ក្រុមប្រឹក្សាឃ្លាំមើលកម្ពុជា អំពាវនាវទៅរដ្ឋាភិបាលឱ្យផ្អាកគម្រោងសាងសង់ស្ដូបមិត្តភាពកម្ពុជា-វៀតណាម ឬស្ដូបអនុស្សាវរីយ៍នៃនយោបាយឈ្នះៗនៅតាមរាជធានី-ខេត្ត ដោយបារម្ភថា ស្តូបនេះបង្ហាញរូបភាពកម្ពុជាចុះខ្សោយក្លាយជារដ្ឋចំណុះឱ្យប្រទេសជិតខាង។
ក្នុងសេចក្ដីថ្លែងការណ៍ជំទាស់គម្រោងសាងសង់បន្ថែមនូវស្ដូបមិត្តភាពកម្ពុជា-វៀតណាម ចុះថ្ងៃទី១ ខែមិថុនា ឆ្នាំ២០២០ ហៅការបន្តសាងសង់ស្ដូបវៀតណាមនៅខេត្តកោះកុង ឧត្តរមានជ័យ ប៉ៃលិន និងកំពង់ស្ពឺ នោះថា ជាការធ្វើឱ្យវៀតណាមបន្តមើលស្រាល ឬបន្ទាបបន្ថោកដល់ការដឹកនាំរបស់រដ្ឋាភិបាលបច្ចុប្បន្ន។
ក្រុមប្រឹក្សាឃ្លាំមើលកម្ពុជា ឱ្យដឹងថា រដ្ឋាភិបាលវៀតណាមបានបញ្ជាឱ្យទាហានរបស់ខ្លួនបោះតង់ចំនួន ១១៤កន្លែង ស្ថិតនៅខេត្តពីរ ក្នុងនោះ វៀតណាមបោះតង់ចូលខេត្តកណ្ដាលចំនួន ៣១កន្លែង និងនៅខេត្តតាកែវចំនួន ៨៣កន្លែង ដោយមិនព្រមរុះរើចេញវិញ ទោះបីជាកម្ពុជាបានធ្វើលិខិតតវ៉ាទៅវៀតណាមរួចហើយក៏ដោយ។
ក្រុមប្រឹក្សាឃ្លាំមើលកម្ពុជា៖ «សូមប្រឆាំងជំទាស់ដាច់អហង្ការចំពោះគម្រោងណាមួយរបស់ក្រសួងការពារ និងលោក ហ៊ុន សែន ក្នុងការសាងសង់នូវស្ដូបវៀតណាម ឬស្ដូបអនុស្សាវរីយ៍នៃនយោបាយឈ្នះៗ ក្នុងន័យលើកទឹកចិត្តវៀតណាម និងរំលឹកនូវការដឹងគុណវៀតណាមកាលពី ៤០ឆ្នាំមុន។ ការលើកទឹកចិត្តក្ដី និងការដឹងគុណក្ដី សុទ្ធតែធ្វើឱ្យវៀតណាមបន្តមើលស្រាល ឬបន្ទាបបន្ថោកដល់ការដឹកនាំរបស់រដ្ឋាភិបាលលោក ហ៊ុន សែន កាន់តែហួសហេតុឡើង»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ការដែលកម្ពុជាសង់ស្ដូបមិត្តភាពកម្ពុជា-វៀតណាមនៅគ្រប់ខេត្តនោះ លោកថា ដើម្បីរំលឹកគុណដល់កងទ័ពវៀតណាមដែលបានជួយរំដោះកម្ពុជា។
លោកថា៖ «នេះជាតឹកតាំងប្រវត្តិសាស្ត្រមួយមិនអាចបំភ្លេចបាន ព្រោះគ្មានអីថ្លៃជាងជីវិតទេ។ឪពុកម្ដាយក្មួយដែលឆ្លងកាត់របបប្រល័យពូជសាសន៍ ក្មួយអាចសួរគាត់ បើគាត់នៅ គាត់ដឹងហេតុអីរំដោះថ្ងៃ៧មករាហើយ យើងចាត់ទុកជាជីវិតទី២របស់យើង។ សង់ស្ដូបអនុស្សាវរីយ៍កម្ពុជាវៀតណាមដើម្បីអី? អាហ្នឹងដូចខ្ញុំជម្រាបមិញអ៊ីចឹង ក្នុងនាមយើងជាពុទ្ធសាសនិក។ ដូចខ្លួនខ្ញុំផ្ទាល់ រៀងរាល់ម៉ោងបែរបន់ពីណាមកជួយ បើមិនអ៊ីចឹង ត្រូវគេយកទៅវាយចោល អ្នកណាមកជួយក៏ដោយ និយាយឱ្យសាមញ្ញទៅ សុខចិត្តលាងអាចម៍ឱ្យគេមួយជីវិតក៏បានដែរ ឱ្យតែរស់»។
បើតាមអ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថា ថវិកាដែលសាងសង់ស្តូបមិត្តភាពកម្ពុជា-វៀតណាម មិនមែនជាថវិការបស់រដ្ឋទាំងអស់ទេ ដោយលោកបញ្ជាក់ថា ថវិកានោះបានមកពីសប្បុរសជនដែលរួចផុតពីរបបប្រល័យពូជសាសន៍ និងរដ្ឋាភិបាលវៀតណាមមួយផ្នែក។
ប្រធានរាជបណ្ឌិត្យសភាកម្ពុជា លោក សុខ ទូច មានប្រសាសន៍ថា ការសង់ស្ដូបនេះ ដើម្បីជានិមិត្តរូបសម្រាប់បញ្ជាក់ថា ក្នុងឆ្នាំ១៩៧៩ វៀតណាមបានមកជួយរំដោះកម្ពុជាចេញពីរបបប្រល័យពូជសាសន៍។
លោកថា៖ «ពីឆ្នាំ១៩៧៩ វៀតណាមមកដល់ហ្នឹង ទ័ពមករំដោះហ្នឹង អាហ្នឹងជាប្រវត្តិសាស្ត្រ។ យើងកុំមើលតែមួយចំហៀង ហើយបិទភ្នែកមួយចំហៀង។ ម្នាក់ៗសុទ្ធតែអស្ចារ្យ ប៉ុន្តែបានរៀបចំអីសម្រាប់ខ្មែរទេ ពូកែណាស់! ខ្ញុំគ្រាន់តែលឺយុវជននិយាយស្នេហាជាតិ មោទនភាពជាតិខ្មែរ ស៊ីបន្លែគេ ស៊ីសាច់គេ ផឹកទឹកគេ ផឹកស្រាគេ។ ពូកែតែបបូរមាត់ ជូតក្បាលក្រមាដើរទៅព្រំដែន មិនដឹងព្រំដែន មិនដឹងផែនទីអីនៅណាទេ»។
បើតាមប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត បន្ថែមលើសេចក្តីថ្លែងការណ៍ថា ការបន្តសាងសង់ស្ដូបមិត្តភាពកម្ពុជា-វៀតណាម នៅទូទាំងរាជធានី-ខេត្តនៃប្រទេសកម្ពុជា បង្ហាញឱ្យឃើញថា រដ្ឋាភិបាលកំពុងស្ថិតចំណុះឱ្យប្រទេសជិតខាង។
លោកថា៖ «សម្រាប់ជាប្រយោជន៍ តើយើងខំក៏សាងសង់ស្ដូបហ្នឹងដល់ទៅ ២៤ ទៅ ២៥ខេត្ត-ក្រុង ហើយយើងសង់បន្ថែមស្ដូបអនុស្សាវរីយ៍ឈ្នះៗធ្វើអីទៀត? រឿងហ្នឹងជារឿង ៤០ឆ្នាំមុន ហើយយើងនៅបន្តអរគុណវៀតណាមដល់ណាទៀត? ខណៈពេលដែលវៀតណាមបន្តរំលោភឈ្លានពានបូរណភាពទឹកដីកម្ពុជា បញ្ជូនជនអន្តោប្រវេសន៍របស់ខ្លួននៅកម្ពុជា ហើយយើងនៅតែផ្ដល់ឱកាស នៅតែផ្ដល់សិទ្ធិឱ្យគេ…»។
តាមសារព័ត៌មាន Vietnam News បានឱ្យដឹងថា កាលពីឆ្នាំ២០១៧ រដ្ឋាភិបាលវៀតណាមបានចំណាយលុយចំនួន ៧លាន ៨សែនដុល្លារ សម្រាប់ជួសជុល និងកែលម្អស្តូបមិត្តភាព កម្ពុជា-វៀតណាម នៅលើទឹកដីកម្ពុជាចំនួន១៧៕
