កម្ពុជាបានសម្រេចបើកឱ្យជនបរទេសមកពីប្រទេសចំនួន ៦ មកពីតំបន់អឺរ៉ុប អាមេរិកខាងជើង និងអាស៊ី អាចធ្វើដំណើរចូលមកកម្ពុជាវិញបានហើយ ដែលនេះគឺជាសេចក្ដីសម្រេចកើតឡើងក្រោយពីកម្ពុជារកពុំឃើញករណីឆ្លងវីរុសកូរ៉ូណាថ្មី ហើយអ្នកជំងឺកូវីដ១៩ទាំងអស់នៅកម្ពុជា បានជាសះស្បើយឡើងវិញអស់ហើយ។
កម្ពុជាបានប្រកាសពីការរកឃើញអ្នកឆ្លងវីរុសកូរ៉ូណាសរុប ១២២ករណី ចាប់តាំងពីចុងខែមករាកន្លងមក ក្នុងនោះបានរកឃើញលើពលរដ្ឋកម្ពុជា ៥១នាក់ និងជនបរទេស ៧១នាក់ ហើយក្រសួងសុខាភិបាលបញ្ជាក់ថា ករណីឆ្លងភាគច្រើនលើសលប់ត្រូវបាននាំចូលពីបរទេស។
ខណៈដែលកម្ពុជាបានរកឃើញករណីឆ្លងកាន់តែច្រើននៅអំឡុងពាក់កណ្ដាលខែមីនាកន្លងមកនោះ កម្ពុជាក៏បានសម្រេចហាមឃាត់ជនបរទេសមកពី ៦ប្រទេស ធ្វើដំណើរចូលមកកម្ពុជា។ ជនបរទេសដែលកម្ពុជាហាមឃាត់នោះ មានជនបរទេសមកពីប្រទេសអ៊ីរ៉ង់ អ៊ីតាលី អាល្លឺម៉ង់ បារាំង អេស្ប៉ាញ និងអាមេរិក។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាល បានប្រកាសលុបចោលបម្រាមដែលបានហាមឃាត់ជនបរទេសមកពីប្រទេសទាំង ៦ខាងលើនេះ។
ទោះជាយ៉ាងណា ក្រសួងបញ្ជាក់ថា គ្រប់អ្នកដំណើរមកពីក្រៅប្រទេសទាំងអស់ ក្នុងនោះរួមទាំងពលរដ្ឋកម្ពុជាផងដែរ ត្រូវមានលិខិតពិនិត្យសុខភាពដែលបញ្ជាក់ថា គ្មានមេរោគកូវីដ១៩ ដែលចេញដោយប្រទេសសាម៉ីនៅក្នុងរយៈពេល ៧២ម៉ោង។
ជាងនេះទៅទៀត ក្រសួងសុខាភិបាលបញ្ជាក់ថា អ្នកដំណើរជាជនបរទេស ត្រូវមានធានារ៉ាប់រងដែលមានតម្លៃជាទឹកប្រាក់យ៉ាងតិច ៥ម៉ឺនដុល្លារ អំឡុងពេលស្នាក់នៅក្នុងប្រទេសកម្ពុជា និងគោរពតាមវិធានការកំណត់ដោយអាជ្ញាធរកម្ពុជា។
យ៉ាងណា ក្រសួងបញ្ជាក់ថា លក្ខខណ្ឌត្រង់ចំណុចទីពីរនេះ ត្រូវបានលើកលែងចំពោះមន្ត្រីការទូតតំណាងឱ្យប្រទេសនានា និងមន្ត្រីអង្គការអន្តរជាតិ ដែលកាន់ទិដ្ឋាការទាំង ២ប្រភេទរបស់កម្ពុជា។
ក្រសួងសុខាភិបាលបញ្ជាក់ទៀតថា រាល់អ្នកដំណើរមកពីក្រៅប្រទេសទាំងអស់ រួមទាំងពលរដ្ឋកម្ពុជាផងដែរ នឹងត្រូវដាក់ឱ្យស្ថិតនៅដាច់ដោយឡែករយៈពេល ១៤ថ្ងៃនៅក្នុង«មណ្ឌលរង់ចាំ» ដើម្បីធ្វើតេស្តរកមេរោគកូវីដ១៩។
នៅអំឡុងពាក់កណ្ដាលខែមីនាកន្លងមក ប្រទេសធំៗទាំង ៥ នៅតំបន់អឺរ៉ុប មានអ៊ីតាលី អេស្ប៉ាញ បារាំង និងអាល្លឺម៉ង់។ របាយការណ៍អង្គការសុខភាពពិភពលោក នៅថ្ងៃទី១៥ ខែមីនា បង្ហាញថា អ៊ីតាលីរកឃើញអ្នកឆ្លងវីរុសដល់ទៅជាង ២ម៉ឺនករណី ហើយមានមនុស្សស្លាប់ដល់ទៅជាង ១,៤៤១នាក់ ខណៈដែលអេស្ប៉ាញតាមពីក្រោយអ៊ីតាលី មានអ្នកឆ្លងជិត ៦ពាន់នាក់ និងអ្នកស្លាប់ ១៣៦នាក់។
នៅឯប្រទេសបារាំងវិញ មនុស្សដល់ទៅ ៤,៤៦៩នាក់ បានឆ្លងវីរុសកូរ៉ូណានៅពាក់កណ្ដាលខែមីនាកន្លងមក ខណៈមនុស្សស្លាប់ដោយសារវីរុសមានចំនួន ៩១នាក់។ នៅអាល្លឺម៉ង់ មានមនុស្សជិត ៤ពាន់នាក់ បានឆ្លងវីរុស ហើយវាបានសម្លាប់មនុស្ស ៨នាក់។
អំឡុងពេលនោះដែរ អ៊ីរ៉ង់រកឃើញអ្នកឆ្លងវីរុសនេះដល់ទៅជិត ១៣,០០០នាក់ ហើយអ្នកស្លាប់កើនឡើងដល់ជិត ៦០៨នាក់ ខណៈដែលអាមេរិករកឃើញអ្នកឆ្លង ១,៦៧៨នាក់ និងអ្នកស្លាប់ ៤១នាក់៕
