អតីតជំនាញការពាណិជ្ជកម្មរបស់លោក ដូណាល់ ត្រាំ លើកឡើងថា ភាពតានតឹងរវាងអាមេរិក និងចិន លើបញ្ហាវិបត្តិជំងឺឆ្លងកូវីដ១៩ កំពុងរុញសង្គ្រាមពាណិជ្ជកម្មរវាងប្រទេសទាំងពីរឱ្យក្លាយទៅជាសង្គ្រាមត្រជាក់ថ្មីមួយ ហើយវានឹងកាន់តែអាក្រក់នៅពេលខាងមុខ។
ប្រធានាធិបតីអាមេរិក លោក ដូណាល់ ត្រាំ បានបន្តស្តីបន្ទោសរដ្ឋាភិបាលក្រុងប៉េកាំង ចំពោះជំងឺរាតត្បាតសកលដែលបានសម្លាប់ពលរដ្ឋអាមេរិកជាង ៧ម៉ឺននាក់ និងឆ្លងដល់មនុស្សជាង ១លាន ២សែននាក់ ខណៈការបោះឆ្នោតជ្រើសតាំងប្រធានាធិបតីអាណត្តិថ្មីនឹងចូលមកដល់នៅខែវិច្ឆិកា។
អតីតជំនួយការលើកិច្ចការចរចាពាណិជ្ជកម្មនៅសេតវិមាន លោក Clete Willems មើលឃើញថា ស្ថានភាពទំនាក់ទំនងរវាងប្រទេសមហាអំណាចទាំង២ ដែលកំពុងតែជួបបញ្ហាកាន់តែខ្លាំងឡើងៗនេះ គឺជាសញ្ញាណនៃការចាប់ផ្តើមសង្គ្រាមត្រជាក់ថ្មីមួយ។
តាមប្រភពពីកាសែត Express របស់អង់គ្លេសនៅថ្ងៃម្សិលមិញ លោក Willems ព្រមានថា ភាពតានតឹងដែលកំពុងកើនឡើងនៅចំពោះមុខវិបត្តិជំងឺរាតត្បាតសកល រវាងរដ្ឋបាលលោក ត្រាំ និងរដ្ឋបាលបក្សកុម្មុយនីស្តចិននេះ នឹងកាន់តែធ្ងន់ធ្ងរខ្លាំងថែមទៀតនៅរយៈពេលប៉ុន្មានខែ និងប៉ុន្មានឆ្នាំទៅមុខ។
តាមប្រភពដដែល លោកប្រាប់ទូរទស្សន៍ CNBC បន្ថែមថា ការចោទប្រកាន់ថា ចិនបានធ្វើឱ្យរីកសាយភាយមេរោគទៅអាមេរិក និងអឺរ៉ុប គឺជាការចាប់ផ្តើមនៃសង្គ្រាមត្រជាក់ថ្មី ដែលលោកថា“បើយើងមិនប្រុងប្រយ័ត្ន រឿងរ៉ាវអាចកាន់តែធ្ងន់ធ្ងរខ្លាំងឡើងៗ”។
រដ្ឋលេខាធិការអាមេរិក លោក Mike Pompeo បានថ្លែងនៅថ្ងៃអាទិត្យថា អាមេរិកមានភស្តុតាងសំខាន់មួយចំនួន បង្ហាញថា មេរោគចេញពីមន្ទីរពិសោធរបស់ចិន តែយ៉ាងណា លោកមិនបានជំទាស់ការសន្និដ្ឋានរបស់ទីភ្នាក់ងារស៊ើបការណ៍សម្ងាត់អាមេរិកដែលថា មេរោគមិនមែនបង្កើតឡើងដោយមនុស្ស។
នៅក្នុងកិច្ចសម្ភាសន៍មួយជាមួយទូរទស្សន៍ Fox News នៅថ្ងៃម្សិលមិញ លោក ដូណាល់ ត្រាំ ក៏បានស្តីបន្ទោសចិនដែលបានបណ្តោយឱ្យពលរដ្ឋខ្លួននាំយកមេរោគទៅចម្លងនៅអឺរ៉ុប ពិសេសអ៊ីតាលី ដែលនាំឱ្យអ៊ីតាលីរងការឆ្លងរាលដាលធ្ងន់ធ្ងរជាងគេក្នុងតំបន់។
ក្នុងកិច្ចសម្ភាសន៍នោះ លោក ត្រាំ មិនបានបកស្រាយចំពោះការអះអាងរបស់លោកថ្មីៗនេះពីភស្តុតាងបញ្ជាក់ថា មេរោគពិតជាចេញពីមន្ទីរពិសោធវូហាននោះទេ ប៉ុន្តែ លោកថា៖
«នៅពេលវេលាសមរម្យមួយ យើងនឹងពន្យល់។ យើងនឹងផ្តល់ឱ្យរបាយការណ៍រឹងមាំចំពោះអ្វីដែលបានកើតឡើងពិតប្រាកដ ហើយខ្ញុំគិតថា វានឹងត្រូវក្លាយជាការសន្និដ្ឋានយ៉ាងច្បាស់លាស់មួយ»។
កាលពីថ្ងៃទី១៩ ខែមេសា លោក ដូណាល់ ត្រាំ បានព្រមានថា ចិននឹងប្រឈមផលវិបាកផ្សេងៗចំពោះមុខវិបត្តិជំងឺកូវីដ១៩ ប្រសិនបើអាមេរិករកឃើញថា រដ្ឋាភិបាលក្រុងប៉េកាំងពិតជាបានប្រព្រឹត្តកំហុសណាមួយដែលបណ្តាលឱ្យមានការរីកសាយភាយមេរោគ។
អ្នកនាំពាក្យក្រសួងការបរទេសចិន លោក Geng Shuang លើកឡើងថា ការចោទប្រកាន់កន្លងមក ធ្វើឡើងដោយគ្មានមូលដ្ឋានច្បាស់លាស់ និងក្រោមហេតុផលនយោបាយ ហើយថា មន្ទីរពិសោធវូហានគ្មានសមត្ថភាពបង្កើតមេរោគ ឬបានប្រព្រឹត្តកំហុសនាំឱ្យមេរោគសាយភាយចេញក្រៅនោះទេ ដោយបញ្ជាក់ថា «មន្ទីរពិសោធអនុវត្តវិធីការពារជីវសុវត្ថិភាពយ៉ាងតឹងរ៉ឹង»។
នៅក្នុងសន្និសីទកាសែតកាលពីចុងខែមេសា លោក Geng ថ្លែងថា៖ «យើងជំរុញឱ្យអ្នកនយោបាយអាមេរិក ឈប់រុញបញ្ហាមកដាក់ប្រទេសចិន ហើយបង្វែរការយកចិត្តទុកដាក់លើសហគមន៍អន្តរជាតិវិញ។ ពួកគេគួរតែផ្តោតលើការទប់ស្កាត់ការឆ្លងរាតត្បាតក្នុងប្រទេសកំណើត»។
សង្គ្រាមត្រជាក់ជាការដណ្តើមឥទ្ធិពលគ្នារវាងមនោគមវិជ្ជានយោបាយលោកសេរី ដឹកនាំដោយសហរដ្ឋអាមេរិក និងក្រុមកុម្មុយនីស្ត ដឹកនាំដោយសហភាពសូវៀត ចាប់ពីឆ្នាំ១៩៤៧ ដល់១៩៩១ ដែលធ្វើឱ្យពិភពលោកបែងចែកជាពីរក្រុម៕