ក្រសួងការបរទេសកម្ពុជា បានកោះហៅឯកអគ្គរដ្ឋទូតវៀតណាមប្រចាំនៅកម្ពុជា មកបំភ្លឺពាក់ព័ន្ធនឹងរឿងយោធាវៀតណាមបោះតង់ចំនួន ៣១កន្លែងនៅតំបន់ព្រំដែនមិនទាន់ឯកភាពគ្នា ស្ថិតនៅក្នុងខេត្តកណ្តាល។
ការហៅមកបំភ្លឺនេះ ធ្វើឡើងបន្ទាប់ភាគីកម្ពុជាផ្ញើកំណត់ទូតទៅវៀតណាមកាលពីថ្ងៃទី១៣ ខែឧសភា ឆ្នាំ២០២០ ដោយស្នើឱ្យវៀតណាមរុះរើតង់ឱ្យបានឆាប់ ចេញពីតំបន់មិនទាន់ឯកភាពគ្នាស្ថិតក្នុងស្រុកលើកដែក និងស្រុកកោះធំ ខេត្តកណ្តាល។
ក្នុងសេចក្ដីប្រកាសព័ត៌មានកាលពីថ្ងៃម្សិលមិញនេះ ក្រសួងការបរទេសកម្ពុជា ឱ្យដឹងថា ក្រសួងបានកោះហៅឯកអគ្គរដ្ឋទូតវៀតណាមប្រចាំនៅកម្ពុជា លោក Vu Quang Minh មកសាកសួរពាក់ព័ន្ធនឹងរឿងយោធាវៀតណាមបោះតង់ចំនួន ៣១កន្លែងនៅតំបន់ព្រំដែនមិនទាន់ឯកភាពគ្នា ស្ថិតនៅខេត្តកណ្តាល។
ក្រៅពីការសួរនាំនោះ ក្រសួងថា កម្ពុជាបានស្នើទៅអគ្គរដ្ឋទូតវៀតណាមរុះរើតង់ឱ្យបានឆាប់ ហើយបន្តរក្សាស្ថានភាពដើមមិនកែប្រែ រហូតដល់គណៈកម្មការព្រំដែននៃប្រទេសទាំងពីរ ដោះស្រាយកំណត់ខ្សែព្រំដែនជាក់លាក់ជាស្ថាពរ ដើម្បីប្រែក្លាយតំបន់ព្រំដែនប្រកបដោយសន្តិភាព មិត្តភាព សហប្រតិបត្តិការ និងការអភិវឌ្ឍជាប្រយោជន៍រួមសម្រាប់ប្រជាជននៃប្រទេសទាំងពីរ។
កាលពីថ្ងៃទី១៨ ខែមីនា ឆ្នាំ២០២០ យោធាវៀតណាមបានបោះតង់ចំនួន ៣១កន្លែងនៅតំបន់មិនទាន់ឯកភាពគ្នាតាមបណ្តោយព្រំដែនកម្ពុជា-វៀតណាម ស្ថិតក្នុងស្រុកលើកដែក និងស្រុកកោះធំ ខេត្តកណ្តាល ទល់នឹងខេត្តអានយ៉ាង ប្រទេសវៀតណាម ក្រោមហេតុផលថា ដើម្បីទប់ស្កាត់ជំងឺកូវីដ១៩ តាមច្រករបៀងព្រំដែន។
ប៉ុន្តែ ក្នុងសន្និសីទសារព័ត៌មានកាលពីថ្ងៃទី២៨ ខែឧសភា ឆ្នាំ២០២០ អភិបាលខេត្តកណ្ដាល លោក គង់ សោភ័ណ្ឌ អះអាងថា តង់ ៣១កន្លែង ដែលភាគីវៀតណាមបានបោះនោះ វៀតណាមទើបរុះរើបាន ៩កន្លែងប៉ុណ្ណោះ នៅសល់ ២២កន្លែងទៀត មិនទាន់បានរុះរើនៅឡើយ៕
