យុវជន គង់ រ៉ៃយ៉ា ដែលប្រឈមមុខនឹងជាប់ពន្ធនាគារដល់ទៅ ៤ឆ្នាំក្រោមការចោទប្រកាន់ពាក់ព័ន្ធនឹងការបោះពុម្ពអាវយឺតមានរូបថតអ្នកវិភាគ លោក កែម ឡី និងសម្ដីរបស់លោកនោះ និយាយថា រូបគេមិនរំពឹងទទួលបានយុត្តិធម៌នោះឡើយ នៅពេលសាលក្រមនឹងត្រូវប្រកាសនៅខែក្រោយនេះ។
លោក សំ សុខគង់ មេធាវីការពារក្ដីឱ្យលោក គង់ រ៉ៃយ៉ា បានប្រាប់ថា ចៅក្រមសាលាដំបូងរាជធានីភ្នំពេញ អ្នកស្រី អ៊ុក រ៉េតគន្ធា បានបិទបញ្ចប់សវនការសំណុំរឿងចោទប្រកាន់លោក រ៉ៃយ៉ា នៅថ្ងៃពុធនេះ ប៉ុន្តែ សកម្មជនរូបនេះ ពុំមានវត្តមាននៅតុលាការនោះឡើយ។
ក្នុងសារតបមកកាន់វីអូឌីនៅថ្ងៃពុធនេះ លោក រ៉ៃយ៉ា ប្រាប់ថា លោកចេញទៅព្យាបាលនៅប្រទេសថៃ ហើយមិនអាចត្រឡប់មកកម្ពុជាទាន់ពេលសវនាការនោះឡើយ ដោយសារតែការបិទព្រំដែនពាក់ព័ន្ធនឹងវិបត្តិកូវីដ១៩។
សកម្មជនរូបនេះនិយាយថា លោកមិនមានសុទិដ្ឋិនិយមចំពោះសាលក្រមដែលលើកពេលប្រកាសនេះទេ។
លោក រ៉ៃយ៉ា និយាយថា៖ «ខ្ញុំគិតថា នឹងមិនមានយុត្តិធម៌សម្រាប់ខ្ញុំទេ ព្រោះករណីនេះពាក់ព័ន្ធនឹងបញ្ហានយោបាយ ហើយ[ការបោះពុម្ពអាវយឺត]មិនមែនល្មើសនឹងច្បាប់ព្រហ្មទណ្ឌទេ។ ប្រសិនស្ថានការណ៍នយោបាយល្អប្រសើរ សំណុំរឿងខ្ញុំក៏អាចធូរស្រាលផងដែរ ប៉ុន្តែ នយោបាយនៅកម្ពុជាកាន់តានតឹង សំណុំរឿងខ្ញុំក៏តានតឹងដែរ»។
មេធាវី លោក សំ សុខគង់ ប្រាប់ថា លោក រ៉ៃយ៉ា ត្រូវបាមសមត្ថកិច្ចចាប់ខ្លួនកាលពីថ្ងៃទី៩ ខែកក្កដា ឆ្នាំ២០១៩ មួយថ្ងៃមុនខួប ៣ឆ្នាំនៃឃាតកម្មលើអ្នកវិភាគនយោបាយ លោកបណ្ឌិត កែម ឡី ហើយក្រោយមកសកម្មជនរូបនេះ ត្រូវបានចោទប្រកាន់ពីបទ«ញុះញង់ឱ្យប្រព្រឹត្តបទល្មើសជាអាទិ៍» និងត្រូវបានចោទពីបទ«ការមិនរាងចាលក្នុងបទមជ្ឈិមបន្ទាប់ពីការផ្តន្ទាទោសបទមជ្ឈិម»។ បទចោទប្រកាន់នេះ បានកើតឡើងក្រោយពីសកម្មជនរូបនេះបានផ្សព្វផ្សាយលក់អាវនៅលើអនឡាញ ដើម្បីរំឭកខួបនៃការបាញ់សម្លាប់លោក កែម ឡី ដែលជាអ្នករិះគន់រដ្ឋាភិបាលដ៏លេចធ្លោ។
លោក រ៉ៃយ៉ា ត្រូវបានកាត់ទោសក្រោមបទចោទប្រកាន់ដូចនេះម្ដងរួចមកហើយនៅក្នុងសំណុំរឿងផ្សេងមួយទៀតកាលពីឆ្នាំ២០១៦ ហើយត្រូវបានដាក់ពន្ធនាគារ ១៨ខែ ក្រោយពីអំពាវនាវឱ្យមាន«បដិវត្តន៍ពណ៌»។ ប្រសិនបើត្រូវបានកាត់ទោសនៅក្រោមបទចោទប្រកាន់ដដែលនេះជាថ្មីម្ដងទៀត សកម្មជនរូបនេះនឹងប្រឈមមុខនឹងទោសជាប់ពន្ធនាគារដល់ទៅ ៤ឆ្នាំ ជាកម្រិតខ្ពស់បំផុតសម្រាប់បទល្មើសញុះញង់។
នៅពេលលោក រ៉ៃយ៉ា ត្រូវបានដោះលែងឱ្យស្ថិតនៅក្រៅឃុំកាលពីខែវិច្ឆិកាឆ្នាំមុន អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានប្រាប់វីអូឌីថា សកម្មជនរូបនេះ មិនត្រូវបានអនុញ្ញាតឱ្យចាកចេញពីប្រទេស មិនអាចផ្លាស់ប្ដូរអាសយដ្ឋានលុះត្រាតែមានការអនុញ្ញាតពីតុលាការ ឬក៏មិនអាចបង្ហោះសារអ្វីនៅលើបណ្ដាញសង្គមពាក់ព័ន្ធនឹងការចោទប្រកាន់ទៅលើគាត់បានឡើយ។
លោក សុខគង់ បានប្រាប់នៅពេលនោះថា សំណើសុំនៅក្រៅឃុំរបស់កូនក្ដីលោក ត្រូវបានតុលាការបដិសេធកាលពីមុន ប៉ុន្តែ ក្រោយមកត្រូវបានតុលាការយល់ព្រមដោយសារបញ្ហាសុខភាពរបស់គាត់ ហើយដោយសារគាត់ជានិស្សិត ត្រូវមើលថែគ្រួសារ និងសន្យាបង្ហាញខ្លួននៅពេលតុលាការកោះហៅ។
លោក សុខគង់ ប្រាប់ថា៖ «គាត់សន្យានឹងចៅក្រមថា គាត់មិនរត់គេចទេ ហើយគាត់សន្យាបង្ហាញខ្លួនគ្រប់ពេលដែលចៅក្រមចង់ឱ្យគាត់បង្ហាញខ្លួននៅតុលាការ»។
លោក សុខគង់ ប្រាប់ថា កាលបរិច្ឆេទជំនុំជម្រះសំណុំរឿងកូនក្ដីរបស់លោក ដំបូងឡើយគ្រោងធ្វើឡើងនៅខែធ្នូកន្លងមក ប៉ុន្តែ ត្រូវបានលើកពេលទៅវិញ ដោយសារលោក រ៉ៃយ៉ា និងសាក្សីអវត្តមាន។ បើតាមលោក សុខគង់ លោក រ៉ៃយ៉ា បានសរសេរនៅលើហ្វេសប៊ុករបស់លោកនាពេលនោះថា លោកឈឺ។
មេធាវីបាននិយាយថា លោក រ៉ៃយ៉ា បានចាកចេញពីកម្ពុជាមិនយូរទេក្រោយពីលោកត្រូវបានដោះលែងឱ្យនៅក្រៅឃុំ ប៉ុន្តែ លោកមិនអាចបញ្ជាក់ពេលជាក់លាស់បានឡើយ។
លោក សុខគង់ បន្ថែមថា កូនក្ដីរបស់លោកមិនមានបំណងញុះញង់ពលរដ្ឋជាមួយនឹងអាវយឺតនោះឡើយ ដោយថា វាជាសកម្មភាពនៃការបញ្ចេញមតិដែលត្រូវបានការពារដោយច្បាប់ ហើយក៏ជាឱកាសធ្វើការរកស៊ីផងដែរ។
មេធាវីបញ្ជាក់ថា កូនក្ដីរបស់លោកគ្រាន់តែចង់រំឭកការចងចាំអ្នកវិភាគនយោបាយក្នុងផ្លូវវិជ្ជាមានប៉ុណ្ណោះ ហើយតុលាការ ឬនរណាម្នាក់ មិនអាចទៅយល់ន័យដើមនៃពាក្យសម្ដីលោក កែម ឡី ដែលបោះពុម្ពនៅលើអាវយឺតនោះឡើយ។
រូបថតលោក កែម ឡី ត្រូវបានបោះពុម្ពសខ្មៅនៅលើអាវយឺតផ្នែកខាងមុខ ហើយនៅផ្នែកខាងក្រោយមានសម្រង់សម្ដីលោកដែលសរសេរថា «ប្រសិនបើអ្នកមិនធ្វើអ្វីសោះ អ្នកនឹងរងគ្រោះ គ្រាន់តែមិនទាន់ដល់វេនអ្នកប៉ុណ្ណោះ»។
លោក សុខគង់ និយាយថា ការពិតនៃករណីនេះ និងការចោទប្រកាន់ មិនស៊ីសង្វាក់គ្នាសោះ ដោយសារភស្តុតាងផ្អែកលើខ្លឹមសារសម្ដីរបស់លោក កែម ឡី ដែលមិនដឹងថា មានន័យអ្វីច្បាស់លាស់នោះឡើយ។
មេធាវីប្រាប់ថា៖ «សម្រាប់ខ្លឹមសារនៅលើអាវ បណ្ឌិត កែម ឡី អាចមានន័យអ្វីផ្សេងខុសពីហ្នឹង។ អ៊ីចឹងហើយ វាអាចមានន័យវិជ្ជមាន ឬអាចមានន័យអហិង្សា»។
នៅពេលសាកសួរថា តើលោកនឹងវិលត្រឡប់មកកម្ពុជាវិញឬយ៉ាងណានោះ លោក រ៉ៃយ៉ា ប្រាប់ថា៖ «ខ្ញុំត្រូវរង់ចាំមើលសិនថា តើថៃ និងកម្ពុជាបើកច្រកព្រំដែនវិញឬយ៉ាងណា ហើយខ្ញុំក៏ត្រូវរង់ចាំមើលថា តើសាលក្រមរបស់សាលាដំបូងរាជធានីភ្នំពេញ រកឃើញថា ខ្ញុំមានកំហុស ឬក៏តុលាការទម្លាក់ចោលការចោទប្រកាន់មកលើរូបខ្ញុំ»។
សាលក្រមនៃសំណុំរឿងនេះ នឹងត្រូវបានប្រកាសនៅថ្ងៃទី១៩ ខែមិថុនាខាងមុខ៕
អត្ថបទនេះត្រូវបានប្រែសម្រួលដោយ លោក វ៉ា សុភានុត ពីអត្ថបទដើមនៅលើ VOD English