដែលនិរទេសខ្លួនរស់នៅវៀតណាម ត្រូវបានរាយការណ៍ថា ត្រូវបានគេចាប់ខ្លួន។ បីខែក្រោយមក គឺអំឡុងខែមករាឆ្នាំ២០២០ មនុស្ស ២នាក់ក្នុងចំណោមនោះ ត្រូវបានរកឃើញថាស្លាប់នៅតាមដងទន្លេមេគង្គជាប់នឹងប្រទេសឡាវ។
ប្រធានក្រុមសមាជិកសភាអាស៊ានដើម្បីសិទ្ធិមនុស្ស លោក ឆាលស៍ សាន់ទី អាហ្គោ មានប្រសាសន៍ថា៖ «ការកើនឡើងនូវនិន្នាការនៃការដោះដូរអ្នកនយោបាយប្រឆាំងរវាងរដ្ឋាភិបាលនៃប្រទេសក្នុងតំបន់អាស៊ាន ជារឿងអាក្រក់បំផុត»៕
