តំណាងអតីតបុគ្គលិកសណ្ឋាគារ The Great Duke បានឱ្យដឹងថា ពួកគេគ្រោងធ្វើបាតុកម្មជាថ្មីម្តងទៀតនៅថ្ងៃស្អែកនេះ និងគ្រោងប្ដឹងទៅតុលាការ បន្ទាប់ពីថៅកែមិនគោរពទៅតាមសេចក្តីបង្គាប់របស់ក្រុមប្រឹក្សាអាជ្ញាកណ្តាលកាលពីជាង ៥ខែមុន។
ប្រធានសហព័ន្ធសហជីពកម្មករ និយោជិតវិស័យទេសចរណ៍កម្ពុជាប្រចាំនៅសណ្ឋាគារ The Great Duke លោក ទូច កុសល ប្រាប់វីអូឌីនៅថ្ងៃនេះថា ជាង ៥ខែហើយ ដែលម្ចាស់សណ្ឋាគារមិនព្រមទូទាត់ប្រាក់អតីតភាពការងារជូនពួកគេជាង ១៥០នាក់។
លោកបន្តថា នៅអំឡុងពេលជាង ៥ខែកន្លងទៅនេះ ក្រសួងការងារក៏បានកោះហៅភាគីទាំងពីរជាថ្មីទៀត នៅថ្ងៃទី១៥ ខែឧសភានេះ ចូលរួមដោះស្រាយតាមសេចក្តីបង្គាប់របស់ក្រុមប្រឹក្សាអាជ្ញាកណ្តាលម្តងទៀត ដោយឱ្យភាគីថៅកែទូទាត់ប្រាក់អតីតភាពការងារជូនអតីតបុគ្គលិកចំនួន ៣ចំណុច ដើម្បីបញ្ចប់ជម្លោះ ប៉ុន្តែ ភាគីថៅកែមិនព្រមចូលខ្លួនមកដោះស្រាយនោះទេ។
ករណីនេះ លោក កុសល បញ្ជាក់ថា នៅថ្ងៃស្អែក ទី២១ ខែឧសភា ក្រុមអតីតបុគ្គលិកសណ្ឋាគារនេះ នឹងធ្វើបាតុកម្មនៅមុខសណ្ឋាគារជាថ្មីទៀត បើនៅតែមិនមានដំណោះស្រាយ។
លោកមានប្រសាសន៍ថា៖ «ចាំមើលស្អែក យើងនឹងតវ៉ា ប្រសិនបើមានដំណោះស្រាយ ពួកយើងអត់ប្តឹងទេ។ បើអត់មានដំណោះស្រាយ ពួកយើងនឹងប្តឹងទៅតុលាការបន្តទៀត»។
មេធាវីរបស់សណ្ឋាគារ The Great Duke លោក លី តៃសេង មានប្រសាសន៍ថា ដើមចមដែលនាំឱ្យសណ្ឋាគារមិនទាន់ទូទាត់ប្រាក់អតីតភាពការងារជូនអតីតបុគ្គលិក ដោយសារស្ថានភាពជំងឺកូវីដ១៩ ធ្វើឱ្យសណ្ឋាគាររកចំណូលមិនបាន។
ប៉ុន្តែ មេធាវីរូបនោះបញ្ជាក់ថា លោកស្វាគមន៍ភាគីអតីតបុគ្គលិកប្តឹងទៅតុលាការឱ្យដោះស្រាយតាមច្បាប់ ជាជាងធ្វើបាតុកម្មនៅតាមដងផ្លូវ។
លោកមានប្រសាសន៍ថា៖ «សំណូមពរថា ស្នើឱ្យគាត់ចូលរួមដោះស្រាយតាមនីតិវិធីច្បាប់ទៅ។ ការដែលគាត់យកជម្រើសដែលដើរតាមផ្លូវ ធ្វើបាតុកម្មតាមផ្លូវ មិនមែនជាជម្រើសតាមច្បាប់ទេ»។
អនុប្រធានផ្នែកអន្តរាគមន៍ និងដោះស្រាយបាតុកម្មកូដកម្មគ្រប់មុខសញ្ញានៃក្រសួងការងារ លោក អ៊ូ រតនា សុំមិនធ្វើការបកស្រាយជុំវិញករណីនេះ ដោយលោកថា ជាប់រវល់ប្រជុំ។
ចំណែក អ្នកនាំពាក្យក្រសួងការងារ លោក ហេង សួរ បានប្រាប់តាមតេឡេក្រាមនៅថ្ងៃនេះថា ក្រសួងមានសិទ្ធិត្រឹមតែសម្របសម្រួល និងអំពាវនាវឱ្យនិយោជកអនុវត្តតាមសេចក្តីបង្គាប់របស់ក្រុមប្រឹក្សាអាជ្ញាណ្តាលតែប៉ុណ្ណោះ។ លោកថា បើភាគីមិនព្រមធ្វើតាមការសម្របសម្រួលទេ ពួកគេមានសិទ្ធិប្តឹងទៅតុលាការចាត់វិធានការច្បាប់បន្តទៀត។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា មានប្រសាសន៍ថា តាមផ្លូវច្បាប់ ក្រសួងការងារត្រូវចាប់បង្ខំឱ្យភាគីសណ្ឋាគារអនុវត្តតាមសេចក្តីបង្គាប់របស់ក្រុមប្រឹក្សាអាជ្ញាកណ្តាល។ លោកថា បើក្រសួងមិនដោះស្រាយបញ្ហាឱ្យមានតម្លាភាពទេ ជាគំរូមិនល្អដល់អ្នកមានជម្លោះផ្សេងៗទៀត រវាងភាគីនិយោជិត និងនិយោជក។
លោកផ្តល់ជាអនុសាសន៍ថា៖ «បើសិនជាគេ [និយោជក] រំលោភច្បាប់ណាមួយ ហើយមានសហជីពប្តឹងទៅក្រសួងការងារ ឆ្លងកាត់ការផ្សះផ្សារ ឈានទៅដល់អាជ្ញាកណ្តាល គេ [និយោជក] មិនខ្វល់នឹងសេចក្តីបង្គាប់ជាប់កាតព្វកិច្ច ឬមិនជាប់កាតព្វកិច្ចទេ តែចុងក្រោយ គេអត់អនុវត្ត អីចឹងសេចក្តីបង្គាប់វាទៅជាក្រដាសមួយដុំឥតប្រយោជន៍។ ចំណុចទីពីរ រឿងផលវិបាករយៈពេលវែង វាធ្វើឱ្យរំលោភទៅលើច្បាប់ស្តីពីការងារផង រំលោភទៅលើរដ្ឋធម្មនុញ្ញផង រំលោភទៅលើអនុសញ្ញាស្នូលរបស់អង្គការពលកម្មអន្តរជាតិ ដែលកម្ពុជាយើងបានផ្តល់សច្ចាប័នយកមកអនុវត្ត»។
សណ្ឋាគារ The Great Duke ឬអតីតសណ្ឋាគារ អាំងទែកុងទីណង់តាល់ (InterContinental) បានប្រកាសបិទប្រតិបត្តិការអាជីវកម្មរបស់ខ្លួន កាលពីថ្ងៃទី៣១ ខែធ្នូ កាលពីឆ្នាំមុន បន្ទាប់ពីប្រតិបត្តិការអាជីវកម្មរបស់ខ្លួនអស់រយៈពេល ២៣ឆ្នាំ។
ក្រោយពីបិទទ្វារ មិនទាន់ទូទាត់ប្រាក់អតីតភាពការងារ ធ្វើឱ្យអតីតបុគ្គលិកនៅសណ្ឋាគារនេះ នាំគ្នាធ្វើញត្តិដាក់ទៅស្ថាប័នរដ្ឋ ដូចជា ក្រសួងការងារ ខុទ្ទកាល័យរដ្ឋាភិបាល និងដាក់ទៅក្រុមប្រឹក្សាអាជ្ញាកណ្តាល ដើម្បីជួយអន្តរាគមន៍ផងដែរ។
រហូតដល់ថ្ងៃទី២០ ខែកុម្ភៈ ឆ្នាំ២០២០ ប្រធានលេខាធិការដ្ឋានក្រុមប្រឹក្សាកណ្តាល បានចេញសេចក្តីសម្រេចជូនដំណឹងទៅភាគីកម្មករនិយោជិត និងភាគីនិយោជក ដើម្បីឱ្យនិយោជកផ្តល់សំណងដល់កម្មករនូវប្រាក់ដំណាច់ទូទាត់ជួសការជូនដំណឹងមុន និងប្រាក់រំលឹកអតីតភាពការងារមុនឆ្នាំ២០១៩ ដោយយកប្រាក់ឈ្នួលគោល និងប្រាក់បន្ទាប់បន្សំមកគណនាផងដែរ៕