អាជ្ញាធរកូរ៉េខាងត្បូងកាលពីថ្ងៃទី២៤ ខែឧសភា បានឃាត់ខ្លួនស្ត្រីខ្មែរ ៧នាក់ មិនឱ្យបន្តដំណើរមកកាន់ប្រទេសកំណើត ដោយសារតែមិនមានលិខិតបញ្ជាក់ថា មិនមានផ្ទុកមេរោគកូវីដ១៩។
ពលរដ្ឋខ្មែរទាំងនោះ ជាអ្នកបម្រើការងារនៅសណ្ឋាគារកាស៊ីណូ(ផ្នែកហ្គេម)ក្នុងសាធារណរដ្ឋហ្សំប៊ី ស្ថិតនៅតំបន់អាហ្វ្រិកកណ្ដាល។ ពលរដ្ឋទាំងនោះចំណាយពេលជិះជាច្រើនម៉ោង ជិះយន្តហោះពីប្រទេសហ្សំប៊ីមកដល់ទឹកដីកូរ៉េខាងត្បូង ក្នុងគោលដៅត្រលប់មកស្រុកខ្មែរវិញ។ ប៉ុន្តែ ពួកគេមិនអាចឡើងយន្តហោះបន្តមកកម្ពុជាបាន ដោយសារតែគ្មានឯកសារពេទ្យបញ្ជាក់ថា ពួកគេមិនមានផ្ទុកមេរោគកូវីដ១៩។
យុវនារីដែលជាប់នៅកូរ៉េទាំងនោះ ប្រាប់វីអូឌីថា ពួកគាត់មិនបានដឹងពីលក្ខខណ្ឌតម្រូវរបស់រាជរដ្ឋាភិបាលកម្ពុជា ដែលតម្រូវឱ្យមានឯកសារពិនិត្យសុខភាពនោះទេ។ ម្យ៉ាងទៀត ក្រសួងសុខាភិបាលនៃប្រទេសហ្សំប៊ីមិនធ្វើតេស្តរកមេរោគកូវីដឱ្យអ្នកណាដែលមិនមានរោគសញ្ញា ឬជាប់ការសង្ស័យថាកើតជំងឺនោះឡើយ។ អ្នកទាំងនោះកំពុងស្វែងរកអន្តរាគមន៍ពីសំណាក់ស្ថានទូតខ្មែរប្រចាំនៅប្រទេសកូរ៉េខាងត្បូង ដើម្បីបានត្រលប់មកស្រុកវិញ។
ពលរដ្ឋម្នាក់មានស្រុកកំណើតនៅខេត្តបន្ទាយមានជ័យ កញ្ញា កេង ស្រីមាន រៀបរាប់ថា ពួកគាត់បានចេញដំណើរពីប្រទេសហ្សំប៊ីកាលពីថ្ងៃទី២៣ មកដល់កូរ៉េនៅថ្ងៃទី២៤ ខែឧសភា។ កញ្ញាបន្តថា មន្ត្រីអន្តោប្រវេសន៍កូរ៉េបានឃាត់ពួកគាត់ទុកមិនឱ្យឡើងយន្តហោះមកខ្មែរ ដោយសារតែមិនមានឯកសារបញ្ជាក់សុខភាពតេស្តរកកូវីដ១៩។ កញ្ញាបន្ថែមថា គាត់កំពុងបារម្ភពីសុខភាពនិងសុវត្ថិភាពអំឡុងពេលស្នាក់នៅទីនោះ។
កញ្ញា ស្រីមាន៖ «រយៈពេលពីរបីថ្ងៃនៅព្រលានហ្នឹង ក៏អត់សុវត្ថិភាពដែរ ខាងព្រលានគេអត់រវីរវល់នឹងពួកយើងអ្វីទាំងអស់ ខោអាវពួកខ្ញុំទៅដល់ខ្មែរអស់ហើយ អីចឹងពួកខ្ញុំពិបាកហ្មង ស្អីក៏អត់មាន ស្អីក៏អត់មាន។»
ពលរដ្ឋពីខេត្តពោធិ៍សាត់ កញ្ញា សែម ធីតា លើកឡើងថា ពួកគេទាំង ៧នាក់ បារម្ភពីសុខភាព និងខ្វះខាតលុយកាក់ទិញចំណីអាហារក្នុងពេលស្នាក់នៅក្នុងប្រទេសកូរ៉េ។
កញ្ញា សែម ធីតា៖ «ក្នុងពេលរង់ចាំនេះ ស្អីក៏ថ្លៃៗ ដឹងស្រាប់ហើយ យើងមានលុយឯណាសម្រាប់ចំណាយ រស់នៅកណ្ដាលវាលអីចឹង យើងខ្លាចមានជំងឺឆ្លង ទោះយើងមិនឈឺ នៅយូរអីចឹងសុខភាពយើងនឹងខ្សោយ ងើបគេង គេងងើប ខ្លាចមានជំងឺណាមួយ យើងហោះមកពីឆ្ងាយហត់ផងអីផង ពួកខ្ញុំបារម្ភខ្លាចឈឺ ខ្លាចអីផង កាន់តែពិបាក។»
កញ្ញាបញ្ជាក់ថា ពួកគាត់បានទាក់ទងទៅកាន់ស្ថានទូតរួចហើយ ដោយភាគីស្ថានទូតសន្យាថានឹងជួយអន្តរាគមន៍ ប៉ុន្តែ មិនទាន់ឃើញមានបុគ្គលិកស្ថានទូតទៅជួបពួកគាត់ឡើយ។
ឆ្លើយតបនឹងបញ្ហានេះ ឯកអគ្គរាជទូតខ្មែរប្រចាំនៅកូរ៉េ លោក ឡុង ឌីម៉ង់ ថ្លែងប្រាប់វីអូឌីថា លោកបានទទួលព័ត៌មានពីស្ថានភាពពលរដ្ឋខ្មែរទាំង ៧នាក់នេះរួចហើយ។ លោកថា ស្ថានទូតខ្មែរកំពុងទាក់ទងទៅរដ្ឋាភិបាលកូរ៉េ ដើម្បីដោះស្រាយបញ្ហានេះ។
លោក ឡុង ឌីម៉ង់៖ «ឥលូវនេះ ចំពោះមុខ ស្ថានទូតកំពុងព្យាយាមក្នុងការសម្របសម្រួលបន្ថែមទៀត ជាមួយនឹងអាជ្ញាធរកូរ៉េនេះ ដើម្បីសុំការយោគយល់ សុំជួយមួយក្រុមនេះទៀត នេះមិនទាន់ដឹងលទ្ធផលយ៉ាងណាទេ នេះកំពុងខិតខំធ្វើការនេះជាប់រហូត។»
បើតាមលោក ឡុង ឌីម៉ង់ កាលពីចុងសប្ដាហ៍ ស្ថានទូតខ្មែរប្រចាំនៅកូរ៉េ ទើបតែបានអន្តរាគមន៍លើករណីដូចគ្នានេះដែរ ចំពោះពលរដ្ឋខ្មែរចំនួន ១៨នាក់ដែលមិនមានឯកសារតេស្តរកកូវីដ១៩។ ក្នុងនោះ អ្នកដំណើរ ១៧នាក់ ជិះយន្ដហោះពីប្រទេសស្រីលង្កា និងម្នាក់ធ្វើដំណើរពីជប៉ុន ហើយចុះប្ដូរជើងយន្ដហោះត្រឹមប្រទេសកូរ៉េខាងត្បូង មុននឹងបន្តដំណើរទៅប្រទេសកម្ពុជា។
ការធ្វើដំណើរដោយគ្មានឯកសារបញ្ជាក់សុខភាពថាមិនមានមេរោគកូវីដ១៩នេះ គឺផ្ទុយនឹង សេចក្ដីសម្រេចរបស់រាជរដ្ឋាភិបាលកម្ពុជា ដែលតម្រូវឱ្យអ្នកដំណើរទាំងអស់ ចាំបាច់ត្រូវមានឯកសារពិនិត្យសុខភាព ដែលបញ្ជាក់ថា គ្មានមេរោគកូវីដ១៩ ដែលចេញដោយប្រទេសសាម៉ីនៅក្នុងរយៈពេល ៧២ម៉ោង មុនដាក់ជើងជាន់ដីខ្មែរ។ នេះបើតាមសេចក្ដីប្រកាសព័ត៌មានរបស់ក្រសួងសុខាភិបាល កាលពីថ្ងៃទី២០ ខែឧសភាកន្លងទៅ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា រាជរដ្ឋាភិបាលកម្ពុជាចាំបាច់ត្រូវចាត់វិធានការជួយពលរដ្ឋខ្លួនដែលកំពុងត្រូវការជំនួយក្នុងពេលមានការរីករាលដាលនៃកូវីដ១៩នេះ។
លោក ស៊ឹង សែនករុណា៖ «មិនគួរណាមានការបង្អែបង្អង់បណ្ដោយឱ្យជនជាតិយើងរសាត់អណ្ដែតក្នុងប្រទេសគេអីចឹងទេ គួរតែស្ថានទូតយើងធ្វើយ៉ាងណាអន្តរាគមន៍ដុតដៃដុតជើងក្នុងនាមជាអាជ្ញាធរ។ រដ្ឋាភិបាលត្រូវតែជួយពលរដ្ឋខ្លួនដែលនៅក្រៅប្រទេស ដែលកំពុងរងទុក្ខក្នុងពេលកើតមានកូវីដ១៩នេះ៕»
