កម្មករ-កម្មការិនីជិត ១ពាន់នាក់ បម្រើការងារនៅរោងចក្រចំនួន ២កន្លែង ស្ថិតក្នុងខណ្ឌពោធិ៍សែនជ័យ រាជធានីភ្នំពេញ បានផ្ទុះការតវ៉ាជាថ្មី បន្ទាប់ពីថៅកែបើកប្រាក់ឈ្នួលឱ្យពួកគេតែចន្លោះពី១២ ទៅ៣០ដុល្លារ ហើយការបើកឱ្យនោះគឺមានការយឺតយ៉ាវ។
កាលពីខែមីនា កម្មករជិត ១ពាន់នាក់នៅរោងចក្រ ឃែនធើរេន (Canteran Apparel) និងរោងចក្រ ខ្វលីធី តេក្សស្ទីល (Quality Textiles) ជារោងចក្រដែលមានម្ចាស់តែមួយ បាននាំគ្នាតវ៉ាម្តងរួចមកហើយ ពាក់ព័ន្ធករណីថៅកែបើកប្រាក់ឈ្នួលឱ្យពួកគេមិនគ្រប់ និងមានភាពយឺតយ៉ាវនេះ។
ប្រធានសហជីពចលនាកម្មករប្រចាំរោងចក្រ ឃែនធើរេន អ្នកស្រី សាន់ សុផា ប្រាប់វីអូឌីថា កម្មករនៅរោងចក្រ ឃែនធើរេន ប្រមាណ ៣០០នាក់ ក្នុងចំណោមកម្មករសរុប ៩៩៥នាក់ បានផ្ទុះការតវ៉ានៅថ្ងៃនេះ។
អ្នកស្រី សាន់ សុផា អះអាងថា ថៅកែនៅជំពាក់ប្រាក់ឈ្នួលកម្មករ ១ខែ ពោលគឺប្រាក់ឈ្នួលសម្រាប់ពាក់កណ្តាលខែមេសា និងពាក់កណ្តាលខែឧសភា គឺថៅកែបើកឱ្យបានតែ ៣០ដុល្លារប៉ុណ្ណោះ។
អ្នកស្រីបន្ថែមថា៖ «កម្មករអត់បានអីទេ! សុំថៅកែបើកប្រាក់ឈ្នួលឱ្យពួកយើងឱ្យគ្រប់ចំនួន និងទៀងទាត់តាមកាលកំណត់ទៅបានហើយ ព្រោះពួកយើងក៏ជួបការលំបាកខ្លាំងដែរលើការចំណាយប្រចាំថ្ងៃ»។
លោក បិ សម្បត្តិ ដែលអះអាងថា ជាតំណាងកម្មករប្រចាំរោងចក្រ ខ្វលីធី ប្រាប់វីអូឌីកន្លែងតវ៉ាមុខរោងចក្រថា នៅរោងចក្រ ខ្វលីធី មានកម្មករសរុបជាង ១ពាន់នាក់ ប៉ុន្តែ កាលពីមុន ថៅកែសម្រេចព្យួរការងារកម្មករប្រហែល ៤០០នាក់ ដោយនៅសល់ប្រហែលជាង ៦០០នាក់ប៉ុណ្ណោះដែលបាននាំគ្នាតវ៉ាទាំងអស់គ្នានៅថ្ងៃនេះ ដោយសារថៅកែបើកប្រាក់ឱ្យពួកគេយឺតយ៉ាវ។
តំណាងកម្មកររូបនេះអះអាងថា កម្មករដែលបានព្យួរការងារនោះគឺ ពួកគេទទួលបានប្រាក់ឈ្នួលតែ ១២ដុល្លារប៉ុណ្ណោះ ខណៈដែលរដ្ឋាភិបាលប្រកាសថា ថៅកែត្រូវចេញ ៣០ដុល្លារ ករណីព្យួរការងារកម្មករ។
លោកបន្ថែមថា៖ «អីចឹង ខ្ញុំសូមសំណូមពរទៅថៅកែក្រុមហ៊ុន ក៏ដូចជាអាជ្ញាធរពាក់ព័ន្ធ គឺសុំឱ្យពួកគាត់ជួយដោះស្រាយដល់បងប្អូនកម្មកររបស់យើងឱ្យបានឆាប់ ពីព្រោះពួកគាត់ត្រូវការចំណាយប្រចាំថ្ងៃ។ ប្រសិនបើខាងក្រុមហ៊ុនគាត់បើកប្រាក់ឈ្នួលមិនគ្រប់ និងយឺតយ៉ាវអីចឹង តើឱ្យបងប្អូនបានប្រាក់ពីណាសម្រាប់ការងារចំណាយប្រចាំថ្ងៃ»។
កម្មការិនីផ្នែកដេរម្នាក់ អ្នកស្រី សៀង ស្រីរ៉ា រៀបរាប់ប្រាប់វីអូឌីកន្លែងតវ៉ាថា ករណីថៅកែបើកប្រាក់ឈ្នួលឱ្យកម្មករយឺតយ៉ាវ និងមិនគ្រប់នេះ បានធ្វើឱ្យពួកគាត់ជួបបញ្ហា និងការលំបាកជាច្រើន ដូចជា គ្មានលុយសម្រាប់បង់ថ្លៃបន្ទប់ជួល ទឹកភ្លើង ចាយវាយប្រចំាថ្ងៃ និងគ្មានលុយបង់សងធនាគារ ជាដើម។
កម្មការិនីវ័យ ២៥ឆ្នាំរូបនេះ និយាយទៀតថា ពេលដែលគ្មានលុយបង់ថ្លៃបន្ទប់ជួល គឺត្រូវបានម្ចាស់បន្ទប់ជួលព្រមានឈប់ជួលបន្ទប់ឱ្យ ហើយថា ដើម្បីដោះស្រាយពេលអត់លុយចាយ និងបង់ថ្លៃបន្ទប់ជួលនោះគឺ អ្នកស្រីត្រូវឱ្យអ្នកផ្ទះផ្ញើលុយមកឱ្យចាយវិញ។
អ្នកស្រី ស្រីរ៉ា៖ «សួរថា កម្មករគាត់មានកម្លាំងធ្វើអត់! ខែ៤ ក៏មិនបានផ្ញើលុយទៅផ្ទះ។ អ្នកខ្លះត្រូវចំណាយកូនរៀន អ្នកខ្លះត្រូវបង់ធនាគារ ជំពាក់គេ ចាយវាយប្រចាំថ្ងៃ ត្រូវការលុយបង់សងគេវិញ អ្នកខ្លះអត់លុយចាយ ត្រូវឱ្យអ្នកផ្ទះផ្តល់លុយមកឱ្យចាយវិញ ចុះបើថៅកែធ្វើបែបហ្នឹងអីចឹង សួរថា កម្មករគ្នាមានអារម្មណ៍ម៉េច»។
មន្ត្រីសហព័ន្ធសហជីពកម្មករនិយោជិត លោក ផែន សោភ័ណ្ឌ ដែលចុះឃ្លាំមើលការតវ៉ានេះ មានប្រសាសន៍ថា ករណីថៅកែបើកប្រាក់ឈ្នួលឱ្យកម្មករមិនគ្រប់ និងយឺតយ៉ាវនេះ គឺជារឿងខុសច្បាប់។
មន្ត្រីសហព័ន្ធសហជីពរូបនេះ ស្នើឱ្យមន្ត្រីក្រសួងការងារចុះសម្របសម្រួលដោះស្រាយជូនកម្មករឱ្យបានឆាប់ ដើម្បីកុំឱ្យកម្មករជួបទុក្ខលំបាកបន្តទៀត។
លោកបន្ថែមថា៖ «ប្រកាសរបស់រដ្ឋាភិបាល អ្នកដែលព្យួរការងារ គាត់ត្រូវបាន ៣០ដុល្លារពីថៅកែ និង៤០ដុល្លារត្រូវបានពីរដ្ឋាភិបាល ចុះហេតុអីបានជាអ្នកដែលព្យួរការងារបានតែ ១២ដុល្លារ។ អីចឹង វាខុសពីផ្លូវច្បាប់ហើយ។ នៅពេលនេះ ទាំងអ្នកនៅធ្វើការ និងអ្នកព្យួរ គេទាមទារឱ្យបើកប្រាក់ឈ្នួលឱ្យពួកគេឱ្យសមស្របទៅតាមផ្លូវច្បាប់»។
បើតាមកម្មករ រោងចក្រ ឃែនធើរេន (Canteran Apparel) និងរោងចក្រ ខ្វលីធី តេក្សស្ទីល (Quality Textiles) ជារោងចក្រផលិតសម្លៀកបំពាក់ មានថៅកែជាជនជាតិចិន និងមានកម្មករសរុបប្រមាណ ២ពាន់នាក់៕