សមាគមមីក្រូហិរញ្ញវត្ថុ អះអាងថា អតិថិជន ឬកូនបំណុលដែលរងផលប៉ះពាល់ធ្ងន់ធ្ងរពីជំងឺកូវីដ១៩ នឹងទទួលបានលក្ខខណ្ឌពន្យារសងប្រាក់ ត្រឡប់មកម្ចាស់បំណុលវិញ។
ប្រធាននាយកដ្ឋានទំនាក់ទំនងសមាគមមីក្រូហិរញ្ញវត្ថុកម្ពុជា លោក កាំង តុងងី ឱ្យVODដឹងនៅថ្ងៃព្រហស្បតិ៍នេះថា ជាគោលការណ៍ គ្រប់សមាជិកទាំងអស់របស់សមាគម គេនឹងសម្រួលដល់អតិថិជនដែលរងផលប៉ះពាល់ពីជំងឺកូវីដ១៩នេះ ប៉ុន្តែ ពួកគេនឹងជួយអ្នកណាដែលប៉ះពាល់ធ្ងន់មុនគេ។ លោក កាំង តុងងី ឱ្យដឹងទៀតថា អ្នកទទួលបានលក្ខខណ្ឌនេះ អាចបង់តែការប្រាក់ ឬអាចផ្អាកសងទាំងដើមតែម្តង តាមករណីជាក់ស្តែង ។
លោកថា៖ «ករណីធ្ងន់ [ប៉ះពាល់ពីកូវីដ១៩] គឺជាករណីដែលអតិថិជនហ្នឹងគាត់មានចំណូលតែមួយប្រភព ហើយមួយប្រភពហ្នឹងប៉ះពាល់ទាំងស្រុង។ ឧទាហរណ៍ ចំណូលគាត់ធ្លាប់បានមួយខែ ៥០០ដុល្លារ ធា្លក់នៅសល់តែ ១០០ដុល្លារ អ៊ីចឹង គាត់គ្មានលទ្ធភាពបង់ដូចធម្មតាទេ។ អ៊ីចឹងក្នុងចំណូលគាត់ធ្លាក់ចុះបែបហ្នឹង គាត់អាចទៅជួបមីក្រូហិរញ្ញវត្ថុដែលគាត់ទទួលប្រាក់កម្ចីហ្នឹង ដើម្បីជជែកជាមួយគេ ដោះស្រាយរកវិធីសង ឬពន្យារពេលយ៉ាងម៉េចទៅតាមលទ្ធភាពជាក់ស្តែង»។
ទោះជាយ៉ាងណា មន្ត្រីជាន់ខ្ពស់នៅសមាគមមីក្រូហិរញ្ញវត្ថុរូបនេះ បញ្ជាក់ថា ជម្រើសនៃការយោគយល់នេះ មិនមែនមានន័យថា គ្រប់មីក្រូហិរញ្ញវត្ថុទាំងអស់ ត្រូវតែបន្ធូរបន្ថយ និងពន្យារពេលសងគ្រប់អតិថិជននោះទេ អាស្រ័យលើករណីមួយៗចាំបាច់ប៉ុណ្ណោះ។
ដោយឡែក កាលពីថ្ងៃទី២៧ ខែមីនា ធនាគារជាតិនៃកម្ពុជា បានចេញសេចក្តីណែនាំឱ្យដោះស្រាយបញ្ហាវិបត្តិកូវីដ១៩នេះ ផ្តោតលើវិស័យអាទិភាព៤ មានវិស័យទេសចរណ៍ កាត់ដេរ ដឹកជញ្ជូន និងសំណង់។
លោកនាយករដ្ឋមន្ត្រី ហ៊ុន សែន កាលពីថ្ងៃទី៩ ខែមីនា បានបញ្ជាផ្ទាល់មាត់ទៅមន្ត្រីពាក់ព័ន្ធឱ្យអន្តរាគមន៍បន្ទាន់ទៅធនាគារ និងមីក្រូហិរញ្ញវត្ថុ សម្របសម្រួលដកការប្រាក់ ឬពន្យារការសងប្រាក់ត្រឡប់វិញ សម្រាប់កម្មករដែលបាត់បង់ការងារ ដោយសារជំងឺកូវីដ១៩។
នាយកប្រតិបត្តិសមាគមមីក្រូហិរញ្ញវត្ថុកម្ពុជា លោក ផល វ៉ាន់ឌី ប្រាប់ VOD កាលពីថ្ងៃ៩ ខែមីនា ថា គិតត្រឹមដំណាច់ឆ្នាំ២០១៩ អ្នកប្រើប្រាស់កម្ចី ឬកូនបំណុលមានជាង ២លាននាក់ ក្នុងនោះកម្មករក្នុងវិស័យកាត់ដេរមានពី១៥ ទៅ២០ភាគរយ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បង្ហាញការយល់ឃើញថា ការរង់ចាំការវាយតម្លៃផលប៉ះពាល់ធ្ងន់ធ្ងរ ទើបទទួលបានលក្ខខណ្ឌពន្យារការសងប្រាក់ ជាសារមិនច្បាស់លាស់មួយ នៅតែជាបន្ទុកធ្ងន់ធ្ងរសម្រាប់កូនបំណុលដដែល ដោយថា ឥទ្ធិពលកូវីដ១៩ ពេលនេះ វាបានបង្កផលប៉ះពាល់ដល់គ្រប់វិស័យ រួមទាំងកសិករផង។
លោកថា៖ «កម្មករដែលរដ្ឋប្រកាសឱ្យ ៧០ដុល្លារក្នុង១ខែហ្នឹងក៏ដោយ ក៏ប៉ុន្តែ បើយើងមើលទៅ ៧០ដុល្លារហ្នឹងមិនអាចធ្វើឱ្យគាត់មានលទ្ធភាពសន្សំលុយរហូតដល់សងធនាគារ និងមីក្រូហិរញ្ញវត្ថុនេះដែរ។ ការឆ្លើយតបហ្នឹង ខ្ញុំគិតថា ដូចជាមិនទាន់ច្បាស់លាស់»។
លោក មឿន តុលា បង្ហាញការព្រួយបារម្ភថា ជម្លោះសង្គមវានឹងអាចកើតឡើង បើការដោះស្រាយមិនឆ្លើយតបទៅនឹងទំហំបញ្ហាដែលបានកើតឡើងក្នុងសង្គម។
អង្គការលីកាដូ និងសមាគមធាងត្នោត កាលពីខែសីហា ឆ្នាំ២០១៩ បានចេញរបាយការណ៍មួយ វាយតម្លៃថា បំណុលមីក្រូហិរញ្ញវត្ថុនៅប្រទេសកម្ពុជា ជាដើមចមជំរុញឱ្យមានការរំលោភសិទ្ធិមនុស្សជាលក្ខណៈប្រព័ន្ធធ្ងន់ធ្ងរ។ របាយការណ៍បានរិះគន់ថា គ្រឹះស្ថានមីក្រូហិរញ្ញវត្ថុជាស្ថាប័ន «ជញ្ជក់ឈាម» មិនអនុវត្តតាមគោលការណ៍ក្រមសីលធម៌ក្នុងការផ្តល់ប្រាក់កម្ចី។
ប៉ុន្តែ ប៉ុន្មានថ្ងៃក្រោយមក ស្ថាប័នមីក្រូហិរញ្ញវត្ថុ រួមទាំងរដ្ឋាភិបាលផង បានចាត់ទុករបាយការណ៍នោះថា គ្មានលក្ខណៈវិទ្យាសាស្ត្រ និងគ្មានភាពត្រឹមត្រូវ។
យ៉ាងនេះក្តី គេហទំព័រថ្មីៗបានចុះផ្សាយកាលពីថ្ងៃទី២០ ខែមេសានេះថា សមាគមមីក្រូហិរញ្ញវត្ថុអម្រឹត កំពុងផ្ដល់ការពន្យារការសងដល់អតិថិជនជាង ១២ម៉ឺននាក់ ដែលជួបការលំបាកខ្លាំង ដោយសារជំងឺកូវីដ-១៩ រយៈពេលពី៣ ទៅ៦ខែ។ បើតាមការចុះផ្សាយ រយៈពេល៣ ទៅ៦ខែនេះ កូនបំណុលដែលរងផលប៉ះពាល់ខ្លាំង បានពន្យារសងត្រឡប់វិញទាំងការប្រាក់ និងប្រាក់ដើម៕