ឪពុកម្តាយដែលជាសមាជិកក្នុងក្រុម (Group) ហ្វេសប៊ុកឈ្មោះ ក្រុមអ្នកម្តាយឆ្លាតវៃ កាលពីអំឡុងខែមេសា ខ្លះបានបង្ហោះរូបកូនព្យួរសេរ៉ូម អ្នកខ្លះបានបង្ហោះរូបកូនយំ ខណៈអ្នកខ្លះទៀតបង្ហោះរូបកូនឈឺធ្ងន់រហូតបញ្ចូលឈាម អមដោយសាររៀបរាប់ពីស្ថានភាពជំងឺរបស់កូន។ សមាជិកក្រុមដែលមិនមានកូនឈឺ បានសរសេរសារបង្ហាញក្ដីអាណិតអាសូរ និងផ្តល់យោបល់លើកទឹកចិត្តជាដើម។
ក្នុងវ័យជាងម្ភៃឆ្នាំ និងជាម្ដាយលើកដំបូងផងនោះ អ្នកស្រី ច័ន្ទ ផល្គុន បានសម្រាលបានកូនប្រុសម្នាក់ កាលពីចុងខែមិថុនា ឆ្នាំ២០១៩ ដោយដាក់ឈ្មោះហៅក្រៅថា ហារី។ អ្នកស្រីឱ្យដឹងថា តាំងពីកើតមក ហារី ជាក្មេងម្នាក់ដែលរួសរាយមិនសូវចេះធ្វើទុក្ខម្ដាយឪពុកទេ ហើយក៏មិនដែលឈឺថ្កាត់ដែរ។ ប៉ុន្តែ នៅពេលទារក ហារី អាយុបានជាងប្រាំខែ គឺអំឡុងខែធ្នូ ឆ្នាំ២០១៩ គ្រូពេទ្យរកឃើញថា ហារី មានជំងឺស្លេកស្លាំងដោយខ្វះជាតិដែកធ្ងន់ធ្ងរ ។
អ្នកស្រី ច័ន្ទ ផល្គុន រៀបរាប់ប្រាប់វីអូឌីថា ៖ «ខ្ញុំយកកូនទៅពេទ្យទៅ គ្រូពេទ្យពិគ្រោះហ្នឹងគាត់ទាញភ្នែកវាមើលផងអីផង គាត់ប្រាប់ថា គ្រូអត់ហ៊ានឱ្យថ្នាំទេ ទៅខាងសង្គ្រោះបន្ទាន់ទៅ។ ទៅដល់កន្លែងសង្គ្រោះបន្ទាន់ គ្រូពេទ្យឆ្លេឆ្លាបណ្ដោយ! បូមឈាម អត់មានឈាមបូមទេ ចាក់តាំងសព្វដៃសងខាង ដល់ជើងត្រង់ជិតភ្នែកគោនោះបានមានឈាមយកទៅវិភាគ។ ដល់លទ្ធផលមក ពេទ្យប្រាប់ខ្ញុំថា កូនម៉ាក់ឈាមធ្លាក់ខ្លាំងណាស់ ពេទ្យឱ្យបញ្ចូលឈាម ដល់បញ្ចូលឈាមរួច បន្តោងសារ៉ូមរួចបានធូរ កូនខ្ញុំចេះក្រឡាប់ ខ្ញុំ និងប្ដីខ្ញុំសឹងអង្គុយយំទល់មុខគ្នា»។
ម្ដាយម្នាក់ទៀតជាពលរដ្ឋរស់នៅរាជធានីភ្នំពេញ អ្នកស្រី ឌី ប៉ូលីន បានសរសេរលើហ្វេសប៊ុកថា កូនគាត់ខ្វះគ្រាប់ឈាមក្រហម (ជំងឺស្លេកស្លាំងដោយខ្វះជាតិដែកធ្ងន់ធ្ងរ) ហើយត្រូវគ្រូពេទ្យជំនាញនៃមន្ទីរពេទ្យកុមារជាតិ បញ្ចូលឈាមភ្លាមៗដើម្បីសង្គ្រោះបន្ទាន់។ អ្នកស្រី ប្រាប់វីអូឌីថាកូនគាត់ចេញពីមន្ទីរពេទ្យរួចហើយកាលពីថ្ងៃទី០៩ ខែឧសភាកន្លងទៅថ្មីៗនេះ បន្ទាប់ពីសម្រាកព្យាបាលជាច្រើនថ្ងៃរួចមក។
អ្នកស្រី ឌី ប៉ូលីន មានប្រសាសន៍ថា៖ «អាអូនឥលូវរាងស្រួលហើយ គ្រូពេទ្យពិនិត្យឃើញគ្រាន់បើ។ ពេទ្យឱ្យចេញហើយ។»
លោក សៅ សីហា ជាបិតារបស់ទារកដែលទើបមានអាយុជាង ៥ខែ។ លោករៀបរាប់ថា នៅពេលដែលលោកយកកូនទៅចាក់វ៉ាក់សាំង គ្រូពេទ្យស្នើឱ្យធ្វើការពិនិត្យឈាមរកមេរោគ ព្រោះតែឃើញអាការទារកស្លេកស្លាំង។ លោកបន្តថា លទ្ធផលឈាមនៅពេទ្យឯកជនបង្ហាញថាទារកខ្វះជាតិដែក និងខ្វះគ្រាប់ឈាមក្រហម ដែលត្រូវយកទៅសង្គ្រោះបន្ទាន់នៅមន្ទីរពេទ្យគន្ធបុប្ផា។
លោក សៅ សីហា ប្រាប់ថា៖ «កូនខ្ញុំគាត់ខ្វះជាតិដែក និងគ្រាប់ឈាមក្រហមខ្លាំង ដល់ដំណាក់កាល Emergency យកទៅគន្ធបុប្ផាភ្លាមៗ។ ទៅពេលដល់គន្ធបុប្ផា ពេទ្យ គេធ្វើតេស្តឈាមម្ដងទៀតដើម្បីបញ្ជាក់ ឃើញថា ខ្វះជាតិដែក និងគ្រាប់ឈាមក្រហម ពេទ្យបញ្ចូលឈាម និងឱ្យសម្រាក ២យប់ អត់ក្ដៅខ្លួនអត់អី ទើបគេឱ្យចេញពីពេទ្យ»។
វីអូឌីបានទាក់ទងទៅកាន់មន្ទីរពេទ្យគន្ធបុប្ផា ដើម្បីចង់ដឹងពីតួលេខកុមារកើតជំងឺស្លេកស្លាំងដោយខ្វះជាតិដែកធ្ងន់ធ្ងរនេះ ប៉ុន្តែ អគ្គនាយករងមន្ទីរពេទ្យគន្ធបុប្ផា លោកស្ត្រាចារ្យវេជ្ជបណ្ឌិត ហេង សុទ្ធី ប្រាប់ថា លោកមិនអាចឱ្យតួលេខនេះបានទេ។
ទោះជាយ៉ាងណាក្ដី ប្រភពដែលគួរឱ្យទុកចិត្តពីក្រុមគ្រូពេទ្យនៃមន្ទីរពេទ្យកុមារជាតិដែលវីអូឌីទទួលបាន បង្ហាញថា មន្ទីរពេទ្យកុមារជាតិ បានទទួលទារកកើតជំងឺស្លេកស្លាំងដោយខ្វះជាតិដែកធ្ងន់ធ្ងរចំនួន ៣៤ករណី មកសម្រាកព្យាបាលក្នុងរយៈពេល ៦ខែ ចាប់ពីខែកញ្ញា ឆ្នាំ២០១៩ ដល់ខែកុម្ភៈ ឆ្នាំ២០២០។ ចំនួនករណីកុមារឈឺជំងឺនេះ គឺកើតឡើងច្រើនជាងឆ្នាំណាៗទាំងអស់។
ប្រធានផ្នែកជំងឺឈាមកុមារ នៃមន្ទីរពេទ្យកុមារជាតិ លោកវេជ្ជបណ្ឌិត ជាន សុផល មានប្រសាសន៍ថា មន្ទីរពេទ្យកុមារជាតិ ពិតជាបានទទួលកុមារច្រើននាក់ដែលកើតជំងឺស្លេកស្លាំងដោយខ្វះជាតិដែកធ្ងន់ធ្ងរនេះប្រាកដមែន ប៉ុន្តែ ខាងអ្នកជំងឺភាគច្រើនបានជាសះស្បើយរួចហើយ ខណៈដែលកុមារមួយចំនួនទៀតត្រូវមកជួបពេទ្យតាមកាលកំណត់។
វេជ្ជបណ្ឌិត ជាន សុផល បញ្ជាក់ថា៖ «រឹតតែពិសេស ក្មេងអាយុក្រោម ១ឆ្នាំ មានបញ្ហាកង្វះជាតិដែកធ្ងន់ធ្ងរធ្វើឱ្យស្លេកស្លាំង ហើយរហូតទៅដល់ត្រូវការដាក់ឈាម ទើបអាចជួយពួកគាត់បាន។ ក្មេងខ្លះ ២អាទិត្យ ក្មេងខ្លះ ៤អាទិត្យ ត្រូវមកមើលឡើងវិញ ថាវាវិវត្តទៅល្អហើយឬនៅ វាបានធូរស្រាលហើយឬនៅថ្ងៃនេះ។ ដូចជាចេញពីពេទ្យអស់ហើយ។»
រោគសញ្ញា និងមូលហេតុនាំឱ្យកុមារកើតជំងឺស្លេកស្លាំង
វេជ្ជបណ្ឌិតជំនាញបង្ហាញថា ជំងឺស្លេកស្លាំងដោយខ្វះជាតិដែកធ្ងន់ធ្ងរ មិនមានរោគសញ្ញាអ្វីគួរឱ្យកត់សម្គាល់បានទេ នៅដំណាក់កាលដំបូង។ ពេទ្យជំនាញ អាចកត់សម្គាល់ ឬដាក់ការសង្ស័យថា ក្មេងកើតជំងឺនេះបាន ទៅតាមអាការស្លេកស្លាំង ពោលគឺនៅពេលដែលកុមារកើតជំងឺនេះរយៈពេលចន្លោះពី១ខែ ទៅ២ខែ។ ដំណាក់កាលនោះ គ្រូពេទ្យនឹងអាចធ្វើតេស្តឈាម ឱ្យដឹងប្រាកដដើម្បីព្យាបាល។
វេជ្ជបណ្ឌិត ជាន សុផល ឱ្យដឹងថា ក្រុមគ្រួសារកុមារមួយចំនួនតែងតែយល់ខុស និងស្មានខុសថា កូនចៅរបស់ខ្លួនមានសម្បុរ.ស តែធាតុពិត គឺកុមារនោះស្លេកស្លាំង។
វេជ្ជបណ្ឌិត ជាន សុផល មានប្រសាសន៍ថា៖ «ករណីភាពស្លេកស្លាំងឃើញបន្តិចបន្តួច ឪពុកម្ដាយកម្រយកមកពេទ្យណាស់ ក្នុងករណីបន្តិចបន្តួចហ្នឹង គឺរកឃើញដោយចៃដន្យ។ នៅពេលដែលកូនហ្នឹងឈឺអីផ្សេង ឧទាហរណ៍កូនហ្នឹងរលាកផ្លូវដង្ហើម កូនហ្នឹងមានបញ្ហារាគរូស ហើយឪពុកម្ដាយយកកូនមកពេទ្យ គ្រូពេទ្យពិនិត្យឃើញថា កូនហ្នឹងស្លេកស្លាំង ហើយពិនិត្យឈាមឃើញក្នុងពេលតែមួយ។ កុមារអស់នេះងាយនឹងឈឺណាស់ អាចរាគរូស អាចមានបញ្ហាផ្លូវដង្ហើម សរុបមកក្មេងងាយនឹងឈឺ»។
លោកបន្តថា របបអាហារមិនត្រឹមត្រូវ ខ្វះជីវជាតិដែក ជាមូលហេតុចម្បងដែលនាំឱ្យកុមារកើតជំងឺស្លេកស្លាំងដោយកង្វះជីវជាតិដែកធ្ងន់ធ្ងន់នេះ។
វេជ្ជបណ្ឌិត ជាន សុផល ប្រាប់ថា៖ «ក្មេងដែលបៅទឹកដោះគោណាមួយដែលគ្មានជាតិដែក ឬដែលញ៉ាំអាហារណាមួយដែលខ្វះជាតិដែក វាមិនមែនចេញរោគសញ្ញាស្អែកខានស្អែកទេ វានឹងចេញនៅក្រោយញ៉ាំជាប្រចាំហ្នឹង ពី៤អាទិត្យ ទៅ៨អាទិត្យ។ ក្មេងដែលខ្ញុំជួបកន្លងទៅ ខ្លះដល់៤ខែ ៥ខែនោះ ទើបឃើញមានសភាពធ្ងន់ធ្ងរមែនទែន»។
ទារកមួយចំនួនបៅទឹកដោះគោម្សៅ Nutrilatt 1 បានធ្លាក់ខ្លួនឈឺ
លទ្ធផលអង្កេតដោយក្រុមវេជ្ជបណ្ឌិតនៃមន្ទីរពេទ្យ ដែលប្រភពបានផ្ដល់ឱ្យវីអូឌី បង្ហាញថា កុមារចំនួន ៣២នាក់ ប្រមាណ ៩៤% (ក្នុងចំណោម ៣៤ករណី) បានបៅទឹកដោះគោម៉ាកដូចគ្នា។ ២នាក់ផ្សេង បៅទឹកដោះគោម៉ាកផ្សេងពីគ្នា។ លទ្ធផលអង្កេតបង្ហាញដែរថា កុមារ ៤នាក់បានធ្លាក់ខ្លួនឈឺធ្ងន់ធ្ងរ ក្នុងចំណោម ៣២នោះ។ កុមារ ៤នាក់ដែលឈឺធ្ងន់នោះ មានខ្លះប៉ះពាល់មុខមាត់ ខ្លះប៉ះពាល់ក្បាល ឈឺបង្ហើយជាដើម។ ទោះជាយ៉ាងណាក្ដី ប្រភពពីមន្ទីរពេទ្យកុមារជាតិ សុំមិនប្រាប់ឈ្មោះទឹកដោះគោដែលទារកទាំង ៣២នាក់បៅនោះឡើយ។
ប៉ុន្តែ អ្នកសារព័ត៌មានវីអូឌីបានសាកសួរទៅកាន់ឪពុកម្ដាយរបស់ទារក ១៤នាក់ ក្នុងចំណោម ៣២នាក់នោះ ដោយពួកគាត់អះអាងដូចគ្នាថា កូនគាត់កើតជំងឺស្លេកស្លាំងដោយខ្វះជាតិដែកធ្ងន់ធ្ងរនេះ។ ពួកគាត់បញ្ជាក់ដូចគ្នាថា កូនរបស់ខ្លួនសុទ្ធតែបៅទឹកដោះគោម្សៅម៉ាក Nutrilatt 1។
ឪពុកម្ដាយទារកដែលឈឺ ហើយសម្រាកព្យាបាលនៅកុមារជាតិ បានសរសេរសារតវ៉ាជាច្រើនទៅកាន់ក្រុមហ៊ុនទឹកដោះគោ Nutrilatt។
អ្នកដែលបំបៅកូនដោយទឹកដោះគោ Nutrilatt លេខ ១ តវ៉ាតាមរយៈទំព័រហ្វេសប៊ុកផ្លូវការរបស់ទឹកដោះគោឈ្មោះថា Nutrilatt Cambodia ។ ឪពុកម្ដាយទាំងនោះលើកឡើងថា ទឹកដោះគោម្សៅ Nutrilatt ជាមូលហេតុបណ្ដាលឱ្យបុត្រធីតារបស់ពួកគេឈឺជំងឺស្លេកស្លាំងដោយកង្វះជាតិដែកធ្ងន់ធ្ងរ។ ឪពុកម្ដាយទាំងនោះបានទាមទារឱ្យក្រុមហ៊ុន នុតទ្រីលែតម៉ាស្ទ័រអិលអិម ឆ្លើយតប និងដោះស្រាយបញ្ហានេះ។
អ្នកស្រី ច័ន្ទ ផល្គុន ជាមនុស្សម្នាក់ដែលបានសរសេរជជែកតទល់វែកញែកពីស្ថានភាពជំងឺកូនប្រុសដែលបៅទឹកដោះគោ Nutrilatt 1 នេះ។ អ្នកស្រីប្រាប់វីអូឌីថា គាត់ចាប់ផ្ដើមបំបៅកូនដោយទឹកដោះគោម្សៅ Nutrilatt 1 តែមួយមុខគត់ តាំងពីកូនប្រុសមានអាយុជាង ២ខែ។
អ្នកស្រី ច័ន្ទ ផល្គុន ប្រាប់ថា៖ «ដំបូង អត់ហ៊ានបន្ទោសទឹកដោះគោគេទេ គិតថា ខ្លួនឯងមានជំងឺតំណពូជ អាឈាមសស៊ីឈាមក្រហមម៉េចនោះ ក៏នាំប្ដីប្រពន្ធទៅធ្វើតេស្ត លទ្ធផលចេញមកអវិជ្ជមានទាំងពីរ អត់មានជំងឺតំណពូជទេ។ គ្រូពេទ្យគាត់ប្រាប់ថា កូនហ្នឹងអត់មានបញ្ហាជំងឺតពូជទេ អ្វីដែលសំខាន់នោះគឺកូនបៅអី? គ្រូពេទ្យសួរថា កូនហ្អែងបៅអី ? ខ្ញុំប្រាប់ថា Nutrilatt គ្រូគាត់ថា ខាងក្រសួងបញ្ជាមកមន្ទីរពេទ្យអោយពិនិត្យទឹកដោះគោហ្នឹង ព្រោះលឺថា ក្មេងនៅគន្ធបុប្ផាក៏ឈឺខ្វះជាតិដែកច្រើនដែរ»។
អ្នកស្រីបន្តថា ខ្លួនបានជួបផ្ទាល់ជាមួយបុគ្គលិកក្រុមហ៊ុនលក់ទឹកដោះគោនេះកាលពីសប្ដាហ៍មុន នៅមន្ទីរពេទ្យកុមារជាតិ ក្នុងពេលដែលបុគ្គលិកក្រុមហ៊ុននោះទៅជួបពេទ្យដែរ។
ទន្ទឹមនឹងនេះ អតីតអតិថិជនទឹកដោះគោ Nutrilatt លោក សៅ សីហា ប្រាប់ថា គ្រួសារគាត់ចំណាយប្រាក់ជាង ១រយដុល្លារក្នុង១ខែ ទិញទឹកដោះគោឱ្យកូនបៅ។ លោកថា គ្រូពេទ្យជំនាញនៃមន្ទីរពេទ្យគន្ធបុប្ផាបានផ្ដល់យោបល់ជូនលោក ផ្ដល់ទឹកដោះគោផ្សេងឱ្យកូនញ៉ាំជំនួសវិញ។
លោក សៅ សីហា ប្រាប់ថា៖ «កូនខ្ញុំអាយុពី១ខែ ដល់ ៣ខែហ្នឹង មឹមទឹកដោះគោផង មឹមទឹកដោះម៉ាក់ផង ដល់ក្រោយបីខែ ម៉ាក់អត់មានទឹកដោះឱ្យញ៉ាំទេ ក៏បៅទឹកដោះគោសុទ្ធ ទឹកដោះគោ Nutrilatt លេខ១។ ពេទ្យគាត់ផ្ដល់យោបល់ឱ្យដូរ យើងដូរទឹកដោះគោហើយ នៅដំណាក់កាលតាមដាននៅឡើយទេ ខាងគន្ធបុប្ផាគាត់អោយទៅពិនិត្យឈាម ២ខែម្ដង តែខ្ញុំពិនិត្យឈាមពេទ្យផ្សេង ១ខែម្តងទៀត ការពារបើសិនកូនមានបញ្ហាអី យើងដឹងមុន»។
លោក សីហា បន្តថា ក្រុមហ៊ុនលក់ទឹកដោះគោ នុតទ្រីលែត បានទាក់ទងយកទឹកដោះគោពីលោកវិញ។
លោក សៅ សីហា និយាយថា៖ «ទឹកដោះគោនុតទ្រីលែតហ្នឹង នៅសល់ជិត ២កំប៉ុង ខាងបុគ្គលិកក្រុមហ៊ុន គេតេមក គេប្រាប់ថា គេយកទឹកដោះគោទៅពិនិត្យ តែមិនទាន់ឃើញមកយកនៅឡើយ»។
យ៉ាងណាក៏ដោយ ក្រុមហ៊ុនបានប្រកាសតាមរយៈមេធាវីរបស់ខ្លួនថា ការផ្សាយពីទារកកើតជំងឺ ដោយសារបៅទឹកដោះគោនេះ ជាព័ត៌មានមិនពិត និងមានចេតនាធ្វើឱ្យខូចឈ្មោះក្រុមហ៊ុន ។
មេធាវីរបស់ក្រុមហ៊ុន នុតទ្រីលែតម៉ាស្ទ័រអិលអិម បញ្ជាក់ក្នុងសេចក្ដីប្រកាសព័ត៌មាន កាលពីថ្ងៃទី៦ ខែឧសភាថា៖ «ទឹកដោះគោរបស់ខ្លួនមានការទទួលស្គាល់ត្រឹមត្រូវ ហើយក្រុមមេធាវីកំពុងសហការជាមួយសមត្ថកិច្ចជំនាញក្នុងការស្រាវជ្រាវរកប្រភពព័ត៌មានមិនពិត»។
២ថ្ងៃក្រោយមក គឺនៅថ្ងៃទី០៨ ខែឧសភា ក្រុមហ៊ុននេះ បានប្រកាសម្ដងទៀត ដោយអះអាងថា ខ្លួនបានយកទឹកដោះគោនេះទៅពិនិត្យនៅស្ថាប័នចំនួន៤ រួមមាន មន្ទីរពិសោធន៍ ក្រសួងសុខាភិបាល វិទ្យាស្ថានជាតិប៉ាស្ទ័រ មជ្ឈមណ្ឌលមន្ទីរពិសោធន៍ឧស្សាហកម្មកម្ពុជា មជ្ឈមណ្ឌលជាតិពិសោធន៍សុខាភិបាល។
ស្ត្រីជាបុគ្គលិកផ្នែកទំនាក់ទំនងនៃក្រុមហ៊ុនទឹកដោះគោ Nutrilatt ដែលថ្លែងដោយមិនបញ្ចេញឈ្មោះខ្លួនផងនោះ បានប្រាប់វីអូឌីតាមទូរសព្ទ ខ្លួនមិនអាចនិយាយលម្អិតបានទេ ដោយរង់ចាំលទ្ធផលចេញពីមន្ទីរពិសោធន៍សិន។
បុគ្គលិកនិយយថា៖ «រឿងទាំងអស់ហ្នឹង មេខ្ញុំកំពុងដោះស្រាយ គាត់មិនទាន់ឱ្យឆ្លើយតបប្រាប់អីទៅបងៗអ្នកកាសែតទេ រង់ចាំលទ្ធផលចេញមកសិន បានប្រាប់បាន»។
ដំណើរការផ្សាយពាណិជ្ជកម្មរបស់ទឹកដោះគោ Nutrilatt
ក្រុមហ៊ុនទឹកដោះគោ Nutrilatt ប្រកាសប្រាប់អតិថិជនរបស់ខ្លួនឱ្យអត់ធ្មត់រង់ចាំមើលលទ្ធផលទឹកពីមន្ទីរពិសោធន៍ជាមុនសិន ដោយអំពាវនាវឱ្យអតិថិជនអត់ធ្មត់។
ទន្ទឹមនឹងការរង់ចាំលទ្ធផលពិសោធន៍នេះ ក្រុមហ៊ុននៅដំណើរការលក់ទឹកដោះ Nutrilatt 1 ជាធម្មតា និងថែមទាំងផ្សាយពាណិជ្ជកម្មផ្ដល់រង្វាន់សម្រាប់អ្នកទិញថែមទៀតផង។
កម្មវិធីបន្ថែមរង្វាន់នេះចាប់ផ្ដើមនៅពេលទិញទឹកដោះគោពី ១កំប៉ុងឡើងទៅ។ ក្រុមហ៊ុននេះបន្ថែមទឹកដោះគោមួយកំប៉ុង បើសិនជាអតិថិជនទិញទឹកដោះគោ ៦កំប៉ុង។ មុនពេលមានបាតុភាពតវ៉ាពីសំណាក់អតិថិជន ក្រុមហ៊ុនចែកចាយទឹកដោះគោនេះបានអញ្ជើញតារាល្បីៗមួយចំនួនមកផ្សាយពាណិជ្ជកម្ម ដោយភ្ជាប់កិត្តិនាមទៅនឹងប្រទេសសឹង្ហបុរី។
តារាស្រីយ៉ាងហោចណាស់បីនាក់ បានលេចមុខក្នុងវីដេអូផ្សាយពាណិជ្ជកម្មនៃទឹកដោះគោនេះរួមមាន អ្នកនាង គង់ សុជាតិ តារាភាពយន្ត និងជាពិធីការនីល្បីឈ្មោះជាងមួយទសវត្សរ៍ អ្នកនាងគង់ ចាន់ស្រីមុំ តារាសម្ដែងដែលមានអ្នកគាំទ្ររាប់ម៉ឺននាក់ និងជាពិសេសតារាចម្រៀងល្បីឈ្មោះប្រចាំប្រទេស អ្នកនាង ឱក សុគន្ធកញ្ញា ដែលទើបតែផ្ដល់កំណើតឱ្យកូនប្រុសម្នាក់កាលពីឆ្នាំមុន។
វីដេអូផ្សាយពាណិជ្ជកម្មដែលផ្សាយលើហ្វេសប៊ុកកាលពី ៧ខែមុន អ្នកស្រី គង់ សុជាតិ បានចេញមុខរៀបរាប់ប្រាប់អ្នកទស្សនាថា កូនរបស់នាងកើតជំងឺខ្វះអង់ស៊ីម ហើយនាងជ្រើសរើសទឹកដោះគោនេះឱ្យកូនទទួលទាន ព្រោះទឹកដោះគោនេះល្អចំពោះកូន។
អ្នកនាងបញ្ចប់វីដេអូដោយនិយាយពាក្យស្លោកយីហោទឹកដោះគោថា៖ «នុតទ្រីលែតផ្តល់នូវភាពលូតលាស់ និងឆ្លាតវៃ នុតទ្រីលែតជាផលិតផលនាំចូលពីប្រទេសសិង្ហបុរី»។
ពាក្យផលិតផលសិង្ហបុរីនេះ ជាមូលហេតុមួយដែលនាំឱ្យអ្នកស្រី ច័ន្ទ ផល្គុន ជ្រើសយកទឹកដោះគោនេះឱ្យកូនទទួលទាន។
អ្នកស្រី ច័ន្ទ ផល្គុន ប្រាប់ថា៖ «ម្នាក់ៗគេទុកចិត្តទៅលើពាក្យសាំងហ្គាពួរ ខ្ញុំទិញដោយខ្ញុំគិតថាស្ដង់ដារសាំងហ្គាពួរ វាអាកាសធាតុត្រូវគ្នាអីត្រូវគ្នាជាមួយខ្មែរយើង ខ្ញុំគិតអីចឹងហើយឱ្យកូនបៅអាហ្នឹង»។
ចំណែក លោក សៅ សីហា វិញ អះអាងថា ខ្លួនឱ្យកូនបៅដោយសារមើលឃើញការពន្យល់ពីសារធាតុចិញ្ចឹមក្នុងសម្បកកំប៉ុងទឹកដោះ និងតាមការផ្សាយពាណិជ្ជកម្ម។
លោក សៅ សីហា ប្រាប់ថា៖ «ជ្រើសរើសប្រើទឹកដោះគោហ្នឹងដោយខ្លួនឯង ព្រោះមានគេអ្នកស្គាល់គ្នាហ្នឹងឱ្យកូនប្រើច្រើន ណាមួយទៀតតារាល្បីៗគាត់មកប្រូម៉ូតថា ឱ្យកូនគាត់ប្រើអាហ្នឹងអីចឹង ខ្ញុំ និងគ្រួសារក៏សម្រចឱ្យកូនមឹមទៅ»។
ក្នុងវីដេអូផ្សាយពាណិជ្ជកម្មតាមទូរទស្សន៍តាមខិតប័ណ្ណផ្សព្វផ្សាយមុនៗ ក្រុមហ៊ុនសុទ្ធតែបាន អះអាងថា ផលិតផលរបស់ខ្លួនជាផលិតផលរបស់ប្រទេសសិង្ហបុរី។
ក្រសួងសុខាភិបាលសិង្ហបុរី ប្រកាសជាសាធារណៈថា ប្រទេសដែនកោះមួយនេះអនុញ្ញាតឱ្យទឹកដោះគោម្សៅចំនួន ៦ក្រុមហ៊ុនឱ្យលក់លើទីផ្សារ តែមិនឃើញមានម៉ាកទឹកដោះគោ Nutrilatt នេះឡើយ។
តាមឯកសារដែលវីអូឌីទទួលបាន ទឹកដោះគោនេះមិនមែនជាផលិតផលសិង្ហបុរីទេ ហើយក៏មិនមានចរាចរណ៍នៅលើទីផ្សាររបស់ប្រទេសសិង្ហបុរីដែរ។
ទឹកដោះគោនេះផលិតនៅរោងចក្រមួយក្នុងប្រទេសម៉ាឡេស៊ី ប៉ុន្តែ ចុះបញ្ជីក្រុមហ៊ុននៅប្រទេសសិង្ហបុរី។ បុគ្គលិកទីផ្សាររបស់ក្រុមហ៊ុន ថ្លែងប្រាប់វីអូឌីថា ថ្វីត្បិតតែមិនមែនផលិតនៅសិង្ហបុរី តែជាផលិតផលផលិតតាមស្តង់ដារសិង្ហបុរី។
បើតាមច្បាប់ស្ដីពីកិច្ចការពារអ្នកប្រើប្រាស់ ត្រង់មាត្រា៣ លើកឡើងថា ជាអំពើមិនសុចរិត សំដៅដល់អំពើណាមួយក្នុងធុរកិច្ចដែលអាចបំភ័ន្ត ឬបោកបញ្ឆោតអ្នកប្រើប្រាស់ ទោះដោយចេតនា ឬអចេតនាក្ដី។ អំពើរាប់ថាមិនសុចរិតទាំងនោះ រួមមាន ការផ្សាយពាណិជ្ជកម្ម ការជំរុញការលក់ ធ្វើឱ្យអ្នកប្រើប្រាស់មានការភ័ន្តច្រឡំអំពីថ្លៃ តម្លៃ ឬគុណភាពនៃទំនិញ ឬសេវា។ល។
ច្បាប់ស្ដីកិច្ចការពារអ្នកប្រើប្រាស់ ក៏បានចែងពីកម្រិតទោសទណ្ឌរាប់តាំងពីការពិន័យរដ្ឋបាល ព្រមានជាលាយលក្ខណ៍អក្សរ ពិន័យជាទឹកប្រាក់ និងដាក់ពន្ធនាគារ ទៅតាមស្ថានទម្ងន់ទោសដែលតុលាការរកឃើញ។
ចំណាត់ការរបស់សមត្ថកិច្ចជំនាញចំពោះរឿងនេះ
របាយការណ៍របស់ យូនីសែហ្វប្រចាំនៅកម្ពុជា បង្ហាញថា អត្រានៃការបំបៅកូនដោយទឹកដោះគោកើនឡើងពីមួយឆ្នាំទៅមួយឆ្នាំ។
កាលពីឆ្នាំ២០១០ កម្ពុជា មានអត្រាទារកអាយុ ៦ខែ ៧៤% បានបៅទឹកដោះម្តាយ ខណៈក្មេងដែលបៅទឹកដោះគោមានប្រមាណ ២៦%។ ៤ឆ្នាំក្រោយមក នៅឆ្នាំ២០១៤ អត្រាបំបៅកូនដោយទឹកដោះម្ដាយធ្លាក់ចុះ មកត្រឹម ៦៥% នាំឱ្យអត្រាបំបៅកូនដោយទឹកដោះគោកើនឡើងរហូតដល់ ៣៥% ។
វីអូឌីមិនទាន់អាចស្វែករកព័ត៌មានពីចំនួនក្រុមហ៊ុនទឹកដោះគោម្សៅដែលកំពុងចរាចរលើទីផ្សារនៅកម្ពុជាឡើយ។ ប៉ុន្តែ គេសង្កេតឃើញថា នៅតាមផ្សារ តាមម៉ាត តាមឱសថស្ថានទូទាំងប្រទេស ភាគច្រើនបានដាក់តាំងលក់ម្សៅទឹកដោះគោសម្រាប់ទារក។
បន្ទាប់ពីទឹកដោះគោ Nutrilatt ត្រូវបានយកចូលមន្ទីរពិសោធន៍ នៅខាងក្រៅទីផ្សារឯណោះវិញ អ្នកលក់នានានៅតែបន្តលក់ទឹកដោះគោនេះជាធម្មតា។
ម្ចាស់ឱសថស្ថានមួយកន្លែងនៅភ្នំពេញ ដែលសុំមិនបញ្ចេញអត្តសញ្ញាណ បានប្រាប់វីអូឌីថា ខ្លួននៅបន្តលក់ជាធម្មតា ដោយសារតែមិនទាន់បានទទួលដំណឹងផ្លូវការ។
ឱសថការីរូបនេះ បញ្ជាក់ថា ឪពុកម្ដាយដែលធ្លាប់បំបៅកូនដោយទឹកដោះគោនេះ នៅតែមករកទិញ ពោលគឺមិនងាយហ៊ានប្ដូរទេ ដោយសារខ្លាចកូនឈឺ។
ឱសថការីរូបនេះ បញ្ជាក់ថា៖ «អ្នកទិញទឹកដោះគោហ្នឹងនៅធម្មតា ព្រោះមិនទាន់មានបញ្ហា ម៉ាក់ប៉ាគ្រប់គ្នាបើកូនស្រួល គាត់មិនងាយហ៊ានប្ដូរទឹកដោះគោទេ ខ្លាចឈឺថ្កាត់។ ខ្ញុំក៏ចាំមើលដែរ បើក្រសួងគេថាម៉េចៗនោះ នឹងអាលយកទឹកដោះគោនេះឱ្យក្រុមហ៊ុនវិញ។ ជាពេទ្យផង អ្នកលក់ផង មិនចង់ឱ្យម៉ូយមានបញ្ហាទេ យើងដឹងស្រាប់ហើយ បើគ្រួសារមួយមានកូនឈឺ ពិតជាវ៉ល់មិនខាន»។
ឪពុកម្ដាយមួយចំនួនបានផ្ញើសារ និងទូរសព្ទទៅកាន់ក្រុមហ៊ុន ដើម្បីចង់ដឹងលទ្ធផលពិសោធដែលក្រុមហ៊ុនអះអាងថា ខ្លួនបានយកទឹកដោះគោទៅពិសោធនោះ។
លោក សៅ សីហា ប្រាប់ថា គាត់ព្យាយាមចង់ដឹងព័ត៌មានបន្ថែមពីបញ្ហានេះ បើទោះជាកូនរបស់គាត់ឈប់បៅទឹកដោះគោនេះហើយក្ដី។
លោក សីហា បញ្ជាក់ថា៖ «ខ្ញុំសូមឱ្យក្រុមហ៊ុនទទួលខុសត្រូវចំពោះរឿងនេះ។ ហើយសូមអំពាវនាវឱ្យអាជ្ញាធររាជរដ្ឋាភិបាល ពិសេសក្រសួងធ្វើការងារនេះឱ្យមានតម្លាភាព និងប្រសិទ្ធភាព»។
អ្នកគ្រប់គ្រងក្រុមហ៊ុនទឹកដោះគោ Nutrilatt លោក ទឹម សុវណ្ណារ៉ា នៅថ្ងៃទី១៩ ខែឧសភា ថ្លែងប្រាប់វីអូឌី លោកកំពុងចាំលទ្ធផលពិសោធន៍សិន ទើបអាចបរិយាយលម្អិតបាន ។
លោក ទឹម សុវណ្ណារ៉ា មានប្រសាសន៍ថា៖ «ពួកយើងកំពុងរង់ចាំលទ្ធផលនៅថ្ងៃទី២១ បន្ទាប់មកទៀតទើបយើងមានចំណាត់ការបន្តជាមួយក្រសួងសុខាភិបាល។ ហើយរង់ចាំអនុសាសន៍ពីពួកគាត់ [ក្រសួងសុខាភិបាល] ថា តើយើងត្រូវធ្វើអ្វីបន្តទៀត» ។
វីអូឌីបានទាក់ទងទៅផ្នែកកិច្ចការសាធារណៈ នៃការិយាល័យអង្គការយូនីសែហ្វប្រចាំនៅកម្ពុជា ប៉ុន្តែ មិនមានការឆ្លើយតបចំពោះបញ្ហានេះទេ។
ចំណែកនាយកការិយាល័យអង្គការសុខភាពពិភពលោកប្រចាំនៅកម្ពុជា អ្នកស្រីវេជ្ជបណ្ឌិត លី អេឡាន (LI, Ailan) ឆ្លើយតាមរយៈអ៊ីម៉ែលថា អ្នកស្រីមិនអាចអត្ថាធិប្បាយរឿងនេះបានឡើយដោយបង្វែរសំណួរឱ្យសួរផ្ទាល់ទៅក្រសួងសុខាភិបាល។
លី អេឡាន (LI, Ailan) ប្រាប់ថា៖ «អរគុណច្រើនចំពោះសាររបស់អ្នក។ ខ្ញុំស្នើឱ្យអ្នកទាក់ទងក្រសួងសុខាភិបាលដោយផ្ទាល់លើបញ្ហានេះ»។
អ្នកនាំពាក្យ ២រូបនៃក្រសួងសុខាភិបាល គឺអ្នកស្រី ឱ វណ្ឌឌីន និងលោក លីសូវ៉ាន់ សុទ្ធតែប្រាប់ថា មិនមានយោបល់ចំពោះរឿងនេះទេ។
ចំណែកឯរដ្ឋលេខាធិការ និងជាប្រធានគណៈគ្រូពេទ្យកម្ពុជា លោកសាស្ត្រាចារ្យវេជ្ជបណ្ឌិត ធា គ្រុយ មានប្រសាសន៍ថា លោកមិនបានដឹងរឿងនេះលម្អិតឡើយ ប៉ុន្តែ គ្រាន់តែដឹងថា ក្រសួងសុខាភិបាលកំពុងធ្វើការលើបញ្ហានេះ។
សាស្ត្រាចារ្យវេជ្ជបណ្ឌិត ធា គ្រុយ និយាយថា៖ «ខ្ញុំអត់អាចបញ្ជាក់អីបានទេ ខាងពិសោធន៍គេកំពុងធ្វើរឿងហ្នឹងហើយ។ ត្រូវប្រយ័ត្នប្រយែងដែរ បើផ្សាយអីមិនស្រួលអីទៅ អាចខូចឈ្មោះផលិតផលគេ»។
នាយកអង្គការសម្ព័ន្ធគណនេយ្យភាពសង្គម លោក សន ជ័យ ស្នើឱ្យផ្នែកពាក់ព័ន្ធសិក្សាស្រាវជ្រាវរឿងនេះឱ្យបានច្បាស់ ដើម្បីការពារជីវិតកុមារកម្ពុជា។
លោក សន ជ័យ មានប្រសាសន៍ថា៖ «ខ្ញុំយល់ថា រឿងនេះជាបញ្ហាមួយដែលប៉ះពាល់ទៅដល់សុខភាពកុមារធ្ងន់ធ្ងរ យើងចង់ឱ្យមានការទទួលខុសត្រូវពីសំណាក់ក្រុមហ៊ុនផលិត និងចែកចាយទឹកដោះគោហ្នឹង ឱ្យពួកគេពិនិត្យគុណភាពឡើងវិញ និងទទួលខុសត្រូវនូវទង្វើខ្លួន។ បើសិនជាមិនដោះស្រាយបញ្ហានេះតាមរដ្ឋបាល ឬផ្លូវច្បាប់ឱ្យជ្រះស្រឡះទេ យើងបារម្ភថា កុមារកម្ពុជាកាន់តែច្រើនប្រឈមនឹងគ្រោះថ្នាក់»៕
