រដ្ឋាភិបាលបានចាប់ផ្តើមដំណើរការផ្តល់ប្រាក់ឧបត្ថម្ភដល់កម្មករ-កម្មការិនី និងបុគ្គលិកក្នុងវិស័យសេវាកម្មដែលព្យួរការងារក្នុងជុំទី១ ខណៈដែលកម្មករមួយចំនួនបានត្អូញត្អែរពីការខ្វះខាតលើការចំណាយ ក្រោយពួកគេត្រូវបានព្យួរការងារដោយមិនទទួលបានប្រាក់ឧបត្ថម្ភ ៤០ដុល្លារពីរដ្ឋាភិបាលភ្លាមៗ។
ក្នុងសេចក្តីជូនដំណឹងចុះថ្ងៃទី២៦ ខែឧសភា ក្រសួងការងារ និងបណ្តុះបណ្តាលវិជ្ជាជីវៈ បានប្រកាសផ្តល់ប្រាក់ឧបត្ថម្ភដល់កម្មករជាង ៣ម៉ឺន ៣ពាន់នាក់ (៣៣២១៣) ដែលបានព្យួរការងារនៅរោងចក្រ និងសហគ្រាសចំនួន ១១១ ស្ថិតក្នុងវិស័យកាត់ដេរ និងវិស័យទេសចរណ៍។
ក្រសួងការងារបញ្ជាក់ថា ប្រាប់ឧបត្ថម្ភដែលផ្តល់ឱ្យកម្មករនោះ គឺត្រូវបើកតាមធនាគារឯកទេសវីង ហើយថា ប្រាក់ឧបត្ថម្ភនេះត្រូវបើកឱ្យជាប្រាក់រៀល និងអាស្រ័យលើចំនួនថ្ងៃនៃការព្យួរកិច្ចសន្យាការងាររបស់កម្មករម្នាក់ៗ។
ក្រសួងការងារបន្ថែមថា ដើម្បីបើកប្រាក់ឧបត្ថម្ភនេះបាន គឺកម្មករ-កម្មការិនីត្រូវយកអត្តសញ្ញាណប័ណ្ណសញ្ជាតិខ្មែរ និងទូរសព្ទដៃដែលទទួលបានសារពីធនាគារឯកទេសវីង ទៅបើកនៅទីភ្នាក់ងារវីងដែលនៅជិតខ្លួនបំផុត។
ក្រសួងលើកឡើងថា ក្នុងករណីកម្មករទទួលបានសារហើយ ប៉ុន្តែ ខកខានមិនបានទៅបើប្រាក់ឧបត្ថម្ភនេះក្នុងរយៈពេល ១០ថ្ងៃបន្ទាប់ពីទទួលបានសារ គឺខាងធនាគារនឹងបង្វិលលុយនោះជូនរដ្ឋាភិបាលវិញ ហើយថា ប្រសិនបើកម្មកររបស់សហគ្រាសទាំង ១១១នោះ មិនទទួលបានសារទូរសព្ទពីធនាគារវីងទេ គឺកម្មករត្រូវទំនាក់ទំនងទៅរដ្ឋបាលរោងចក្រ ឬសហគ្រាសរបស់ខ្លួនដើម្បីសួរព័ត៌មាននេះ។
វីអូឌីបានសុំការបញ្ជាក់បន្ថែមពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ តាមប្រព័ន្ធ Telegram ដែរ ប៉ុន្តែ លោកមិនឆ្លើយតប។
កាលពីម្សិលមិញ លោក ហេង សួរ បានបញ្ជាក់ប្រាប់សារព័ត៌មាន Fresh News ថា ទឹកប្រាក់ដែលរាជរដ្ឋាភិបាលចំណាយបើកជូនកម្មករព្យួរក្នុងជុំទី១នេះ មានប្រមាណជាង ៦៨ម៉ឺនដុល្លារ (៦៨៤,២៩៥) ដោយអនុវត្តចំពោះរោងចក្រកាត់ដេរចំនួន ៨៣ និងសណ្ឋាគារ ភោជនីយដ្ឋានចំនួន ២៨។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ការផ្តល់លុយទៅឱ្យកម្មករតាមរយៈធនាគារឯកទេសវីងនោះ គឺជាប្រព័ន្ធមួយល្អ។
លោក អាត់ ធន់ ឱ្យដឹងថា កម្មករដែលជាសមាជិករបស់សហភាពការងារកម្ពុជាមួយចំនួនទទួលសារ និងបើកលុយបានពីធនាគារឯកទេសវីងបានខ្លះហើយ ប៉ុន្តែ លោកថា ដំណើរការផ្តល់លុយទៅឱ្យកម្មករនេះ វាហាក់មានភាពស្មុគស្មាញ និងជួបផលលំបាកខ្លះដែរសម្រាប់កម្មករដែលចាប់ផ្តើមបើកលើកដំបូង។
លោក អាត់ ធន់ បន្ថែមថា៖ «ដោយសារវាជារឿងភ្លាមៗថ្មីៗ អ៊ីចឹង ពេលគាត់ [កម្មករ] បើកហ្នឹង ប្រហែលជាមិនទាន់ស៊ាំសម្រាប់គាត់ទេ។ អ៊ីចឹង វាមានការលំបាកខ្លះ ហើយម្យ៉ាងទៀត បើកនេះ វាដូចជាស្មុគស្មាញដែរ ដូចជាអ្នកព្យួរ ១ខែ ត្រូវបើកពីរដង អ្នកព្យួរ ២ខែ ត្រូវបើក ៤ដង។ អ៊ីចឹង វាពិបាក វាស្មុគស្មាញដែរ។ ខ្ញុំគិតថា ក្រសួងគួរធ្វើព័ត៌មានឱ្យច្បាស់ ហើយប្រសិនបើពួកគាត់ត្រូវបើក ២ខែ បើកឱ្យគាត់ ២ខែតែម្តងទៅ។ ទាក់ទងទៅគាត់ ផ្តល់លេខកូដឱ្យគាត់ទៅ ឱ្យគាត់ទៅបើកតែម្តង ចប់ហើយ»។
កាលពីថ្ងៃទី២០ ខែឧសភា លោក ហេង សួរ បានប្រាប់វិទ្យុបារាំងថា គិតត្រឹមថ្ងៃទី២០ ខែឧសភា មានរោងចក្រជាង ៣៣០ ទូទាំងប្រទេស បានព្យួរការងារកម្មករ ក្នុងនោះមានរោងចក្រជាង ១០០ បានបញ្ចប់ការព្យួរការងារ ហើយបន្តចង្វាក់ផលិតកម្មរបស់ខ្លួនឡើងវិញ។
លោក ហេង សួរ បន្ថែមថា រហូតមកដល់ពេលនេះ នៅសល់រោងចក្រចំនួន ២៣៧ទៀត កំពុងបន្តព្យួរការងារ ដែលប៉ះពាល់ដល់កម្មករ-កម្មការិនី ចំនួនជាង ១១ម៉ឺននាក់។
លោក ហេង សួរ អះអាងថា គិតត្រឹមថ្ងៃទី២០ ខែឧសភា មានកម្មករ-កម្មការិនីប្រមាណ ៥ម៉ឺន ៦ពាន់នាក់ កំពុងស្ថិតក្នុងបញ្ជីដែលត្រូវផ្តល់ប្រាក់ឧបត្ថម្ភ ៤០ដុល្លារនោះ៕
