តំណាងកម្មកររោងចក្រមួយស្ថិតក្នុងតំបន់សេដ្ឋកិច្ចពិសេសក្នុងក្រុងបាវិត នៅតែមិនទាន់ត្រូវបានភាគីថៅកែរោងចក្រទទួលយកចូលធ្វើការងារវិញនៅឡើយទេ បើទោះបីជាមន្ទីរការងារខេត្តស្វាយរៀង បានសម្រេចបង្គាប់ឱ្យទទួលយកតំណាងកម្មករចូលធ្វើការវិញតាំងចុងខែមីនាក្ដី។
កម្មករ ង៉ាន់ ព្រីង ធ្វើការផ្នែកអ៊ុតនៅរោងចក្រ ស័ង លី (ខេមបូឌា) ស្ថិតក្នុងតំបន់សេដ្ឋកិច្ចពិសេស សានតុង ខេត្តស្វាយរៀង និយាយថា កាលពីថ្ងៃទី៣០ ខែឧសភា កម្មករប្រហែលជា ៥០នាក់ បានធ្វើកូដកម្មនៅរោងចក្រ ដើម្បីទាមទារឱ្យថៅកែទទួលយកអ្នកនាង ឌី ភ័ស្ត ចូលធ្វើការងារវិញ ប៉ុន្តែ ថៅកែរោងចក្រច្រានចោលការទាមទារនេះ។ កម្មកររូបនេះ បានអំពាវនាវនៅថ្ងៃនេះ ទៅថៅកែរោងចក្រ ឱ្យទទួលយកតំណាងពួកគេចូលធ្វើការងារវិញ ដោយគ្មានលក្ខខណ្ឌ ពីព្រោះគាត់មិនបានធ្វើខុសដូចការចោទប្រកាន់នោះទេ។
លោក ង៉ាន់ ព្រីង ប្រាប់ថា៖ «ទាមទារឱ្យខាងក្រុមហ៊ុនជួយយកលោកស្រី ឌី ភ័ស្ត ចូលធ្វើការងារវិញ ដោយសារគាត់អត់មានកំហុសអ្វីទេ ហើយក្រុមហ៊ុនព្យួរការងារគាត់ដោយអត់គិតប្រាក់ឈ្នួលឱ្យគាត់អញ្ចឹង»។
អ្នកស្រី ឌី ភ័ស្ត អាយុ ២៥ឆ្នាំ ជាកម្មការិនីផ្នែកវេចខ្ចប់ និងជាអនុប្រធានសហជីពចលនាកម្មករប្រចាំនៅរោងចក្រ ស័ង លី ជារោងចក្រកាត់ដេរស្ថិតនៅក្នុងក្រុងបាវិត ខេត្តស្វាយរៀង។
ក្នុងលិខិតចុះថ្ងៃទី១៨ ខែមីនា ឆ្នាំ២០២០ អ្នកស្រី ឌី ភ័ស្ត ត្រូវបានភាគីរោងចក្រសម្រេចព្យួរការងារចាប់ពីថ្ងៃទី១៩ ខែមីនា ដោយចោទថា តំណាងកម្មកររូបនេះ បានកេងយកម៉ោងការងាររបស់ក្រុមហ៊ុនធ្វើជាតំណាងឱ្យតែខ្លួនឯង ឆបោកកម្មករដើម្បីផលប្រយោជន៍ផ្ទាល់ខ្លួន។
ប៉ុន្តែ មន្ទីរការងារ និងបណ្ដុះបណ្ដាលវិជ្ជាជីវៈខេត្តស្វាយរៀង បានចេញសេចក្ដីបង្គាប់កាលពីថ្ងៃទី២៩ ខែមីនាកន្លងមក ឱ្យភាគីរោងចក្រ ស័ង លី ទទួលយកអ្នកស្រី ឌី ភ័ស្ត ចូលធ្វើការវិញ និងតម្រូវឱ្យទូទាត់ប្រាក់ឈ្នួលដល់តំណាងកម្មកររូបនេះផងសម្រាប់រយៈពេលព្យួរនោះ។
មន្ទីរការងារខេត្តស្វាយរៀង បានបង្ហាញការសោកស្ដាយចំពោះសេចក្ដីសម្រេចរបស់ភាគីថៅកែរោងចក្រដែលព្យួរការងារតំណាងកម្មកររូបនេះ ដោយថា អ្នកស្រី ឌី ភ័ស្ត មិនបានប្រព្រឹត្តកំហុសធ្ងន់ធ្ងរនោះឡើយ។
អនុប្រធានសហជីពចលនាកម្មករ អ្នកស្រី ឌី ភ័ស្ត ដែលអះអាងថា កំពុងមានផ្ទៃពោះជិត ៤ខែ និងកំពុងជួបបញ្ហាប្រឈមច្រើនក្នុងជីវភាពគ្រួសារក្រោយពីបាត់បង់ការងារ។
អ្នកនាងអំពាវនាវទៅថៅកែរោងចក្រ ទទួលយកគាត់ចូលធ្វើការងារវិញ និងទូទាត់ប្រាក់ខែអំឡុងពេលព្យួរការងារជាដើម ពីព្រោះរូបគាត់មិនបានធ្វើខុសដូចការចោទប្រកាន់នោះទេ។
ប្រធានមន្ទីរការងារខេត្តស្វាយរៀង លោក អ៊ូ សុខឿន មានប្រសាសន៍ថា ក្រសួងការងារបានកោះហៅឱ្យភាគីទាំងពីរជួបជជែកគ្នាដោះស្រាយបញ្ចប់រឿងផងដែរនៅថ្ងៃស្អែកនេះ។
លោកមានប្រសាសន៍ថា៖ «ខ្ញុំមិនដឹងថា ម៉ោងប៉ុន្មានទេ ប៉ុន្តែ គេណាត់នៅថ្ងៃស្អែក ឱ្យភាគីទាំងពីរជួបគ្នាផ្សះផ្សា។ បើក្រសួងសម្រេច ហើយមិនពេញចិត្តការសម្រេចទេ ហើយក្រុមហ៊ុនគាត់មិនសុខចិត្ត គាត់ប្តឹងទៅតុលាការទៅ។ នៅពេលគេសម្រេចឱ្យចូលធ្វើការវិញ ក្រុមហ៊ុនត្រូវតែរំលឹក [សងប្រាក់ខែខកខានបង់] ដែលមិនបានបើកឱ្យគេ [កម្មករ] រហូតមកហើយ»។
អ្នកស្រី ឌី ភ័ស្ត និយាយថា៖ «អយុត្តិធម៌ហើយ មកចោទប្រកាន់មកលើខ្ញុំទាំងស្រុង ទាំងដែលខ្ញុំមិនបានធ្វើខុសដូចគេចោទប្រកាន់ខ្ញុំ»។
ចំណែក កម្មការិនី សោ ស្រីម៉ៅ ក៏បង្ហាញការសោកស្តាយ នៅពេលថៅកែរោងចក្រព្យួរការងារតំណាងសហជីពរបស់គាត់នៅអំឡុងពេលគាត់មានផ្ទៃពោះ។ កម្មកររូបនោះបញ្ជាក់ថា ចាប់ពីតំណាងសហជីពត្រូវបានថៅកែព្យួរការងារមក ធ្វើឱ្យពួកគេជួបបញ្ហាប្រឈមច្រើននៅក្នុងពេលបំពេញការងារ។
កញ្ញា ស្រីម៉ៅ ប្រាប់ថា៖ «តាំងពីគាត់ចេញទៅ ពួកខ្ញុំនៅខាងក្នុង គេ [អ្នកគ្រប់គ្រងរោងចក្រ] គាបសង្កត់ខ្លាំងដែររឿងការងារ ហើយបង្ខំឱ្យយើងធ្វើការមិនសូវមានពេលវេលា។ គេតាមដានយើងរហូតចំនួនតាមម៉ោង គេកត់តាមម៉ោង យើងហូបទឹកក៏គេរឹតបន្តឹងយើងមិនឱ្យយើងទៅយូរ បន្ទប់ទឹកអីហ្នឹង ក្នុងមួយម៉ោងៗ។ គេបង្ខំយកចំនួន [ការងារដែលធ្វើ] ពីពួកយើង គឺយើងអត់មានសេរីភាព គិតតែខំធ្វើការឱ្យគេ»។
មាត្រា៤៣ នៃច្បាប់ស្តីពីសហជីព ត្រង់កថាខណ្ឌទី៣ ចែងថា បន្ទាប់ពីទទួលបានសេចក្តីសម្រេចនេះ និយោជិត ឬកម្មករនិយោជិត ដែលត្រូវបានបញ្ឈប់ ឬសហជីពរបស់កម្មករនិយោជិតនោះ មានរយៈពេល ២ខែ ដើម្បីតវ៉ាទៅរដ្ឋមន្ត្រីក្រសួងការងារទទួលបន្ទុកវិស័យការងារ អាចលុបចោល ឬកែសម្រួលសេចក្តីសម្រេចរបស់អធិការការងារជាដើម។
វីអូឌីមិនអាចសុំការឆ្លើយបញ្ជាក់ពីភាគីរោងចក្របានទេនៅរសៀលថ្ងៃនេះ។
ប្រធានសហភាពចលនាកម្មករ លោក ប៉ាវ ស៊ីណា ឱ្យដឹងថា ករណីថៅកែរោងចក្រ ស័ង លី កំពុងរំលោភសិទ្ធិសេរីភាពដែលមានចែងក្នុងច្បាប់ស្ដីពីសហជីពដែលតំណាងឱ្យកម្មករកម្មការិនី។
លោក ប៉ាវ ស៊ីណា ប្រាប់ថា៖ «បើយើងនិយាយទៅ ចេតនារបស់រោងចក្រនេះ វាពាក់ព័ន្ធការរើសអើងសេរីភាពសហជីព ក៏ដូចជាការបំពានសេចក្តីអំពាវនាវរបស់មន្ទីរការងារ ក៏ដូចជាអនុសាសន៍របស់រាជរដ្ឋាភិបាល ដែលបានលើកឡើងក្នុងកំឡុងពេលរីករាលដាលនៃជំងឺកូវីដ១៩ មិនត្រូវយកឱកាសហ្នឹង បញ្ឈប់ ឬបញ្ចប់កិច្ចសន្យាការងារទេ»។
លោក ប៉ាវ ស៊ីណា បញ្ជាក់ថា បើថៅកែរោងចក្រនៅតែមិនព្រមទទួលយកតំណាងសហជីពឱ្យចូលធ្វើការងារវិញទេ លោកនឹងជួបជាមួយនឹងស្ថាប័នដៃគូក្រៅស្រុកនាពេលឆាប់ៗនេះ ដើម្បីជួយអន្តរាគមន៍ដោះស្រាយឱ្យផងដែរ។
កាលពីថ្ងៃទី៦ ខែមីនាកន្លងមកនេះ ក្រសួងការងារបានណែនាំទៅថៅកែរោងចក្រទាំងអស់ កុំប្រែក្លាយពីការព្យួរការងារទៅជាការបញ្ចប់កិច្ចសន្យាការងារ និងមានការរើសអើងសហជីព អំឡុងពេលរោងចក្រខ្វះវត្ថុធាតុដើមដោយសារជំងឺកូវីដ១៩ឡើយ ដោយចាត់ការធ្វើបែបនេះជាទង្វើខុសច្បាប់៕
