ក្រសួងសុខាភិបាលស្នើដាក់ដាច់ដោយឡែក ១៤ថ្ងៃ ដោយមានការពិនិត្យតាមដានសុខភាព ចំពោះកម្មករ-កម្មការិនីណាដែលបានឈប់សម្រាកអំឡុងបុណ្យចូលឆ្នាំ ហើយបានត្រឡប់មកបម្រើការងារតាមរោងចក្រនៅក្នុងរាជធានីភ្នំពេញវិញ ដើម្បីបង្ការការឆ្លងរាលដាលមេរោគកូវីដ១៩។
ក្នុងលិខិតមួយចុះថ្ងៃទី១៥ ខែមេសា ក្រសួងសុខាភិបាលបានស្នើទៅក្រសួងការងារ និងបណ្តុះបណ្តាលវិជ្ជាជីវៈ ត្រូវចាត់វិធានការ ចត្តាឡីស័ករយៈពេល ១៤ថ្ងៃ ដោយដាក់នៅតាមផ្ទះជាលក្ខណៈបុគ្គល ចំពោះកម្មករកម្មការិនីដែលនឹងវិលត្រឡប់ចូលបម្រើការងារវិញ បន្ទាប់ពីចប់ពិធីបុណ្យចូលឆ្នាំខ្មែរប្រពៃណីជាតិ ដើម្បីបង្ការការចម្លងជំងឺកូវីដ១៩។
ក្នុងលិខិតដដែលនេះ ក្រសួងសុខាភិបាលក៏ស្នើទៅក្រសួងការងារឱ្យបញ្ជូនក្រុមគ្រូពេទ្យទៅតាមដាន និងត្រួតពិនិត្យសុខភាពកម្មករ-កម្មការិនីដែលដាក់ដាច់ដោយឡែកនោះដែរ។ ហើយថា ប្រសិនមានបុគ្គលណាម្នាក់ មានបញ្ហាសុខភាពពាក់ព័ន្ធជំងឺកូវីដ១៩ ត្រូវទំនាក់ទំនងទៅក្រសួងសុខាភិបាលវិញ ដើម្បីអន្តរាគមន៍ក្នុងការពិនិត្យ និងធ្វើរោគវិនិច្ឆ័យបុគ្គលនោះទាន់ពេលវេលា។
ក្រសួងសុខាភិបាលបញ្ជាក់ថា ស្ថានភាពជំងឺកូវីដ១៩ ស្ថិតនៅក្នុងដំណាក់កាលមួយដែលត្រូវតែមានការប្រុងប្រយ័ត្នខ្ពស់បំផុត ដើម្បីកុំឱ្យជំងឺមួយនេះមានលទ្ធភាពចម្លងរាតត្បាតចូលដល់សហគមន៍ តាមរយៈការធ្វើដំណើរចល័តរបស់បុគ្គលពីកន្លែងមួយទៅកន្លែងមួយក្នុងឱកាសបុណ្យចូលឆ្នាំប្រពៃណីជាតិខ្មែរ។
វីអូឌីមិនអាចសុំការឆ្លើយតបពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ពាក់ព័ន្ធករណីនេះទេ។
កាលពីថ្ងៃទី៩ ខែមេសានេះ ក្រសួងការងារបានដាក់ចេញនូវវិធានការបន្ថែមទៀតចំពោះរោងចក្រ សហគ្រាស និងគ្រឹះស្ថាននានា ដើម្បីបង្ការជំងឺកូវីដ១៩ ក្នុងអំឡុងពេលលើកការឈប់សម្រាកបុណ្យចូលឆ្នាំប្រពៃណីជាតិខ្មែរ។
ក្រសួងការងារបានតម្រូវឱ្យកម្មករដែលឈប់សម្រាក់ដោយខ្លួនឯងក្នុងអំឡុងពេលបុណ្យចូលឆ្នាំនោះ គឺដាក់ដាច់ដោយឡែកពីគេរយៈពេល ១៤ថ្ងៃ មុនចូលបំពេញការងារវិញ និងមិនទទួលបានប្រាក់ឈ្នួលឡើយក្នុងរយៈពេលនោះ។
ចំពោះករណីកម្មករណាដែលឈប់សម្រាកដោយមានការអនុញ្ញាតពីថៅកែ គឺកម្មកររូបនោះក៏ត្រូវដាក់ដាច់ដោយឡែករយៈពេល ១៤ថ្ងៃដែរ មុនចូលបំពេញការងារវិញ ប៉ុន្តែ ត្រូវទទួលបានប្រាក់ឈ្នួលក្នុងអំឡុងពេលដាក់ដាច់ដោយឡែកនោះ។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា លោកមិនជំទាស់ទៅនឹងវិធានការរបស់រដ្ឋាភិបាល ដែលសម្រេចដាក់កម្មករដាច់ដោយឡែក ១៤ថ្ងៃ មុនចូលបំពេញការងារនោះទេ។
ប៉ុន្តែ លោកស្នើឱ្យក្រសួងការងារត្រូវធ្វើកិច្ចការងារនោះឱ្យបានច្បាស់លាស់ ដោយក្រសួងត្រូវមានកន្លែងសម្រាប់កម្មករស្នាក់នៅ ១៤ថ្ងៃនោះបានត្រឹមត្រូវ ហើយក្រុមគ្រូពេទ្យតាមដានពិនិត្យពួកគេឱ្យបានដិតដល់ផងដែរ។
លោកបន្ថែមថា៖ «ខ្ញុំគិតថា បើជ្រុលជាលើកមិនឱ្យឈប់ពេលចូលឆ្នាំ និងមានវិធានការការពារហើយ គួរតែពេលគាត់មកហ្នឹង ត្រូវតែពិនិត្យសុខភាពគាត់ឱ្យបានច្បាស់លាស់គ្រប់កម្មករទាំងអស់ហ្នឹង។ អ្នកណាសង្ស័យគឺដាក់នៅដាច់ដោយឡែកទៅ ហើយមានកន្លែងឱ្យពួកគាត់ស្នាក់នៅបានសមរម្យ។ ចំពោះអ្នកណាមិនសង្ស័យទេ ឱ្យពួកគាត់នៅកន្លែងណាមួយរបស់ពួកគាត់ដែលងាយគ្រប់គ្រងអីចឹងទៅ»។
លោក អាត់ ធន់ ឱ្យដឹងថា បើតាមព័ត៌មានដែលលោកទទួលបាន គឺមានកម្មករប្រហែលជា ១០ម៉ឺននាក់បានទៅស្រុកកំណើតក្នុងអំឡុងបុណ្យចូលឆ្នាំខ្មែរនេះ។
ប៉ុន្តែ យ៉ាងណា កាលពីថ្ងៃទី១៤ ខែមេសា អ្នកនាំពាក្យក្រសួងការងារ លោក ហេង សួរ ប្រាប់សារព័ត៌មានក្នុងស្រុកមួយថា កម្មករក្នុងវិស័យវាយនភណ្ឌកាត់ដេរសម្លៀកបំពាក់ ស្បែកជើង និងកាបូប ទូទាំងប្រទេសប្រមាណ ៩៥ភាគរយ បានគោរពតាមការណែនាំរបស់រាជរដ្ឋាភិបាល ដោយនៅបំពេញការងារជាធម្មតា មិនមានឈប់សម្រាកក្នុងអំឡុងចូលឆ្នាំខ្មែរនោះទេ។
កាលពីថ្ងៃទី៩ ខែមេសា រដ្ឋាភិបាលបានសម្រេចដាក់កំហិតការធ្វើដំណើរក្នុងប្រទេស ដែលអនុវត្តចាប់ពីម៉ោង ២៤:០០ ថ្ងៃទី៩ ខែមេសា ដល់ម៉ោង ២៤:០០ ថ្ងៃទី១៦ ខែមេសា ដើម្បីបង្ការ និងទប់ស្កាត់ការរាតត្បាតនៃជំងឺកូវីដ១៩ បន្ទាប់ពីក្រុមកម្មករតាមបណ្តារោងចក្រមួយចំនួនបានផ្ទុះការតវ៉ាទាមទារឈប់សម្រាកអំឡុងពេលចូលឆ្នាំប្រពៃណីជាតិខ្មែរ៕
