រដ្ឋសភាជាតិនៅថ្ងៃនេះ បានសម្រេចអនុម័តទាំងស្រុងដោយគ្មានការកែប្រែអ្វីនោះឡើយនូវច្បាប់ប្រឆាំងការលាងលុយកខ្វក់ ខណៈដែលប្រទេសនេះត្រូវបានដាក់បញ្ចូលក្នុងបញ្ជីប្រផេះនៃក្រុមប្រទេសមានចរន្តនៃការលាងលុយកខ្វក់។
សេចក្ដីព្រាងច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ត្រូវបានរដ្ឋាភិបាលអនុម័តរួចរាល់កាលពីពាក់កណ្ដាលខែឧសភាកន្លងមក ហើយបានបញ្ជូនទៅរដ្ឋសភាពិនិត្យកាលពីថ្ងៃទី១៩ ខែឧសភា។
មុននឹងនាំយកទៅដាក់ឱ្យអនុម័ត សេចក្ដីព្រាងច្បាប់នេះ ត្រូវបានត្រួតពិនិត្យដោយគណៈកម្មការមហាផ្ទៃការពារជាតិ និងមុខងារសាធារណៈ ដែលដឹកនាំដោយសមាជិកសភា លោក ហ៊ុន ណេង បងប្រុសបង្កើតរបស់លោកនាយករដ្ឋមន្ត្រី ហ៊ុន សែន។
លោក ហ៊ុន ណេង ដែលជាតំណាងរាស្ត្រមណ្ឌលកំពង់ចាមផងនោះ បានថ្លែងក្នុងអង្គប្រជុំថា សេចក្ដីព្រាងច្បាប់នេះ គឺជាច្បាប់ក្របខណ្ឌការពារសុច្ចរិតភាពនៃប្រព័ន្ធហិរញ្ញវត្ថុកម្ពុជា ក្នុងការទប់ស្កាត់ការប្រើប្រាស់ប្រព័ន្ធហិរញ្ញវត្ថុដោយអ្នកសម្អាតប្រាក់។
លោក ហ៊ុន ណេង ថ្លែងថា៖ «ការពារសុច្ចរិតភាពនៃប្រព័ន្ធហិរញ្ញវត្ថុកម្ពុជា ក្នុងការទប់ស្កាតការប្រើប្រាស់ប្រព័ន្ធហិរញ្ញវត្ថុដោយអ្នកសម្អាតប្រាក់ និងទ្រព្យដែលទទួលបានពីសកម្មភាពខុសច្បាប់ រួមទាំងជំរុញប្រសិទ្ធភាពនៃការអនុវត្តនៃការលើកកម្ពស់កិច្ចសហការ សហប្រតិបត្តិការល្អរវាងរដ្ឋមួយទៅរដ្ឋមួយ ក្នុងការបង្ការរារាំង និងបង្ក្រាបចំពោះការផ្ដល់ហិរញ្ញប្បទានដល់ភេរវកម្ម រួមនិងបទល្មើសផ្សេងទៀតដែលកំពុងគំរាមកំហែងសេដ្ឋកិច្ច និងសង្គមនៅកម្រិតជាតិ តំបន់ និងសកលលោក»។
សេចក្ដីព្រាងច្បាប់នេះ ត្រូវបានអនុម័តទាំងស្រុងក្នុងកិច្ចប្រជុំរដ្ឋសភានៅព្រឹកថ្ងៃនេះ ដែលមានការចូលរួមពីសមាជិកសភា ១១៨រូប សុទ្ធតែមកពីគណបក្សប្រជាជនកម្ពុជានោះ។
រដ្ឋមន្ត្រីក្រសួងមហាផ្ទៃ លោក ស ខេង ដែលបានដឹកនាំមន្ត្រីការពារសេចក្ដីព្រាងច្បាប់នេះ បានថ្លែងថា សេចក្ដីព្រាងច្បាប់នេះ ត្រូវបានពិនិត្យយ៉ាងល្អិតល្អន់ដោយគណៈកម្មការជំនាញរបស់រដ្ឋសភា។
លោក ស ខេង ថ្លែងថា៖ «ខ្ញុំសម្ដែងអំណរគុណយ៉ាងជ្រាលជ្រៅផងដែរ ចំពោះគណៈកម្មការជំនាញនៃរដ្ឋសភា រួមមាន គណៈកម្មការមហាផ្ទៃការពារជាតិ និងមុខងារសាធារណៈ និងគណៈកម្មការសេដ្ឋកិច្ចហិរញ្ញវត្ថុ ធនាគារ និងសវនកម្ម ដែលបានពិនិត្យ និងពិភាក្សាយ៉ាងល្អិតល្អន់សេចក្ដីព្រាងច្បាប់ទាំងពីរនេះ ហើយក៏ថ្លែងអំណរគុណជ្រាលជ្រៅចំពោះពិធីទាំងមូលដែលបានអនុម័ត ដើម្បីយកច្បាប់នេះមកពិភាក្សាក្នុងពេលបន្តិចទៀតនេះ»។
សេចក្ដីប្រកាសព័ត៌មានរដ្ឋអគ្គលេខាធិការដ្ឋានរដ្ឋសភានៅថ្ងៃនេះ បានឱ្យដឹងថា សេចក្ដីព្រាងច្បាប់នេះស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម មាន ៩ជំពូក និង ៤៧មាត្រា។
អ្នកនាំពាក្យរដ្ឋសភា លោក ឡេង ប៉េងឡុង ថ្លែងប្រាប់បន្ថែមថា កម្ពុជានឹងត្រូវបានក្រុមការងារសកម្មភាពហិរញ្ញវត្ថុ ដកចេញពីបញ្ជីប្រផេះវិញ បន្ទាប់ពីកម្ពុជាធ្វើតាមសំណើចំនួន ១៤ចំណុច ដែលក្រុមការងារសកម្មភាពហិរញ្ញវត្ថុបានកំណត់ឱ្យអនុវត្តនោះ។
លោក ឡេង ប៉េងឡុង ប្រាប់ថា៖ «ឥលូវ យើងតម្រូវតាមលក្ខខណ្ឌរបស់គេគ្រប់អស់ហើយ។ ដូច្នេះ ខ្ញុំសង្ឃឹមថា ក្រោយពីអនុម័តហ្នឹងទៅ ប្រទេសកម្ពុជានឹងរួចផុតពីបញ្ជីប្រផេះហ្នឹង។ ដំបូងឡើយ គេឱ្យយើងធ្វើច្បាប់ហ្នឹងឱ្យបានចុងខែឧសភាហ្នឹង ដល់មានកូវីដ១៩ទៅ ក៏បន្តមកខែមិថុនា»។
ការអនុម័តសេចក្ដីព្រាងច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ធ្វើឡើងបន្ទាប់ពីអង្គការឃ្លាំមើលការលាងលុយកខ្វក់អន្តរជាតិ ឈ្មោះថា ក្រុមការងារសកម្មភាពហិរញ្ញវត្ថុបានដាក់កម្ពុជាក្នុងបញ្ជីពណ៌ប្រផេះរបស់ខ្លួនជាលើកទី២នៅពីឆ្នាំ២០១៩។
រដ្ឋលេខាធិការក្រសួងមហាផ្ទៃ លោក ងី ច័ន្ទ្រផល មានប្រសាសន៍ថា កម្ពុជាបានអនុវត្តទៅផែនការសកម្មភាព ១៤ចំណុចដែលក្រុមការងារសកម្មភាពហិរញ្ញវត្ថុដាក់ឱ្យកម្ពុជាអនុវត្ត ប៉ុន្តែ ចំពោះការសម្រេចដកកម្ពុជាចេញពីបញ្ជីប្រផេះឬអត់នោះ លោកថា អាស្រ័យលើក្រុមការងារសកម្មភាពហិរញ្ញវត្ថុជាអ្នកសម្រេច។
លោក ងី ច័ន្ទ្រផល ប្រាប់ថា៖ «យើងទុកឱ្យគេពិចារណាទៅ យើងមិនអាចទៅនិយាយបានទេ ដក ឬមិនដកជារឿងរបស់គេទេ ព្រោះគេជាអ្នកសម្រេច មិនមែនយើងទេ ប៉ុន្តែ ខ្លួនយើងជាប្រទេសអធិបតេយ្យមួយ ជាសមាជិកមួយ ត្រូវតែអនុវត្តតាម។ ឥលូវនេះ ទុកឱកាសឱ្យនីតិប្បញ្ញត្តិ គាត់ធ្វើដំណើរការបស់គាត់ ហើយរដ្ឋាភិបាលនឹងធ្វើបន្តទៀតពេលណាមានការអនុវត្ត»។
ការអនុម័តសេចក្ដីព្រាងច្បាប់នេះ កើតឡើងជិត ១ខែក្រោយពីសហភាពអឺរ៉ុបបានស្នើដាក់ប្រទេសកម្ពុជាទៅក្នុងបញ្ជីនៃប្រទេសមានហានិភ័យខ្ពស់សម្រាប់ឧក្រិដ្ឋកម្មហិរញ្ញវត្ថុអន្តរជាតិ។
ប្រធានអង្គការតម្លាភាពកម្ពុជា លោក ប៉ិច ពិសី ចាត់ទុកការអនុវត្តតាមសំណើរបស់ក្រុមការងារសកម្មភាពហិរញ្ញវត្ថុនេះ ជាសញ្ញាវិជ្ជមាន ប៉ុន្តែ លោកថា ដើម្បីឱ្យប្រទេសកម្ពុជារួចផុតពីការដាក់នៅក្នុងបញ្ជីប្រផេះ កម្ពុជាត្រូវអនុវត្តអនុសាសន៍ផ្សេងទៀត ជាពិសេសការអនុវត្តច្បាប់ជាក់ស្ដែងទៅលើបទល្មើសដែលអាចកើតឡើងនៅក្នុងប្រទេសកម្ពុជា។
លោក ប៉ិច ពិសី ប្រាប់ថា៖ «ជាពិសេសទាក់ទងនឹងការអនុវត្តច្បាប់ជាក់ស្ដែងទៅលើបទល្មើសដែលអាចកើតមាននៅក្នុងប្រទេសយើងហ្នឹង ទើបយើងរួចផុតពីការដាក់ប្រទេសយើងនៅក្នុងបញ្ជីដែលមានហានិភ័យខ្ពស់ផ្នែកហិរញ្ញប្បទានភេរវកម្ម ហើយនិងការសម្អាតប្រាក់នេះ។ អ៊ីចឹងខ្ញុំលើកទឹកចិត្តឱ្យខាងរដ្ឋាភិបាលពិនិត្យទៅលើអនុសាសន៍ដទៃទៀត ដែលខាងអង្គការ Financial Action Task Force ហើយនិងសហភាពអឺរ៉ុបដាក់ជូនប្រទេសកម្ពុជាយើង ដោយមានកិច្ចសហប្រតិបត្តិការជាមួយអន្តរក្រសួងក្ដី ជាពិសេសរដ្ឋធនាគារជាតិកម្ពុជា ហើយនិងអង្គភាពប្រយុទ្ធប្រឆាំងលាងលុយកង្វក់ហ្នឹង»។
លោក ប៉ិច ពិសី បន្តថា ប្រសិនបើកម្ពុជានៅតែត្រូវបានក្រុមការងារសកម្មភាពហិរញ្ញវត្ថុអន្តរជាតិដាក់ក្នុងបញ្ជីប្រផេះនោះ លោកថា នឹងប៉ះពាល់ដល់សេដ្ឋកិច្ច និងកេរិ៍្តឈ្មោះកម្ពុជា ហើយអាចឈានទៅដល់ប៉ះពាល់ផ្នែកនយោបាយ។
កម្ពុជាត្រូវបានអង្គការឃ្លាំមើលការលាងលុយកខ្វក់អន្តរជាតិដាក់ចូលក្នុងបញ្ជីប្រផេះកាលពីឆ្នាំ២០១១ ហើយអង្គការនេះបានដកកម្ពុជាពីបញ្ជីនេះវិញនៅឆ្នាំ២០១៥។ ប៉ុន្តែ កាលពីថ្ងៃទី២១ ខែកុម្ភៈ ឆ្នាំ២០១៩ អង្គការឃ្លាំមើលការលាងលុយកខ្វក់អន្តរជាតិ បានដាក់កម្ពុជាក្នុងបញ្ជីពណ៌ប្រផេះរបស់ខ្លួនជាថ្មីម្ដងទៀត ដោយនឹងត្រួតពិនិត្យមើលលើលំហូរហិរញ្ញវត្ថុ វិនិយោគ និងពាណិជ្ជកម្ម ចេញ និងចូលប្រទេសកម្ពុជា៕