កម្មករ-កម្មការិនីបម្រើការងារនៅរោងចក្រមួយ នៅខណ្ឌពោធិ៍សែនជ័យ រាជធានីភ្នំពេញ បានផ្ទុះការតវ៉ា ក្រោយពីថៅកែបើកប្រាក់ឈ្នួលជូនពួកគេយឺតយ៉ាវ ហើយថា ពេលនេះពួកគាត់ជួបការលំបាក មិនមានលុយគ្រប់គ្រាន់សម្រាប់ទិញអាហារហូប និងឱ្យថ្លៃបន្ទប់ជួលទេ ខណៈលុយដែលរដ្ឋសន្យាផ្តល់ ៧០ដុល្លារពេលព្យួរការងារនោះ ក៏មិនទទួលបានដែរ។
កម្មករ-កម្មការិនីបម្រើការងារនៅរោងចក្រ សឺពីយ៉ា (SEPIA) ស្ថិតក្នុងភូមិត្រពាំងជ្រៃ សង្កាត់កាកាប បាននាំគ្នាតវ៉ាមុខរោងចក្រចំនួន ២ថ្ងៃហើយ តាំងពីម្សិលមិញ និងថ្ងៃនេះ ដើម្បីទាមទារទៅថៅកែឱ្យបើកប្រាក់ឈ្នួលជូនពួកគេតាមកាលកំណត់។
កម្មការិនីផ្នែកតុកាត់ អ្នកស្រី ហែម សេរីសុភាព ដែលអះអាងថា បម្រើការងារនៅរោងចក្រ សឺពីយ៉ា ៨ឆ្នាំ ប្រាប់វីអូឌីមុខរោងចក្រថា ថៅកែបានព្យួរការងារកម្មកររយៈពេល ១ខែហើយ តាំងពីថ្ងៃទី១៤ ខែមេសា ដោយកំណត់ចូលវិញនៅថ្ងៃទី១៧ ខែឧសភាខាងមុខនេះ។
កម្មការិនីរូបនេះអះអាងថា រយៈពេលព្យួរការងារយៈពេល ១ខែ គឺថៅកែមិនទាន់បើកប្រាក់ឈ្នួលអំឡុងពេលព្យួរការងារនោះជូនកម្មករនៅឡើយទេ ខណៈដែលថ្ងៃកំណត់បើកប្រាក់ឈ្នួលនោះ បានរំលងផុតទៅរយៈពេល ៤ថ្ងៃហើយ។
អ្នកស្រីបន្ថែមថា៖ «ខ្ញុំសុំឱ្យខាងក្រសួងហ្នឹង គាត់ពន្លឿនចុះមកចរចាជាមួយខាងរោងចក្រ ដោយជំរុញទៅខាងរោងចក្រពន្លឿនការដោះស្រាយជាមួយពួកខ្ញុំ ដោយសារពួកខ្ញុំលំបាកមែនទែនរាល់ថ្ងៃនេះ ការងារក៏អត់មានធ្វើ ហើយត្រូវមករង់ចាំការដោះស្រាយអីចឹងរហូត។ ហើយសម្រាប់ផលលំបាកពួកខ្ញុំហ្នឹង គឺអត់លុយបង់ថ្លៃផ្ទះ អត់លុយទិញរបស់ញ៉ាំប្រចាំថ្ងៃ និងតម្រូវការចំណាយផ្សេងៗទៀត»។
លោក ហួន ហ៊ីម ដែលអះអាងថា ជាតំណាងកម្មករ បានប្រាប់វីអូឌីថា ក្រោយប្រកាសព្យួរការងារកម្មករទាំងអស់ គឺថៅកែបានសន្យាបើកលុយឱ្យនៅថ្ងៃទី៩ ខែឧសភានេះ ប៉ុន្តែ ពេលដល់ថ្ងៃកំណត់បើកហើយ គឺថៅកែបានសុំពន្យារពេលបើកលុយនោះឱ្យកម្មករនៅថ្ងៃទី២ ខែមិថុនាវិញ ប៉ុន្តែ កម្មករមិនព្រមនោះទេ ទើបផ្ទុះការតវ៉ា។
តំណាងកម្មកររូបនេះឱ្យដឹងថា ពាក់ព័ន្ធវិវាទការងារនេះ គឺក្រុមកម្មករបានប្តឹងទៅក្រសួងការងាររួចហើយកាលពីម្សិលមិញ ដើម្បីសុំអន្តរាគមន៍ពីក្រសួងជួយដោះស្រាយ ខណៈកម្មករមួយចំនួនកំពុងខ្វះលុយបង់ថ្លៃបន្ទប់ជួល និងការចំណាយផ្សេងៗប្រចាំថ្ងៃក្នុងគ្រួសារ។
លោកបន្ថែមថា៖ «ពីព្រោះកម្មករ ពួកគាត់កំពុងអត់លុយបង់ថ្លៃផ្ទះជួល ទឹកភ្លើងទេ។ គាត់ចាំតែមកបើកប្រាក់ខែយកឱ្យផ្ទះជួលគេ ពីព្រោះគាត់សម្រាកពីការងារកន្លះខែហើយ។ អ្នកខ្លះត្រូវម្ចាស់ផ្ទះជួលបណ្តេញចេញ ហើយរើអីវ៉ាន់ទៅសិន និងអ្នកខ្លះក៏នៅរង់ចាំសិនទៅ»។
បើតាមលោក ហួន ហ៊ីម រោងចក្រ សឺពីយ៉ា មានកម្មករប្រហែល ៦០០នាក់ ត្រូវបានថៅកែព្យួរការងារទាំងអស់គ្នា តាំងពីថ្ងៃទី១៤ ខែមេសា។ លោកថា លុយ ៧០ដុល្លារដែលរដ្ឋាភិបាលប្រកាសផ្តល់ឱ្យកម្មករអំឡុងពេលព្យួរការងារនោះ គឺកម្មករមិនទាន់ទទួលបាននៅឡើយទេ។
វីអូឌីមិនអាចសុំការបញ្ជាក់ពីប្រធានរដ្ឋបាលរោងចក្រ សឺពីយ៉ា ដែលកម្មករប្រាប់ថា ឈ្មោះ ថេន បានទេ ដោយទូរសព្ទចូលគ្មានអ្នកទទួល។
ប៉ុន្តែ អ្នកគ្រប់គ្រងទូទៅនៅរោងចក្រនេះ លោក ណៃ ឌឿន ប្រាប់វីអូឌីថា មូលហេតុដែលរោងចក្របើកលុយឱ្យកម្មករយឺតយ៉ាវនេះ ដោយសារគ្មានអ្នកបញ្ជាទិញ និងអ្នកបញ្ជាទិញមួយចំនួនមិនទាន់សងលុយត្រឡប់មកវិញ ក្រោយទទួលបានទំនិញរួចហើយ។
អ្នកគ្រប់គ្រងទូទៅរូបនេះ អះអាងថា ក្រុមហ៊ុនអាចនឹងបន្តព្យួរការងារកម្មករបន្តទៀត ប្រសិនបើនៅតែគ្មានការបញ្ជាទិញតទៅទៀតនោះ។
លោកបន្ថែមថា៖ «ក្រុមហ៊ុនអត់ទាន់មានលទ្ធភាពបង់លុយឱ្យកម្មករនៅឡើយទេ ដោយសារម្ចាស់ខោអាវហ្នឹងគេសន្យាវេលុយឱ្យចុងខែ ៥ហ្នឹង។ អីចឹងហើយបានជាខាងក្រុមហ៊ុនសុំពន្យារពេលបើកលុយឱ្យកម្មករដល់ចុងខែ ៦ហ្នឹង។ បើសិនជាគ្មានភ្ញៀវបញ្ជាទិញទេ ប្រហែលជាអាចឈប់សម្រាកបន្តទៀត ឬក៏បន្តព្យួរការងារកម្មករទៀត»។
កាលពីថ្ងៃទី៨ ខែឧសភា សមាគមរោងចក្រកាត់ដេរនៅកម្ពុជា (GMAC) បានលើកឡើងថា ឧស្សាហកម្មកាត់ដេរសម្លៀកបំពាក់ ផលិតស្បែកជើង និងផលិតផលផ្សេងទៀតនៅកម្ពុជា កំពុងរងផលប៉ះពាល់យ៉ាងធ្ងន់ធ្ងរ ដោយសារតែគ្មានអ្នកបញ្ជាទិញ ខណៈដែលជំងឺកូវីដ១៩ កំពុងរីករាលដាល។
សមាគមមួយនេះ អះអាងថា ដោយសារឧស្សាហកម្មនេះរងគ្រោះធ្ងន់ធ្ងរពេក បានធ្វើឱ្យរោងចក្រចំនួន ១៨០ បានព្យួរផលិតកម្មរបស់ខ្លួន ខណៈរោងចក្រចំនួន ៦០ផ្សេងទៀត នឹងព្យួរផលិតកម្មរបស់ខ្លួននៅពេលខាងមុខដែរ ដោយសារមិនអាចទ្រទ្រង់បាននូវបន្ទុកចំណាយរបស់រោងចក្រ ខណៈចំណូលរបស់ពួកគេកាន់តែធ្លាក់ចុះខ្លាំង។
កាលពីថ្ងៃទី៧ ខែមេសា លោកនាយករដ្ឋមន្ត្រី ហ៊ុន សែន ប្រកាសថា អំឡុងពេលព្យួរការងារ កម្មករត្រូវទទួលបានប្រាក់ ៧០ដុល្លារ ប៉ុន្តែ ក្រុមសហជីពទាមទារឱ្យរដ្ឋាភិបាលរក្សាការផ្តល់ប្រាក់ឈ្នួលគោលប្រចាំខែយ៉ាងតិច ៦០ភាគរយ ជូនកម្មករ ដោយរដ្ឋាភិបាលចេញ ២០ភាគរយ និងនិយោជក ៤០ភាគរយ នៃប្រាក់ឈ្នួលគោលរបស់កម្មករគ្រប់វិស័យ នៅអំឡុងពេលនៃការព្យួរការងារនោះ ដោយពួកគេអះអាងថា ប្រាក់ឧបត្ថម្ភត្រឹម ៧០ដុល្លារនោះ មិនអាចទ្រទ្រង់ជីវភាពកម្មករបានសមរម្យទេ៕