អតីតសកម្មជនបរិស្ថាន ហ៊ុន វណ្ណៈ ត្រូវបានអាជ្ញាធរខេត្តបន្ទាយមានជ័យឃាត់ខ្លួនជាង ៥ម៉ោង ខណៈដែលយុវជនរូបនោះ ថតរូបភាពអំពីសកម្មភាពរបស់សមត្ថកិច្ចក្រុងប៉ោយប៉ែត ដែលកំពុងពង្រាយកម្លាំងនៅច្រកទ្វារអន្តរជាតិមួយនេះ ស្របពេលដែលប្រជាពលរដ្ឋប្រកាសធ្វើបាតុកម្មនៅថ្ងៃនេះ។
សកម្មជនដីធ្លី អ្នកស្រី ច្រាយ នីម ដែលអះអាងថា បានឃើញហេតុការណ៍នោះ ប្រាប់វីអូឌីថា លោក ហ៊ុន វណ្ណៈ ត្រូវបានសមត្ថកិច្ចក្រុងប៉ោយប៉ែតចាប់ខ្លួននៅម៉ោងប្រមាណជាង ៧ព្រឹក នៅមុខការិយាល័យគយ និងរដ្ឋាករប៉ោយប៉ែត ខណៈដែលយុវជនរូបនេះ យកទូរសព្ទថតសកម្មភាពរបស់សមត្ថកិច្ចដាក់របាំង និងកម្លាំងត្រៀមការពារមិនឱ្យមានការប្រមូលផ្តុំរបស់ប្រជាពលរដ្ឋ។
អ្នកស្រី ច្រាយ នីម ប្រាប់ថា៖ «យើងឃើញអ្នកកាសែតជាច្រើនរបស់រដ្ឋាភិបាល និងប្រជាពលរដ្ឋមួយចំនួនគេថតជាច្រើន ប៉ុន្តែមិនត្រូវសមត្ថកិច្ចឃាត់ឬហៅទៅសួរនាំទេ។ ប៉ុន្តែ ចំពោះ វណ្ណៈ ត្រូវបានគេហៅទៅសាកសួរ ហើយគេចោទអ្នកកាសែតរបស់ទូរទស្សន៍ព្រះអាទិត្យទៅវិញ»។
ពាក់ព័ន្ធករណីនេះ ស្នងការនគរបាលខេត្តបន្ទាយមានជ័យ លោក អាត់ ខែម សុំមិនឆ្លើយទេ ដោយលោកបង្វែរឱ្យទៅសួរស្នងការរងទទួលបន្ទុកផ្នែកព្រហ្មទណ្ឌ លោក សិទ្ធ ឡោះ ប៉ុន្តែ លោក សិទ្ធិ ឡោះ ប្រាប់ថា កំពុងជាប់រវល់ប្រជុំ មិនអាចឆ្លើយបាន។
មន្ត្រីអង្គការលីកាដូ (Licadho) ប្រចាំខេត្តបន្ទាយមានជ័យ លោក អ៊ិន គង់ជិត ដែលចុះឃ្លាំមើលករណីនេះ បញ្ជាក់ថា យុវជន ហ៊ុន វណ្ណៈ ពិតជាត្រូវបានសមត្ថកិច្ចក្រុងប៉ោយប៉ែតចាប់ខ្លួនមែន។
មន្ត្រីសិទ្ធិមនុស្សរូបនេះ មានប្រសាសន៍ថា តាមព័ត៌មានដែលលោកទទួលបានពីស្នងការរង លោក សិទ្ធិ ឡោះ គឺករណីសមត្ថកិច្ចឃាត់ខ្លួនយុវជន ហ៊ុន វណ្ណៈ ដោយសង្ស័យយុវជនរូបនោះ បានធ្វើអត្ថាធិប្បាយតាមរយៈវីដេអូឡាយ មានចរិតញុះញង់ឱ្យពលរដ្ឋតវ៉ា និងអត្ថាធិប្បាយប៉ះពាល់ដល់សមត្ថកិច្ច។
លោក អ៊ិន គង់ជិត បន្ថែមថា៖ «ពេលដែលខ្ញុំអង្គុយជាមួយស្នងការរង សិទ្ធ ឡោះ ហ្នឹង គាត់បញ្ជាក់ថា សង្ស័យការឡាយព័ត៌មានរបស់ ហ៊ុន វណ្ណៈ ហ្នឹងមានការញុះញង់។ អ៊ីចឹងបានជាគាត់អញ្ជើញ ហ៊ុន វណ្ណៈ ហ្នឹងទៅសួរនាំ»។
លោក ហ៊ុន វណ្ណៈ ប្រាប់វីអូឌីនៅរសៀលថ្ងៃនេះថា សមត្ថកិច្ចបានចាប់ខ្លួនលោកនៅម៉ោងជាង ៧ព្រឹក និងដោះលែងវិញនៅម៉ោងជិត ១រសៀល ពោលគឺសមត្ថកិច្ចសាកសួរលោកជាង ៥ម៉ោង។
អតីតសកម្មជនបរិស្ថានរូបនេះ ឱ្យដឹងថា អំឡុងពេលឃាត់ខ្លួននោះ សមត្ថកិច្ចបានព្យាយាមសួរ និងឱ្យលោកឆ្លើយថា លោកជាអ្នកយកព័ត៌មានឱ្យទូរទស្សន៍ព្រះអាទិត្យ ចោទប្រកាន់លោកថា ថតសកម្មភាពសមត្ថកិច្ចដោយគ្មានការអនុញ្ញាត និងព្យាយាមឱ្យលោកផ្តិតមេដៃ និងធ្វើកិច្ចសន្យា ប៉ុន្តែ លោកបដិសេធ។
លោក ហ៊ុន វណ្ណៈ បន្តថា លោកឆ្លើយប្រាប់សមត្ថកិច្ចថា លោកទៅក្រុងប៉ោយប៉ែតនោះ ដើម្បីឃ្លាំមើលខ្លាចមានការតវ៉ារបស់ប្រជាពលរដ្ឋ និងដើម្បីត្រៀមផ្តិតយករូបភាពនៃការតវ៉ានោះតែប៉ុណ្ណោះ។
លោក ហ៊ុន វណ្ណៈ ចាត់ទុកសកម្មភាពសមត្ថកិច្ចឃាត់ខ្លួនលោកថា ជាការគំរាមកំហែងមិនឱ្យពលរដ្ឋផ្សេងទៀតហ៊ានថតរូប ឬក៏ឡាយវីដេអូអំពីសកម្មភាពផ្សេងៗរបស់សមត្ថកិច្ច និងការតវ៉ារបស់ប្រជាពលរដ្ឋ។
អតីតសកម្មជនបរិស្ថានរូបនេះ បន្តថា ក្រោយការសាកសួរជាង ៥ម៉ោង គឺសមត្ថកិច្ចបានដោះលែងលោកវិញ ដោយពុំមានលក្ខខណ្ឌអ្វីនោះទេ។
លោក ហ៊ុន វណ្ណៈ និយាយថា៖ «ខ្ញុំមើលឃើញ វាជាចេតនាដើម្បីគំរាមកំហែងដល់ពួកខ្ញុំដែលជាសកម្មជនសិទ្ធិមនុស្សហ្នឹង កុំឱ្យហ៊ានមកឃ្លាំមើលគេទៀត។ មួយទៀត គេមានចេតនាចង់គំរាមកំហែងដល់ប្រជាពលរដ្ឋទូទៅដែលមានទូរសព្ទនៅដៃហ្នឹង ដែលនៅតំបន់ព្រំដែនដែលជាតំបន់អាចប្រឈមនឹងការតវ៉ាហ្នឹង គឺគេមិនចង់ឱ្យមានការថត ឬឡាយវីដេអូអីទេ ព្រោះជារូបភាពធ្វើឱ្យអាជ្ញាធរទាំងអស់ហ្នឹងអាម៉ាស់មុខ»។
កាលពីថ្ងៃទី២៥ ខែឧសភា ឆ្នាំ២០២០ សមាគមពង្រឹងសេដ្ឋកិច្ចក្រៅប្រព័ន្ធកម្ពុជា បានដាក់លិខិតទៅអភិបាលខេត្តបន្ទាយមានជ័យ ដើម្បីសុំធ្វើបាតុកម្មដោយសន្តិវិធីនៅច្រកទ្វារព្រំដែនអន្តរជាតិក្រុងប៉ោយប៉ែត ចាប់ថ្ងៃទី១ រហូតដល់ថ្ងៃទី៧ ខែមិថុនា។
ក្នុងលិខិតដដែលនេះ បានបញ្ជាក់ថា ការធ្វើបាតុកម្មនោះ គឺទាមទារទៅអាជ្ញាធរឱ្យបើកច្រកព្រំដែនសម្រាប់អ្នកដើរថ្មើរជើង រទេះ ទោចក្រយានយន្ត និងរថយន្ត អាចឆ្លងកាត់តាមច្រកទ្វារព្រំដែនអន្តរជាតិប៉ោយប៉ែត ដើម្បីឱ្យប្រជាពលរដ្ឋចូលទៅលក់ដូរក្នុងខេត្តស្រះកែវប្រទេសថៃបានវិញ ហើយថា ប្រសិនអាជ្ញាធរថៃមិនព្រមបើកទេ បាតុករក៏នឹងស្នើទៅអាជ្ញាធរកម្ពុជាបិទច្រកព្រំដែនប៉ោយប៉ែត ដោយកុំឱ្យរថយន្តថៃចូលមកកម្ពុជាវិញដែរ។
បើតាមសមាគមពង្រឹងសេដ្ឋកិច្ចក្រៅប្រព័ន្ធកម្ពុជា អ្នកដែលចូលរួមបាតុកម្មនោះមានទាំងអាជីវករ អ្នកលក់ដូរទំនិញនៅក្នុងផ្សាររុងក្លឿ កម្មករអូសរទេះ អ្នករត់ម៉ូតូឌុប តាក់ស៊ី ម៉ូតូកង់បី និងអ្នកប្រកបរបរក្រៅប្រព័ន្ធចំនួន ១៥០០នាក់។
បើតាមសកម្មជនដីធ្លី អ្នកស្រី ច្រាយ នីម ដែលចុះឃ្លាំមើលច្រកព្រំដែនប៉ោយប៉ែត អះអាងថា នៅថ្ងៃនេះ អាជ្ញាធរក្រុងប៉ោយប៉ែតបានដាក់ពង្រាយកម្លាំង និងប៉ារ៉ាស់ជាច្រើនកន្លែងនៅច្រកទ្វារអន្តរជាតិមួយនេះ៕