មេនគរបាលខេត្តកំពង់ឆ្នាំង បានឱ្យដឹងថា ម្ចាស់ប្រព័ន្ធផ្សព្វផ្សាយមួយដែលតែងតែផ្សាយពីរឿងជម្លោះដីធ្លីនៅខេត្តកំពង់ឆ្នាំង ត្រូវបានសមត្ថកិច្ចចាប់ខ្លួន និងបញ្ជូនទៅតុលាការនៅថ្ងៃនេះ ក្រោមការចោទប្រកាន់ពីបទ«ញុះញង់»។
ស្នងការនគរបាលខេត្តកំពង់ឆ្នាំង លោក ខូវ លី បានប្រាប់វីអូឌីនៅថ្ងៃនេះថា លោក សុខ ឧត្ដម ម្ចាស់ស្ថានីយវិទ្យុ 99.75MHz និងគេហទំព័រ «រិទ្ធិសែន» នៅខេត្តកំពង់ឆ្នាំង ត្រូវបានសមត្ថកិច្ចចាប់ខ្លួនកាលពីថ្ងៃទី១៣ ខែឧសភា ឆ្នាំ២០២០។
មន្ត្រីនគរបាលរូបនេះបន្ថែមថា សមត្ថកិច្ចនឹងបញ្ជូនសំណុំរឿងរបស់លោក សុខ ឧត្តម ទៅតុលាការនៅថ្ងៃនេះ ពាក់ព័ន្ធនឹងការចោទប្រកាន់ពីបទ «ញុះញង់» ឱ្យប្រជាពលរដ្ឋទៅកាន់កាប់ដីនៅតំបន់ដែនជម្រកសត្វព្រៃឱរ៉ាល់ ស្ថិតក្នុងស្រុកទឹកផុស ខេត្តកំពង់ឆ្នាំង។
លោក ខូវ លី ប្រាប់ថា៖ «គាត់ផ្សព្វផ្សាយញុះញង់ឱ្យប្រជាពលរដ្ឋទន្ទ្រានយកដីជម្រកសត្វព្រៃឱរ៉ាល់ នៅឃុំជៀប [ក្នុងស្រុកទឹកផុស ខេត្តកំពង់ឆ្នាំង]»។
ម្ចាស់ប្រព័ន្ធផ្សព្វផ្សាយមួយនេះ ត្រូវបានសមត្ថកិច្ចចាប់ខ្លួនបន្ទាប់ពីក្រសួងព័ត៌មានសម្រេចលុបចោលអាជ្ញាប័ណ្ណព័ត៌មានរបស់លោក សម្រាប់ស្ថានីយវិទ្យុ FM99.75MHz និងគេហទំព័រសារព័ត៌មាន«រិទ្ធិសែន»។
ក្នុងប្រកាសកាលពីថ្ងៃម្សិលមិញនេះ ក្រសួងចោទថា ម្ចាស់ស្ថានីយវិទ្យុ និងគេហទំព័ររូបនេះថា បានផ្សព្វផ្សាយព័ត៌មាន «បំផ្លើសការពិត ញុះញង់» ឱ្យកើតមានអំពើហិង្សា បង្កការរើសអើងពូជ សាសន៍ បង្កអសន្តិសុខ និងចលាចលនៅក្នុងសង្គម ដែលរំលោភបំពានលើក្រមសីលធម៌វិជ្ជាជីវៈ និងកិច្ចសន្យាដែលតម្កល់ទុកនៅក្រសួងព័ត៌មាន។
មេនគរបាលខេត្តកំពង់ឆ្នាំងរូបនេះ បានចាត់ទុកការផ្សព្វផ្សាយរបស់លោក សុខ ឧត្ដម ថាជាបទល្មើសជាក់ស្ដែង។
លោក ខូវ លី ប្រាប់បន្ថែមថា៖ «អប់រំអី អាហ្នឹងមានបទល្មើសហើយ បទល្មើសជាក់ស្ដែង»។
អ្នកនាំពាក្យក្រសួងព័ត៌មាន លោក មាស សុភ័ណ្ឌ ប្រាប់វីអូឌីកាលពីថ្ងៃម្សិលមិញថា មុននឹងក្រសួងសម្រេចលុបចោលអាជ្ញាប័ណ្ណរបស់លោក សុខ ឧត្ដម មន្ទីរព័ត៌មានខេត្តកំពង់ឆ្នាំង បានធ្វើការអប់រំ និងណែនាំច្រើនដងពាក់ព័ន្ធនឹងការចុះផ្សាយព័ត៌មានរបស់ស្ថាប័ននេះ។
លោក មាស សុភ័ណ្ឌ ប្រាប់ថា៖ «ក្រោយពីណែនាំអប់រំហ្នឹង យើងនៅតែសង្កេតឃើញថា ការផ្សព្វផ្សាយរបស់គាត់នៅតែប្រាសចាកក្រមសីលធម៌អ្នកសារព័ត៌មាន រំលោភកិច្ចសន្យាដែលខ្លួនបានតម្កល់នៅក្រសួងព័ត៌មាន និងមន្ទីរព័ត៌មាន។ អ៊ីចឹងបានក្រសួងប្រកាសលុបអាជ្ញាប័ណ្ណតែម្ដង»។
ប្រធានមន្ទីរព័ត៌មានខេត្តកំពង់ឆ្នាំង លោក ម៉ម ឈឿម សុំមិនធ្វើអត្ថាធិប្បាយចំពោះរឿងនេះទេ ដោយលោកជំរុញឱ្យទៅសួរអគ្គនាយកព័ត៌មាន និងសោតទស្សន៍ នៃក្រសួងព័ត៌មាន លោក ផុស សុវណ្ណ ដែលពុំបានលើកទទួលទូរសព្ទអ្នកសារព័ត៌មានវីអូឌីនោះឡើយនៅថ្ងៃនេះ។
វិទ្យុ FM99.75MHz និងសារព័ត៌មានអនឡាញ រិទ្ធិសែន របស់លោក សុខ ឧត្ដម ត្រូវបានក្រសួងព័ត៌មានផ្ដល់អាជ្ញាប័ណ្ណនៅឆ្នាំ២០១៤ និងនៅចុងឆ្នាំ២០១៨។
លោក សុខ ឧត្ដម បានផ្សាយលើទំព័រហ្វេសប៊ុកសារព័ត៌មានរបស់លោកកាលពីថ្ងៃម្សិលមិញ ដោយបានរិះគន់ទៅលើកង្វះការអនុវត្តច្បាប់មិនទាន់បានត្រឹមត្រូវរបស់ស្ថាប័នអនុវត្តច្បាប់នៅខេត្តកំពង់ឆ្នាំង ដែលលោកថា បណ្ដាលមកពីកត្តាគ្រួសារនិយម និងពាក់ព័ន្ធនឹងកត្តាលុយកាក់។
កាលពីថ្ងៃអង្គារកន្លងមកនេះ លោក សុខ ឧត្តម បានផ្សាយផ្ទាល់លើទំព័រហ្វេសប៊ុកសារព័ត៌មានរិទ្ធិសែន បង្ហាញពីការតវ៉ារបស់ពលរដ្ឋនៅមុខសាលាឃុំជៀប ស្ថិតក្នុងស្រុកទឹកផុស ទៅនឹងអាជ្ញាធរខេត្តកំពង់ឆ្នាំង ដែលអ្នកភូមិទាំងនោះចោទថា បានដកហូតដីធ្លីរបស់ពួកគាត់។
ក្នុងខ្លឹមសារវីដេអូឃ្លីបមានរយៈពេលជិត ៥០នាទី លោក សុខ ឧត្ដម បានផ្សាយថា៖ «យើងចង់សួរថា លោកអភិបាលខេត្តប្រជុំដកដីពីប្រជាពលរដ្ឋអាស្រ័យផល សួរថា លោកធ្វើនេះ លោកកំពុងហែកសន្លឹកឆ្នោតរបស់រាជរដ្ឋាភិបាល ឬមួយលោកជួយរាជរដ្ឋាភិបាលដែលឱ្យលោកធ្វើដូចនេះ»។
នៅថ្ងៃទី១១ ខែឧសភា ទំព័រហ្វេសប៊ុកសារព័ត៌មាន រិទ្ធិសែន បានផ្សាយពីសំណង់ខុសច្បាប់មួយ ដែលលោក សុខ ឧត្ដម អះអាងថា ជាសំណង់របស់ជនជាតិវៀតណាម ដែលសាងសង់ចំកណ្ដាលក្រុងកំពង់ឆ្នាំង សង់ចំពីលើស្ពានថ្ម ដែលភ្ជាប់ពីផ្សារលើទៅផ្សារក្រោម ស្ថិតក្នុងឃុំផ្សារឆ្នាំង។
សមាជិកសម្ព័ន្ធអ្នកសារព័ត៌មានកម្ពុជា (ខេមបូចា) អ្នកស្រី យន់ ស៊ីនាត និយាយថា ចំណាត់ការរបស់ក្រសួងក្នុងការលុបចោលអាជ្ញាប័ណ្ណ ហាក់ដូចជាសន្មត់ថា គាត់មានទោស ខណៈតុលាការមិនទាន់កាត់សេចក្ដីនៅឡើយនោះ។
អ្នកស្រី ស៊ីនាត និយាយបន្តថា ក្រសួងព័ត៌មានគួរតែរង់ចាំសេចក្ដីសម្រេចពីតុលាការជាមុនសិន មុននឹងលុបអាជ្ញាប័ណ្ណរបស់ប្រព័ន្ធផ្សព្វផ្សាយណាមួយ។
អ្នកស្រីចាត់ទុកសេចក្ដីសម្រេចដ៏ឆាប់រហ័សបែបនេះរបស់ក្រសួងព័ត៌មាន ជាការបំភិតបំភ័យលើប្រព័ន្ធផ្សព្វផ្សាយ និងអ្នកសារព័ត៌មានដែលហ៊ាននិយាយចំណុចខ្វះចន្លោះរបស់រដ្ឋាភិបាល និងអ្នកមានអំណាចមួយចំនួន។
អ្នកស្រី យន់ ស៊ីនាត និយាយថា៖ «សារព័ត៌មានណាដែលសរសេរពីការរិះគន់ពីភាពអវិជ្ជមាន ដើម្បីឱ្យមានការកែលម្អសង្គម ដើម្បីឱ្យសង្គមមានការរីកចម្រើន ហើយការផ្ដល់ព័ត៌មានពិតប្រាកដដើម្បីបម្រើផលប្រយោជន៍សាធារណៈ ដើម្បីឱ្យប្រជាពលរដ្ឋមានលទ្ធភាពក្នុងការធ្វើសេចក្ដីសម្រេចចិត្ត មានលក្ខណៈរិះគន់ក្នុងន័យស្ថាបនា មិនសូវមានការទទួលការស្វាគមន៍ទេ តែងតែទទួលការបង្រ្កាប បំភិតបំភ័យជារឿយៗ រហូតទៅដល់អ្នកសារព័ត៌មានជាប់ពន្ធនាគារ។ អាហ្នឹងជាការគំរាមទៅដល់សេរីភាពសារព័ត៌មាន»។
អ្នកសារព័ត៌មានកម្ពុជា ២រូបហើយ ត្រូវបានសមត្ថកិច្ចចាប់ខ្លួន ហើយស្ថាប័នសារព័ត៌មានអនឡាញចំនួន ៣ ត្រូវបានក្រសួងព័ត៌មានសម្រេចលុបចោលអាជ្ញាប័ណ្ណជាបន្តបន្ទាប់ចាប់តាំងពីដើមខែមេសាកន្លងមក។
និពន្ធនាយកសារព័ត៌មានអនឡាញ TVFB លោក សុវណ្ណ រិទ្ធី ត្រូវបានសមត្ថកិច្ចចាប់ខ្លួនកាលពីថ្ងៃទី៧ ខែមេសា ហើយត្រូវបានតុលាការចោទប្រកាន់ពីបទ«ញុះញង់»ផងដែរ ក្រោយពីបានដកស្រង់សម្ដីលោកនាយករដ្ឋមន្ត្រី ហ៊ុន សែន ដែលថ្លែងថា រដ្ឋាភិបាលគ្មានលទ្ធភាពជួយដល់ពលរដ្ឋរត់ម៉ូតូឌុបនោះឡើយ ហើយលោកជំរុញឱ្យពួកគេលក់យានយន្តរបស់ពួកគេសម្រាប់ដោះស្រាយបញ្ហាសិន។ ភ្លាមៗ សារព័ត៌មានអនឡាញ TVFB ត្រូវបានលុបចោលអាជ្ញាប័ណ្ណ។
២០ថ្ងៃក្រោយមក គេហទំព័រសារព័ត៌មាន ចក្រវាល ធីវី អនឡាញ (CKV TV Online) របស់លោក ចាន់ ឫទ្ធី ក៏ត្រូវបានក្រសួងព័ត៌មានលុបអាជ្ញាប័ណ្ណចោលដែរ ដោយក្រសួងថា សារព័ត៌មានមួយនេះ បានរំលោភយ៉ាង«ធ្ងន់ធ្ងរ»លើក្រមសីលធម៌វិជ្ជាជីវៈ និងបំពានលើកិច្ចសន្យា។
របាយការណ៍ប្រចាំឆ្នាំ២០២០ របស់អង្គការអ្នករាយការណ៍ព័ត៌មានគ្មានព្រំដែន (RSF) ដែលទើបចេញផ្សាយកាលពីខែមុន បង្ហាញថា សេរីភាពសារព័ត៌មាននៅកម្ពុជា បានធ្លាក់ចុះមួយលេខថែមទៀត មកនៅចំណាត់ថ្នាក់១៤៤ នៅឆ្នាំនេះ នៅក្នុងចំណោម ១៨០ប្រទេសនៅលើពិភពលោក។
បើធៀបនឹងបណ្ដាប្រទេសក្នុងតំបន់វិញ កម្រិតសេរីភាពសារព័ត៌មាននៅកម្ពុជា ទាបជាងថៃ ម៉ាឡេស៊ី ឥណ្ឌូនេស៊ី ហ្វីលីពីន លើកលែងតែសិង្ហបុរី វៀតណាម ប៊្រុយណេ និងឡាវប៉ុណ្ណោះ៕
