មន្ត្រីបេឡាជាតិរបបសន្តិសុខសង្គម (បសស) ប្រចាំខេត្តតាកែវ ឱ្យដឹងថា យ៉ាងហោចណាស់កម្មករ ១៤នាក់ បានរងរបួសធ្ងន់ និងស្រាលក្នុងហេតុការណ៍គ្រោះថ្នាក់ចរាចរណ៍ក្រឡាប់រថយន្តមួយ ស្ថិតក្នុងស្រុកទ្រាំង ខេត្តតាកែវ ខណៈដែលរថយន្តនោះដឹកកម្មករទៅបំពេញការងារនាព្រឹកនេះ។
មន្ត្រី ប.ស.ស ប្រចាំខេត្តតាកែវ លោក កឹម ចាន់ណារិទ្ធ ប្រាប់វីអូឌីថា រថយន្តម៉ាកហ៊ីយ៉ុនដាយដឹកកម្មករចំណុះ ២៥នាក់មួយគ្រឿងដែលបានក្រឡាប់ដោយខ្លួនឯងត្រង់ចំណុចភូមិគោញ័រ ឃុំព្រៃស្លឹក បណ្តាលឱ្យកម្មករ ២នាក់រងរបួសធ្ងន់ និង ១២នាក់រងរបួសស្រាល។
មន្ត្រី ប.ស.ស ឱ្យដឹងថា ក្រោយកើតហេតុ ប.ស.ស.ខេត្តតាកែវ និងអាជ្ញាធរ បានបញ្ជូនជនរងគ្រោះទៅសម្រាកព្យាបាលនៅមន្ទីពេទ្យបង្អែកខេត្តតាកែវទាំងអស់។
លោក កឹម ចាន់ណារិទ្ធ បញ្ជាក់ថា បើតាមការអះអាងពីកម្មករដែលអង្គុយជាប់ជាមួយអ្នកបើកបរ គឺមូលហេតុដែលបណ្តាលឱ្យរថយន្តដឹកកម្មករក្រឡាប់នោះ ដោយសារឡានគាំងចង្កូតមិនអាចកាច់ឆ្វេងស្តាំបាន។
លោកបន្ថែមថា៖ «តាមការសាកសួរកម្មករដែលអង្គុយជិតតៃកុងឡាន គាត់ថា តៃកុងប្រាប់គាត់ថា ឡានគាំងចង្កូតកាច់ទៅឆ្វេងទៅស្តាំអត់បាន។ ហើយល្បឿនវាកំពុងលឿន ធ្វើឱ្យក្រឡាប់ឡានហ្នឹងតែម្តង។ ប៉ុន្តែ មិនធ្វើឱ្យកម្មករណាម្នាក់រងរបួសដល់ស្លាប់ទេ»។
