ប្រជាពលរដ្ឋជាច្រើនមកពីរាជធានីភ្នំពេញ និងបណ្តាខេត្តនានា បានសម្រុកទៅពន្យារប័ណ្ណបើកបរ ឬប្តូរប័ណ្ណបើកបរថ្មី និងយករថយន្តរបស់ពួកគេទៅត្រួតពិនិត្យបច្ចេកទេសក្នុងរយៈពេលប៉ុន្មានថ្ងៃចុងខែមេសានេះ តែពីរបីថ្ងៃប៉ុណ្ណោះមុននឹងសមត្ថកិច្ចចាប់ផ្ដើមអនុវត្តការផាកពិន័យធ្ងន់ធ្ងរចំពោះបទល្មើសចរាចរណ៍។
ក្រុមពលរដ្ឋទាំងនោះ បានប្រាប់ថា ពួកគេព្រួយបារម្ភពីការឆ្លងវីរុសកូរ៉ូណា ប៉ុន្តែ ពួកគេបានឈររង់ចាំកកកុញដោយពុំបានរក្សាគម្លាតពីគ្នាយ៉ាងតិច ២ម៉ែត្រ ដូចទៅនឹងការណែនាំរបស់ក្រសួងសុខាភិបាលដើម្បីបង្ការការឆ្លងវីរុសកូរ៉ូណានោះឡើយ។
នៅជាន់ទី១ ក្នុងផ្សារទំនើបអ៊ីអន១ ប្រជាពលរដ្ឋនៅរាជធានីភ្នំពេញ អ្នកស្រី ម៉ូត ពៅ និយាយថា អ្នកស្រីបានទៅស្នើសុំផ្លាស់ប្ដូរប័ណ្ណបើកបរប្រភេទថ្មីនៅទីនោះតាំងពីម៉ោង ១០ព្រឹក នាថ្ងៃទី៣០ ខែមេសា ប៉ុន្តែ អ្នកស្រីថា អ្នកស្រីមិនទាន់ទទួលបានប័ណ្ណបើកបរថ្មីនៅឡើយទេរហូតដល់ម៉ោងជិត ៥ល្ងាចថ្ងៃដដែលនេះ ដោយសារពលរដ្ឋរាប់រយនាក់បានសម្រុកទៅស្នើសុំប័ណ្ណបើកបរប្រភេទថ្មីដូចអ្នកស្រីដែរ។
ពលរដ្ឋរូបនេះ និយាយថា រដ្ឋាភិបាលមិនគួរពង្រឹងការអនុវត្តច្បាប់ចរាចរណ៍ និងចេញអនុក្រឹត្យផាកពិន័យថ្មីអនុវត្តលើពលរដ្ឋដែលបើកបរខុសច្បាប់នោះទេ ពីព្រោះដំណាក់កាលនេះ ពលរដ្ឋដែលមកធ្វើប័ណ្ណបើកបរអាចប្រឈមនឹងការឆ្លងជំងឺកូវីដ១៩។
អ្នកស្រី ម៉ូត ពៅ និយាយថា៖ «ស្អែកនេះ គេពិន័យហើយ មែនទែនហើយ។ យើងអត់ចង់ឱ្យខុសទេ ត្រូវតែតស៊ូ ប៉ុន្តែ យើងសោកស្តាយដែលមានការផាកពិន័យ ហើយអនុវត្តចាប់ពីស្អែកទៅក្នុងកំឡុងកូវីដ គ្រប់ប្រទេសលើពិភពលោក…គេចាប់អារម្មណ៍ គេលើកលែងគ្រប់យ៉ាង រីឯយើង [រដ្ឋាភិបាលចេញអនុក្រឹត្យអនុវត្ត] កើតឡើងក្នុងកំឡុងពេលនេះ [កូវីដ១៩]។ យើងសោកស្តាយមែនទែន»។
ឈររង់ចាំស្នើសុំក្នុងចំណោមពលរដ្ឋជាច្រើននាក់ទៀតដែរ លោក រី វណ្ណារ៉ា ជាពលរដ្ឋមកពីស្រុកពារាំង ខេត្តព្រៃវែង និយាយថា គាត់មកស្នើសុំពន្យារប័ណ្ណបើកបរថ្មីនៅផ្សារទំនើបអ៊ីអន១ ដោយសារបារម្ភខ្លាចរងការផាកពិន័យធ្ងន់ធ្ងរ នៅពេលបើកបរធ្វេសប្រហែសល្មើសនឹងច្បាប់ចរាចរណ៍។
លោក រី វណ្ណារ៉ា និយាយថា៖ «ពីមុនមក យើងមិនបានធ្វើ យើងចេះតែរវល់នឹងការងារ យើងចេះតែខ្ជិលធ្វើ ដល់ពេលគេរឹតបន្តឹងច្បាប់ យើងចេះប្រឹងមកធ្វើឱ្យលឿនដែរ ដើម្បីកុំឱ្យគេមានការផាកពិន័យ»។
អ្នកស្រី ទូច ស្រីមុំ ប្រាប់ថា ជាអាជីវករដឹកបន្លែពីស្រុកស្អាង ខេត្តកណ្ដាល មកលក់នៅរាជធានីភ្នំពេញ ជារៀងរាល់ថ្ងៃ។ នៅថ្ងៃព្រហស្បតិ៍ម្សិលមិញនេះ អ្នកស្រី ស្រីមុំ បានឆ្លៀតទៅស្នើសុំប្តូរប័ណ្ណបើកបរថ្មីពេញមួយថ្ងៃ ប៉ុន្តែ ប្រាប់ថា មិនទាន់ទទួលបាននៅឡើយទេ ដោយត្រូវរង់ចាំ ដោសារតែលេខរង់ចាំរបស់អ្នកស្រីស្ថិតនៅលេខរៀងជិត ២០០។
អ្នកស្រី ទូច ស្រីមុំ និយាយថា៖ «ពីមុនចេះតែខ្លាចដែរ មុខក្រោយៗថា ប៉ូលីសខ្លះគ្រប់អស់ ក៏គាត់នៅតែកូរទាររកលុយ តែបើគេ [រដ្ឋាភិបាល] ពង្រឹងអនុវត្តច្បាប់ យើងមានសព្វគ្រប់ហើយ ចាំមើលប៉ូលីសចរាចរណ៍ខ្លះដែលគាត់ខូច ដែលគាត់ចាប់កូររកលុយ ចាំមើលគាត់សួររកអ្វីទៀត ធ្វើតាមទាំងអស់»។
ប្រធានមន្ទីរសាធារណការ និងដឹកជញ្ជូនរាជធានីភ្នំពេញ លោក សាំង ពិសិដ្ឋ សុំមិនធ្វើការបកស្រាយជុំវិញករណីនេះ ដោយបង្វែរសំណួរឱ្យទៅសួរខាងផ្នែកដឹកជញ្ជូនវិញ។
ប្រធាននាយករដ្ឋព័ត៌មានវិទ្យា និងទំនាក់ទំនងសាធារណៈនៃក្រសួងសាធារណការ និងដឹកជញ្ជូន លោក ហ៊ាង សុទ្ធាយុត្តិ បានប្រាប់វីអូឌីនៅថ្ងៃសុក្រនេះថា ចំនួនពលរដ្ឋដែលបានទៅស្នើសុំប័ណ្ណបើកបរថ្មី ពន្យារប័ណ្ណបើកបរ ឬក៏ត្រួតពិនិត្យបច្ចេកទេសយានយន្ត បានកើនឡើងទ្វេដងនៅក្នុងរយៈពេលពីរសប្ដាហ៍ចុងក្រោយមកនេះ ដែលទាមទារឱ្យមន្ត្រីរបស់ក្រសួងបង្កើនម៉ោងធ្វើការងារ ដើម្បីផ្ដល់សេវារហូតដល់ម៉ោង ១១យប់ និងនៅថ្ងៃឈប់សម្រាកផងដែរ។
លោក ហ៊ាង សុទ្ធាយុត្តិ បានឱ្យដឹងថា ក្រសួងបានចេញប័ណ្ណបើកបរសរុបដល់ទៅ ៣,៤០៣សន្លឹក និងបានផ្ដល់ការត្រួតពិនិត្យបច្ចេកទេសរថយន្តចំនួន ៨,៥៤៨គ្រឿង នៅក្នុងរយៈពេល ២ថ្ងៃចុងក្រោយនៃខែមេសាកន្លងមកនេះ។ បើតាមមន្ត្រីរូបនេះ ការស្នើសុំប័ណ្ណបើកបរ និងការត្រួតពិនិត្យបច្ចេកទេសយានយន្ត បានកើនឡើងយ៉ាងគំហុកដល់ទៅជាង ២០០ភាគរយ បើធៀបនឹងតួលេខនៅថ្ងៃធម្មតា ដែលមានចំនួនត្រឹមតែជាង ២ពាន់គ្រឿងប៉ុណ្ណោះ។
លោក ហ៊ាង សុទ្ធាយុត្តិ មានប្រសាសន៍ថា៖ «នេះដោយសារតែមានការរឹតបន្តឹងនូវការអនុវត្តច្បាប់ចរាចរណ៍ផ្លូវគោក ហើយទន្ទឹមហ្នឹងដែរ យើងបានកែសម្រួលខ្លឹមសារនៃអនុក្រឹត្យស្ដីពីការផាកពិន័យអន្តរកាលហ្នឹង ដែលការកែសម្រួលហ្នឹង ឱ្យវាត្រូវនឹងបរិបថ និងតម្រូវការជាក់ស្ដែងក្នុងសង្គម»។
លោក ហ៊ាង សុទ្ធាយុត្តិ បានទទួលស្គាល់ថា ពិតជាមានប្រជាពលរដ្ឋសម្រុកទៅស្នើសុំប័ណ្ណបើកបរយ៉ាងគំហុកបែបនេះមែន ជាពិសេសនៅកន្លែងផ្ដល់សេវា ស្ថិតនៅក្នុងផ្សារទំនើបអ៊ីអន ចំពេលដែលរដ្ឋាភិបាលណែនាំឱ្យរក្សាគម្លាតសង្គម ជុំវិញក្ដីបារម្ភពីការឆ្លងរីករាលដាលនៃវីរុសកូរ៉ូណា។
លោក សុទ្ធាយុត្តិ បានឱ្យដឹងថា ឆ្លើយតបនឹងក្ដីបារម្ភនេះ ក្រសួងបានដាក់ចេញនូវសេចក្ដីណែនាំពីវិធីបង្ការមួយចំនួនទៅដល់មន្ត្រីប្រតិបត្តិរបស់ក្រសួង និងទៅដល់ប្រជាពលរដ្ឋដែលទៅស្វែងរកសេវាផងដែរ ប៉ុន្តែ លោកក៏ទទួលស្គាល់ផងដែរថា ពលរដ្ឋមួយចំនួន មិនបានអនុវត្តទៅតាមការណែនាំទាំងស្រុងនោះឡើយ។
លោក ហ៊ាង សុទ្ធាយុត្តិ មានប្រសាសន៍បន្ថែមថា៖ «យើងសហការជាមួយផ្សារអ៊ីអនម៉ល។ ប្រសិនជាទៅមើលនៅផ្សារអ៊ីអនម៉ល គេមានគំនូសសុវត្ថិភាព យើងដាក់ជា right queue [ចំណុចតម្រង់ជួររង់ចាំ] ត្រឹមត្រូវអ៊ីចឹងណា៎ ដើម្បីឱ្យគាត់ចូលរួមគោរព ហើយមានបុគ្គលិកសន្តិសុខ ហើយមានបុគ្គលិកខាងក្រសួងសាធារណការ និងដឹកជញ្ជូន ណែនាំទៅគាត់។ ប៉ុន្តែ យើងដឹងហើយ កាលណាមានតម្រូវការច្រើន ការណែនាំមិនមែនជាការចាប់បង្ខំទេ។ យើងព្យាយាមណែនាំគាត់ទៅ អ្នកខ្លះក៏ស្ដាប់ទៅ អ្នកខ្លះក៏គាត់មិនសូវបានស្ដាប់ មិនសូវយកចិត្តទុកដាក់ដោយសារគាត់មានការភ័យបារម្ភខ្លាំង»។
នាយកស្តីទីនៃវិទ្យាស្ថានសុវត្ថិភាពចរាចរណ៍របស់អង្គការជនពិការអន្តរជាតិ លោក គង់ រតនៈ និយាយថា ដំណាក់កាលនេះ ពលរដ្ឋមិនត្រូវបន្ទោសរដ្ឋាភិបាលនោះទេ ដោយសារបញ្ហានៃការមិនគោរពច្បាប់បណ្តាលឱ្យមនុស្សស្លាប់ និងរងរបួសនៅតែបន្តកើនឡើងជារៀងរាល់ឆ្នាំដដែល។
ដោយឡែក រឿងដែលពលរដ្ឋនិយាយថា ព្រួយបារម្ភពីជំងឺកូវីដ១៩ នៅពេលនាំគ្នាប្រជ្រៀតទៅសុំពន្យារ ឬប្តូរប័ណ្ណបើកបរថ្មីនោះ គួរតែមានការប្រុងប្រយ័ត្នខ្ពស់ ដើម្បីកុំឱ្យប៉ះពាល់ដល់សុខភាព។
លោក គង់ រតនៈ និយាយថា៖ «បច្ចុប្បន្ន ជំងឺកូវីដ គាត់គួរតែមានការប្រុងប្រយ័ត្នទ្វេដង ពីព្រោះអ្នកដែលទៅធ្វើប័ណ្ណបើកបរជាមួយគ្នាច្រើន ហើយគាត់ទៅពន្យារ យើងអត់ដឹងថា សមាសភាពមកពីខាងណាទេ សម្រាប់យើង វាជាការប្រថុយប្រថាន ប៉ុន្តែ អ្វីដែលចាំបាច់ចំពោះមុខ គឺបញ្ហាសុខភាព បើសិនជាគាត់មានបញ្ហាសុខភាព បើទោះជាប័ណ្ណបើកបរពន្យារមក បើសិនជាគាត់ឆ្លងមេរោគកូវីដ ក៏វាអត់គួរក្នុងការវិនិយោគ [ទៅធ្វើប័ណ្ណបើកបរ] ដែរ»៕
