កម្មករ-កម្មការិនីជាង ២ពាន់នាក់ បម្រើការងារនៅរោងចក្រមួយ ស្ថិតក្នុងក្រុងបាវិត ខេត្តស្វាយរៀង ត្រូវបានថៅកែព្យួរការងារ ក្រោមហេតុផលគ្មានអ្នកបញ្ជាទិញ។
អនុប្រធានសហជីពចលនាកម្មករប្រចាំរោងចក្រ យូលី (You Li) លោក ពុំ សុគុន្ធី ប្រាប់វីអូឌីថា ថៅកែរោងចក្រ យូលី បានព្យួរការងារកម្មករជាង ២ពាន់នាក់ទៀត ដោយអនុវត្តចាប់ពីថ្ងៃទី១ ខែឧសភា ដល់ថ្ងៃទី៣០ ខែមិថុនាខាងមុខ ដោយថៅកែអះអាងថា ការព្យួរការងារកម្មករក្នុងចំនួនច្រើននេះ ដោយសារគ្មានការបញ្ជាទិញ។
អនុប្រធានសហជីពរូបនេះឱ្យដឹងថា រយៈពេលព្យួរការងារនេះ គឺកម្មករទទួលបានប្រាក់ឧបត្ថម្ភ ៧០ដុល្លារតាមសេចក្តីណែនាំរបស់រដ្ឋាភិបាល ដោយក្នុងនោះថៅកែចេញ ៣០ដុល្លារ និងរដ្ឋាភិបាលចូលរួមចំណែក ៤០ដុល្លារ។
លោក ពុំ សុគុន្ធី បន្តថា ការព្យួរការងារនេះនឹងធ្វើឱ្យកម្មករជួបការលំបាកច្រើនក្នុងការចំណាយផ្សេងៗក្នុងគ្រួសាររបស់ពួកគេ ដោយថា ប្រាក់ឧបត្ថម្ភត្រឹម ៧០ដុល្លារនោះ មិនអាចជួយទ្រទ្រង់ជីវភាពកម្មករអំឡុងព្យួរការងារបានស្រួលឡើយ។
លោកបន្ថែមថា៖ «តាមពិតបើយើងពិនិត្យមើល យើងឃើញមានផលប៉ះពាល់ច្រើន ដោយសារចំណូលរបស់ពួកគាត់អំឡុងពេលព្យួរការងារនេះ គឺបានតិចណាស់ ព្រោះការផ្គត់ផ្គង់គ្រួសាររបស់គាត់ គឺអត់បានគ្រប់គ្រាន់។ អ៊ីចឹង ពួកគាត់មានការត្អូញត្អែរខ្លាំង ហើយអ្នកខ្លះគាត់មានយកលុយពីខាងធនាគារមកប្រើប្រាស់ដែរ។ អ៊ីចឹង ពួកគាត់លំបាកខ្លាំង»។
ប្រធានរដ្ឋបាលរោងចក្រ យូលី (You Li) លោក សេក ប៊ុនធឿន ប្រាប់វីអូឌីថា រោងចក្រពិតជាបានព្យួរការងារកម្មករជាង ២ពាន់នាក់ពិតមែន និងត្រៀមព្យួរបន្ថែមទៀត ប្រសិនបើនៅតែគ្មានការបញ្ជាទិញ។
ប្រធានរដ្ឋបាលរោងចក្ររូបនេះ ឱ្យដឹងថា ដោយសារគ្មានការបញ្ជាទិញនេះ កាលពីសប្តាហ៍មុនរោងចក្របានបញ្ចប់កិច្ចសន្យាការងារកម្មករជាង ២០០នាក់ម្តងទៅហើយ។
លោកបន្ថែមថា៖ «និយាយរួមទៅ អត់មានការបញ្ជាទិញហ្នឹងតាំងពីកើតមានជំងឺកូវីដ១៩ម៉្លេះ។ ការបញ្ជាទិញហ្នឹង វាកាត់បន្ថយច្រើន។ រោងចក្រខ្ញុំអាចនឹងមានការព្យួរការងារកម្មករបន្ថែមទៀត ពីព្រោះបច្ចុប្បន្នហ្នឹងអត់មានការងារធ្វើហ្មង»។
ប្រធានមន្ទីរការងារខេត្តស្វាយរៀង លោក អ៊ូ សាខឿន មានប្រសាសន៍ថា រោងចក្រ យូលី បានព្យួរការងាកម្មករក្នុងចំនួនច្រើននេះពិតមែន។ លោកថា លោកបានឱ្យមន្ត្រីចុះសម្របសម្រួល និងពិនិត្យលើភាពត្រឹមត្រូវនៃលក្ខខណ្ឌព្យួរការងារនោះរួចហើយ ដើម្បីឱ្យកម្មករទទួលបានប្រាក់ឧបត្ថម្ភត្រឹមត្រូវទៅតាមការកំណត់របស់រដ្ឋាភិបាល។
លោកបន្ថែមថា៖ «ហើយខ្ញុំបានឱ្យមន្ត្រីចុះទៅសង្កេតណែនាំ ដើម្បីឱ្យគាត់បំពេញលក្ខខណ្ឌឱ្យបានត្រឹមត្រូវតាមការកំណត់របស់ក្រសួង ព្រោះគាត់នៅក្នុងវិស័យកាត់ដេរ។ អ៊ីចឹង បើគាត់បានបំពេញលក្ខខណ្ឌត្រឹមត្រូវតាមការកំណត់របស់ក្រសួងការងារ កម្មករនឹងទទួលបានអត្ថប្រយោជន៍ទាំងអស់ហ្នឹងហើយ [លុយ ៧០ដុល្លារ អំឡុងព្យួរការងារ]»។
កាលពីថ្ងៃទី៤ ខែឧសភា សមាគមរោងចក្រកាត់ដេរនៅកម្ពុជា (GMAC) ឱ្យដឹងថា កម្មករប្រមាណជិត ២០ម៉ឺននាក់ នឹងត្រូវព្យួរការងារ ប្រសិនបើនៅតែគ្មានការបញ្ជាទិញ ខណៈដែលរោងចក្រ ១៨០ បានព្យួរការងារកម្មករ និងរោងចក្រប្រមាណ ៦០ទៀត កំពុងឈានទៅរកការព្យួរការងារដែរនោះ។
កាលពីថ្ងៃទី១ ខែឧសភា ក្រុមសហជីពមកពីវិស័យផ្សេងៗ បានដាក់លិខិតមួយទៅខុទ្ទកាល័យនាយករដ្ឋមន្ត្រី ដើម្បីទាមទារឱ្យរដ្ឋាភិបាលរក្សាការផ្តល់ប្រាក់ឈ្នួលគោលប្រចាំខែយ៉ាងតិច ៦០ភាគរយ ជូនកម្មករ ដោយរដ្ឋាភិបាលចេញ ២០ភាគរយ និងនិយោជកចេញ ៤០ភាគរយ នៃប្រាក់ឈ្នួលគោលរបស់កម្មករគ្រប់វិស័យ នៅអំឡុងពេលនៃការរីករាលដាលជំងឺកូវីដ១៩។
ក្រុមសហជីពទាំងនោះ អះអាងថា ប្រាក់ឧបត្ថម្ភត្រឹម ៧០ដុល្លារ មិនអាចជួយផ្គត់ផ្គង់ជីវភាពកម្មករបានគ្រប់គ្រាន់ឡើយ។
យោងតាមសមាគមរោងចក្រកាត់ដេរនៅកម្ពុជា រោងចក្រ យូលី (You Li) ជារោងចក្រ ផលិតខោអាវទ្រនាប់បុរសនារី និងសម្លៀកបំពាក់កុមារ ហើយមានកម្មករសរុប ៤៩៦៤នាក់៕
