ឪពុកម្តាយមួយចំនួននៅតាមជនបទដែលកូនរៀនសាលារដ្ឋ បង្ហាញក្តីបារម្ភថា កូនពួកគាត់រៀនតាមទូរទស្សន៍ ឬតាមទូរសព្ទមិនបានផលល្អទេ ហើយតែងនាំគ្នាលេងច្រើនតាមក្រុម ដែលបារម្ភខ្លាចធ្លាក់ខ្លួនប្រើប្រាស់គ្រឿងញៀន ខណៈនៅតាមស្រុកភូមិពួកគាត់មានអ្នកជួញដូរ និងប្រើប្រាស់គ្រឿងញៀនច្រើនស្រាប់។
ម្តាយសិស្សម្នាក់នៅស្រុកកោះធំ ខេត្តកណ្តាល អ្នកស្រី ភា និយាយថា អំឡុងពេល ២ខែចុងក្រោយនេះ កូនៗរបស់គាត់ដែលរៀនថ្នាក់ទី៨ និងថ្នាក់ទី៥ មិនបានទៅរៀនដូចសព្វដងនោះទេ ដោយសារតែក្រសួងអប់រំប្រកាសបិទសាលារៀនមួយរយៈ ដើម្បីទប់ស្កាត់ការរីករាលដាលជំងឺកូវីដ១៩។
អ្នកស្រី ភា បង្ហាញការព្រួយបារម្ភថា បើក្រសួងអប់រំនៅតែបន្តបិទបែបនេះ អាចធ្វើឱ្យកូនៗគាត់ រួមទាំងក្មេងៗមួយចំនួនទៀតនៅក្នុងភូមិឃុំរបស់គាត់ ធ្លាក់ខ្លួនប្រើប្រាស់គ្រឿងញៀន និងអាចប្រព្រឹត្តអំពើល្មើសច្បាប់ផ្សេងៗទៀត។
អ្នកស្រីបង្ហាញការព្រួយបារម្ភដូចនេះថា៖ «គាត់ទំនេរច្រើន ដ៏ពេលទំនេរច្រើន ធ្វើឱ្យគាត់មានពេលវេលាដើរ ខ្លាចលេងល្បែង លេងបៀរ គ្រឿងញៀន ឬមួយជួបមិត្តភក្តិមិនល្អ ផឹកស៊ី វាអត់មានកន្លែងណាមួយល្អដំណើរការធ្វើឱ្យទៅផ្លូវល្អកើត»។
អ្នកស្រី ញឹម ខុម រស់នៅស្រុកព្រៃកប្បាស ខេត្តតាកែវ ដែលមានកូនប្រុសពីរនាក់រៀនថ្នាក់ទី២ និងថ្នាក់ទី៨ និយាយថា ចាប់ពីថ្ងៃដែលក្រសួងអប់រំប្រកាសបិទសាលារៀនបណ្តោះអាសន្ន ធ្វើឱ្យកូនរបស់គាត់ប្លែកជាងមុន និយាយមិនស្តាប់បង្គាប់ឪពុកម្តាយនោះទេ មួយថ្ងៃៗលេងតែហ្គេម និងដើរទៅផ្ទះគេ និងជួបជុំមិត្តភក្តិជាដើម។
ករណីទាំងនេះ អ្នកស្រី ស្នើទៅក្រសួងអប់រំបើកសាលារៀនវិញ ដើម្បីឱ្យកូនគាត់ និងក្មេងៗទៀត បានចូលរៀនយកចំណេះដឹងជួយដល់គ្រួសារ និងសង្គមជាតិឱ្យរីកចំរើន។
អ្នកស្រីស្នើដូចនេះថា៖ «ចង់ឱ្យបើក [សាលា] រៀនវិញ ក្រែងអនាគតបានធ្វើការបានលុយជួយគ្រួសារ ទិញនេះ ទិញនោះខ្លះទៅ យើងអត់ មានតែចំណេះហ្នឹងហើយជួយដល់សង្គម ជួយគ្រួសារ ជួយដល់ជាតិយើងទាំងអស់គ្នា»។
អ្នកនាំពាក្យក្រសួងអប់រំ លោក ឌី ខាំប៉ូលី មានប្រសាសន៍ថា បច្ចុប្បន្ននេះ ក្រសួងមិនទាន់មានគម្រោងបើកសាលារៀនឡើងវិញនោះទេ។ ប៉ុន្តែ លោកថា ក្រសួងក៏បានពិភាក្សាជាមួយក្រសួងសុខាភិបាល និងស្ថាប័នពាក់ព័ន្ធផ្សេងទៀត អំពីបញ្ហានេះដែរ តែក្រសួងសុខាភិបាលធ្លាប់បញ្ជាក់ថា សាលារៀនបើកឡើងវិញបាន លុះត្រាតែស្ថានភាពជំងឺកូវីដ១៩ មានការថមថយ ឬស្ងប់ស្ងាត់ទៅវិញ។
ដោយឡែក ទាក់ទងរឿងដែលឪពុកម្តាយសិស្សមួយចំនួនព្រួយបារម្ភខ្លាចកូនដើរលេងមិនសូវចូលផ្ទះនោះ លោក ខាំប៉ូលី ក៏បានអំពាវនាវទៅឪពុកម្តាយទាំងនោះ ធ្វើការអប់រំ ណែនាំឱ្យកូនរៀនតាមអនឡាញ ឬមើលទូរទស្សន៍ដែលក្រសួងចាក់ផ្សាយ ទើបទទួលផលវិជ្ជមាន។
លោកអំពាវនាវដូចនេះថា៖ «អ្វីដែលមាតាបិតាគួរចូលរួមនៅពេលនេះ ធ្វើម៉េចជួយថែទាំកូនចៅ ឱ្យបានល្អ ចៀសវាងការចេញក្រៅដែលមានហានិភ័យខ្ពស់ ហើយទីពីរចូលរួមជួយតាមដានការសិក្សារៀនសូត្ររបស់កូន តាមទូរទស្សន៍ក្តី តាមវិទ្យុក្តី យើងទទួលស្គាល់ទាំងអស់គ្នាថា ការសិក្សាបែបទម្រង់ថ្មីនៅក្នុងរយៈពេលដ៏ខ្លី ហើយក្នុងក្របខ័ណ្ឌទូទាំងប្រទេស វាប្រាកដណាស់នឹងជួយបញ្ហាប្រឈមមួយចំនួន»។
និយាយជារួម ពលរដ្ឋនៅស្រុកកោះធំ និងស្រុកព្រៃកប្បាសខេត្តតាកែវ និយាយប្រហាក់ប្រហែលគ្នាថា ការបើកបង្រៀនតាមអនឡាញ កូនសិស្សនៅតាមបណ្តាខេត្តដាច់ស្រយាលមួយចំនួន ជាពិសេសកូនរបស់ពួកគាត់នៅស្រុកស្រែ គឺឪពុកម្តាយមិនមានលុយទិញទូរសព្ទទំនើបឱ្យកូនរៀននោះទេ ដោយសារបញ្ហាជីវភាពក្រីក្រ។ ចំណែកអ្នកខ្លះដែលមានលទ្ធភាព ក៏បញ្ជាក់ថា កូនគាត់រៀនមិនចេះទេ។
គ្រឿងញៀនបច្ចុប្បន្នបានក្លាយជាក្តីកង្វល់ធំរបស់មាតាបិតា ក៏ដូចជារដ្ឋាភិបាល។ របាយការណ៍ក្រសួងមហាផ្ទៃ គិតត្រឹមខែឧសភា ឆ្នាំ២០២០នេះ មានអ្នកជាប់ឃុំជិត ៤ម៉ឺននាក់ ក្នុងនោះ ១ភាគ៣ ឬស្មើជាង ១ម៉ឺននាក់ ពាក់ព័ន្ធគ្រឿងញៀន។ នៅសប្តាហ៍មុន ដោយសារបញ្ហាចង្អៀតខ្លាំងនៅកន្លែងឃុំឃាំង ក្រសួងមហាផ្ទៃ និងក្រសួងយុត្តិធម៌ក៏ប្រជុំគ្នារកដំណោះស្រាយ។
ប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី មានប្រសាសន៍ថា នៅថ្ងៃនេះ លោកស្រីបានចាត់ក្រុមការងារឱ្យផ្ញើលិខិតទៅក្រសួងអប់រំ ដើម្បីសុំឱ្យបើកសាលារៀនឡើងវិញផងដែរ។ លោកស្រីក៏បង្ហាញការព្រួយបារម្ភដូចឪពុកម្តាយសិស្សមួយចំនួន ដែលថា ខ្លាចកូនមិនបានរៀន នាំគ្នាប្រព្រឹត្តអំពើខុសច្បាប់ជាដើម។
ចំណែក រឿងកម្មវិធីរបស់ក្រសួងអប់រំដែលដាក់ឱ្យបង្រៀនតាមអនឡាញ ជាពិសេសលើបណ្តាញសង្គមនោះ មិនទទួលបានផលវិជ្ជមានច្រើននោះទេ ដោយសារឪពុកម្តាយសិស្សខ្លះគ្មានលទ្ធភាពទិញទូរសព្ទទំនើបឱ្យកូនរៀន និងកន្លែងខ្លះនៅតំបន់ដាច់ស្រយាលមិនមានសេវាជាដើម។
លោកស្រីនិយាយថា៖ «ការរៀនអនឡាញ សេវាទូរសព្ទ [កន្លែងខ្លះ] អត់ដំណើរការ សូម្បីតែកន្លែងខ្ញុំជិតបង្កើយ មើលអត់ឃើញផង ទម្រាំនៅតំបន់ដាច់ស្រយាលទៀត។ ទីពីរ ការប្រឈមរបស់ពួកគាត់ ឪពុកម្តាយ មានលុយឯណានឹងទិញទូរសព្ទទំនើប ដែលមើលឃើញអ៊ីនធឺណិតឱ្យសិស្ស កូនៗគាត់ ហើយឥលូវកំពុងជួបវិបត្តិកូវីដផង ឥលូវមកចំការអនុវត្តច្បាប់ចរាចរណ៍ទៀតធ្វើឱ្យពួកគាត់ក្រីក្រកាន់តែក្រីក្រទៅ»។
លោក ប៉ា ចន្ទរឿន អ្នកឃ្លាំមើលពីការអភិវឌ្ឍ យល់ឃើញថា បើមិនមានដំណោះស្រាយអ្វីផ្សេង ខណៈសាលារៀនបិទទ្វារ នោះសិស្សអាចប្រព្រឹត្តអំពើអបាយមុខផ្សេងៗ នាំឱ្យប៉ះពាល់ធ្ងន់ធ្ងរដល់គ្រួសារ និងសង្គមជាតិ។
លោក ប៉ា ចន្ទរឿន៖ «ប្រសិនជាសកម្មភាពនៃការប្រើប្រាស់សេពគ្រឿងស្រវឹង និងគ្រឿងញៀនវាខ្លាំងពេក វាអាចធ្វើឱ្យប៉ះពាល់ទាំងសុខភាពផ្លូវកាយផ្លូវចិត្តយុវជន ដែលជាសិស្សានុសិស្សរបស់យើង លើសពីនេះទៀត បន្ទាប់ពីគាត់ញៀនគ្រឿងញៀន និងគ្រឿងស្រវឹងហើយ គាត់អាចបង្កជាបញ្ហា អំពើហិង្សា ការលួច ការប្លន់ រហូតដល់មានការវាយដំគ្នាឱ្យរងរបួស ក៏ដូចជាគ្រោះថ្នាក់ចរាចរណ៍។»
កាលពីចុងខែមេសា ឆ្នាំ២០២០ អង្គការអន្តរជាតិប្រមាណ ១០ រួមមានទាំង វើលវីសិន (World Vison) សេវ ឌឹ ឆៀលត្រេន (Save The Children) និងឆៀលហ្វាន់ (ChildFund) ជាដើម បានចេញរបាយការណ៍ដោយបង្ហាញក្តីបារម្ភថា ក្នុងអំឡុងពេលតំបន់ និងពិភពលោកបិទសាលារៀនដោយសារមេរោគកូវីដនេះ ធ្វើឱ្យមានអំពើហិង្សាលើសិស្សសាលា ពិសេសសិស្សស្រី នៅក្នុងបណ្តាប្រទេសសមាជិកអាស៊ាន កើនឡើងពី៣០ ទៅ៥០%។
ទិន្នន័យស្ថិតិចងក្រងដោយក្រសួងអប់រំឆ្នាំសិក្សា២០១៩ បង្ហាញថា កម្ពុជាមានគ្រឹះស្ថានអប់រំចំណេះទូទៅ និងមត្តេយ្យសាធារណៈចំនួនជាង ១៣៣០០ ក្នុងនោះ សាលារៀននៅតំបន់ទីប្រជុំជនមាន ១៤២២ និងសាលារៀននៅទីជនបទមាន ១១ ៨៧៨។
សាលារៀនទាំងអស់បានចាប់ផ្ដើមបិទទ្វារតាំងពីថ្ងៃទី១៦ ខែមីនា ដើម្បីទប់ស្កាត់ការឆ្លងរីករាលដាលនៃមេរោគកូវីដ១៩។ ជាងមួយខែក្រោយមក គឺនៅថ្ងៃទី១៧ ខែមេសា ក្រសួងអប់រំបានប្រកាសពន្យារពេលចូលរៀនឡើងវិញ ដោយមិនទាន់កំណត់កាលបរិច្ឆេទចូលរៀននៅឡើយទេ៕