ប្រទេសកម្ពុជាត្រូវបានស្នើដាក់បញ្ចូលទៅក្នុងបញ្ជីនៃបណ្ដាប្រទេសដែលសហភាពអឺរ៉ុបត្រូវបង្កើនការត្រួតពិនិត្យលើការលាងលុយកខ្វក់។ នេះបើតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters កាលពីពីរថ្ងៃមុន។
ទីភ្នាក់ងារសារព័ត៌មានអង់គ្លេសមួយនេះ បានចុះផ្សាយថា គណៈកម្មការអឺរ៉ុប មានបំណងរឹតបន្តឹងការត្រួតពិនិត្យរបស់ខ្លួនទៅលើបណ្ដាប្រទេសនានា ដែលប្រឈមមុខនឹងការលាងលុយកខ្វក់ ហើយដើម្បីត្រួតពិនិត្យឱ្យបានតឹងរ៉ឹងលើឧក្រិដ្ឋកម្មហិរញ្ញវត្ថុនេះ សហភាពអឺរ៉ុបស្នើបង្កើតស្ថាប័នថ្មីមួយ។
Reuters បានចុះផ្សាយបែបនេះផ្អែកលើខ្លឹមសារនៃសំណើឯកសារនានា ដែលទីភ្នាក់ងារសារព័ត៌មានមួយនេះទទួលបាន ហើយគ្រោងផ្សព្វផ្សាយនៅថ្ងៃព្រហស្បតិ៍នេះ។
បើតាមសេចក្ដីរាយការណ៍នេះ ប្រទេសកម្ពុជា ត្រូវបានលើកឡើងផងដែរនៅក្នុងចំណោមប្រទេស ១១ផ្សេងទៀតនៅទូទាំងពិភពលោក ដែលត្រូវបានស្នើដាក់បញ្ចូលទៅក្នុងបញ្ជីនៃប្រទេស «ដែលបង្កការគំរាមកំហែងខ្លាំងទៅដល់ប្រព័ន្ធហិរញ្ញវត្ថុរបស់សហភាពអឺរ៉ុប» ដោយសារបរាជ័យក្នុងការលុបបំបាត់ការលាងលុយកខ្វក់ និងការផ្ដល់លុយគាំទ្រដល់ចលនាភេរវកម្ម។
បើតាម Reuters វិធានការថ្មីនេះនឹងត្រូវចាប់ផ្ដើមអនុវត្តចាប់ពីខែតុលាខាងមុខនេះ ដោយសារបញ្ហាដែលបណ្ដាលមកពីការរីករាលដាលនៃវីរុសកូរ៉ូណានាពេលបច្ចុប្បន្ននេះ។
នៅពេលសំណើនេះត្រូវបានអនុម័ត ធនាគារ ក្រុមហ៊ុនហិរញ្ញវត្ថុ និងក្រុមហ៊ុនសវនាកម្មផ្សេងៗ នឹងជាប់កាតព្វកិច្ចដែលតម្រូវឱ្យពិនិត្យមើលឱ្យបានខ្លាំងថែមទៀតទៅលើអតិថិជនរបស់ពួកគេ ដែលមានទំនាក់ទំនងនឹងបណ្ដាប្រទេសស្ថិតក្នុងសំណើនេះ។ ក្រុមហ៊ុននានានៅតាមបណ្ដាប្រទេសស្ថិតក្នុងបញ្ជីនេះ ក៏នឹងត្រូវហាមឃាត់លើការទទួលយកមូលនិធិពីសហភាពអឺរ៉ុបផងដែរ។
Reuters រាយការណ៍បន្ថែមថា សព្វថ្ងៃនេះ ប្រទេសដែលជាប់ក្នុងបញ្ជីខ្មៅរបស់សហភាពអឺរ៉ុបរួចហើយនោះមាន អាហ្វហ្គានីស្ថាន អ៊ីរ៉ាក់ អ៊ីរ៉ង់ ប៉ាគីស្ថាន ស៊ីរី យេម៉ែន កូរ៉េខាងជើង អ៊ូហ្គាន់ដា វ៉ានូទូ ដែនដីទ្រីនីដាត និងតូបាហ្កូ។
អ្នកនាំពាក្យក្រសួងការបរទេស លោក កុយ គួង សុំមិនបកស្រាយទេ ហើយបង្វែរឱ្យទៅសួរខាងក្រសួងសេដ្ឋកិច្ច និងហិរញ្ញវត្ថុវិញ។ រដ្ឋលេខាធិការក្រសួងសេដ្ឋកិច្ច លោក មាស សុខសេនសាន អះអាងថា ជាប់ប្រជុំ។
រដ្ឋលេខាធិការក្រសួងមហាផ្ទៃ លោក ងឺ ច័ន្ទផល ចាត់ទុកការចុះផ្សាយរបស់ Reuters អាចជាការភាន់ច្រឡំ ដោយថា មិនមានការស្នើបែបនេះទេ តែថា កម្ពុជាត្រូវបានគេដាក់ចូលក្នុងបញ្ជីប្រផេះតាំងឆ្នាំ២០១៥។
មន្ត្រីរដ្ឋាភិបាលរូបនេះ បញ្ជាក់ថា បញ្ហានេះ រដ្ឋាភិបាលបានធ្វើច្បាប់មួយចំនួនរួចហើយ និងបានពង្រឹងវិធានការ ដើម្បីទប់ស្កាត់ និងបង្ក្រាបជនល្មើសមួយចំនួន ដែលនាំលុយខុសច្បាប់ចូលកម្ពុជា ឆ្លើយតបទៅនឹងលក្ខខណ្ឌទំាងនោះហើយ។
លោកថា៖ «អត់មានព្រឹត្តិការណ៍អីថ្មីទេ អាហ្នឹងគ្រាន់ថា យើងខិតខំធ្វើទៅតាមលក្ខខណ្ឌដែលគេឱ្យយើងធ្វើ វាតែប៉ុណ្ណឹងទេ»។
អគ្គនាយកដ្ឋានអន្តោប្រវេសន៍ លោក គៀត ច័ន្ធថារិទ្ធ មានប្រសាសន៍ថា មកដល់ពេលនេះ កម្ពុជាបង្ក្រាបបាន ៤ទៅ ៥ករណី និងរឹបអូសបានលុយខុសច្បាប់ប្រមាណ ៧លាន ៤សែនដុល្លារ។
អ្នកវិភាគនយោបាយ លោក ឯម សុវណ្ណរ៉ា បង្ហាញការព្រួយបារម្ភថា បើកម្ពុជាត្រូវដាក់ចូលក្នុងបញ្ជីខ្មៅនៃការលាងលុយកខ្វក់មែន វានឹងជួបហានិភ័យដល់វិស័យធនាគារ និងការទាក់ទាញអ្នកវិនិយោគ។
លោកថា៖ «គេដាក់យើងក្នុងបញ្ជីខ្មៅ យើងពិបាកក្នុងការចរាចរលុយ ដូចជាផ្ទេរលុយ ឬហិរញ្ញប្បទានចុះឡើងដើម្បីវិនិយោគហ្នឹង គឺអ្នកវិនិយោគទាំងឡាយ គេពិបាកមករកស៊ីជាមួយយើងណាស់។ កាលណាមករកស៊ីជាមួយយើង ត្រូវបានគេអង្កេតរកប្រភពលុយហ្នឹងមកពីណាៗ រកភាពច្បាស់លាស់។ អាហ្នឹងគេហៅថា កម្រិតមិនស្មើភាពលើឆាកអន្តរជាតិ»។
សំណើវិធានការនេះ នឹងចូលជាធរមាននៅខែតុលាខាងមុខ។ ចំណែកស្ថាប័នត្រួតពិនិត្យថ្មី នឹងត្រូវ EU រៀបចំឡើងនៅឆ្នាំ២០២៣៕
