ក្រសួងព័ត៌មានបានសម្រេចលុបអាជ្ញាប័ណ្ណអនុញ្ញាតការផ្សាយរបស់សារព័ត៌មាន TVFB ដោយលើកឡើងថាបណ្ដាញសារព័ត៌មាននេះ បានផ្សាយព័ត៌មានដែលមានចរិតញុះញង់បង្កឱ្យប៉ះពាល់ដល់សន្ដិសុខ សណ្ដាប់ធ្នាប់ និងសុវត្ថិភាពសង្គម។
អ្នកនាំពាក្យក្រសួងព័ត៌មាន លោក មាស សុភ័ណ្ណ មានប្រសាសន៍ថា ការអនុវត្តនេះគឺជាការអនុវត្តច្បាប់សុទ្ធសាធ ដើម្បីការពារសន្ដិសុខស្ថិរភាពសង្គម។
លោកថា៖ «ការអនុវត្តនេះគឺយើងបានអនុវត្តជាបន្តបន្ទាប់ហើយ ចំពោះអ្នកសារព័ត៌មាននៅក្នុងស្ថាប័នសារព័ត៌មានដែលអនុវត្តនូវអ្វីដែលផ្ទុយពីច្បាប់ដែលបានចែងជាធរមាន។ ដោយពិនិត្យឃើញថា ម្ចាស់អាជ្ញាប័ណ្ណនេះគឺបានផ្សាយព័ត៌មានដែលវាមានចរិតញុះញង់ ដែលផ្ទុយនឹងច្បាប់។ អ៊ីចឹង គឺត្រូវអនុវត្តទៅតាមច្បាប់»។
បើតាមលោក មាស សុភ័ណ្ណ ក្រៅពី TVFB ក្រសួងក៏កំពុងពិនិត្យមើលលើការផ្សាយរបស់ស្ថាប័នមួយចំនួនទៀតដែរ តែលោកមិនបានបញ្ជាក់ថា មានស្ថាប័នណានោះទេ។ លោកស្នើដល់បណ្ដាញសារព័ត៌មានទាំងអស់គោរពនូវច្បាប់ ក្រមសីលធម៌វិជ្ជាជីវៈ និងការដកស្រង់ប្រភពព័ត៌មានឱ្យបានត្រឹមត្រូវ ដើម្បីបញ្ចៀសនូវបញ្ហាទាំងនេះនាថ្ងៃអនាគត។
ការសម្រេចបិទសារព័ត៌មាន TVFB គឺបន្ទាប់ពីសមត្ថកិច្ចចាប់ខ្លួនចាងហ្វាងផ្សាយនៃស្ថាប័ននេះ លោក សុវណ្ណ ឬទ្ធី កាលពីយប់ថ្ងៃទី៧ ខែមេសា ម្សិលមិញ ពាក់ព័ន្ធនឹងការផ្សាយព័ត៌មានជុំវិញចំណាត់ការរបស់រដ្ឋាភិបាលលើអ្នកធ្វើការក្នុងសេដ្ឋកិច្ចក្រៅប្រព័ន្ធ ដោយលោកបានលើកយកចំណុចមួយដែលលោក ហ៊ុន សែន បាននិយាយថា «បើអ្នករត់ម៉ូតូឌុបក្ស័យធន លក់ម៉ូតូចាយសិនទៅ រដ្ឋាភិបាលគ្មានលទ្ធភាពជួយនោះទេ» យកទៅចុះផ្សាយ ។
យោងតាមទំព័រហ្វេសបុករបស់ស្នងការដ្ឋាននគរបាលរាជធានីភ្នំពេញ លោក សុវណ្ណ ឬទ្ធី ត្រូវបានបញ្ជូនទៅតុលាការនៅរសៀលថ្ងៃទី៨ ខែមេសានេះ បន្ទាប់ពីត្រូវបានចាប់ខ្លួនកាលពីយប់ម៉ោង ១០ម្សិលមិញ។ លោកត្រូវបានចាប់ខ្លួន ពាក់ព័ន្ធនឹងបទប្រព្រឹត្តអំពើញុះញង់បង្កឱ្យមានភាពវឹកវរធ្ងន់ធ្ងរដល់សន្ដិសុខសង្គម។
ក្រោយពីក្រសួងព័ត៌មានចេញសេចក្តីប្រកាស គេហទំព័រ TVFB ដែលមានអាសយដ្ឋាន tvfb.com.kh និងទំព័រហ្វេសបុករបស់ស្ថាប័ននេះ ក៏មិនអាចចូលទៅមើលបានផងដែរ។
អ្នកនាំពាក្យនិយ័តករទូរគមនាគមន៍កម្ពុជា លោក អ៊ឹម វុត្ថា មានប្រសាសន៍ថា ចំណាត់ការនេះគឺធ្វើព្រមគ្នាជាមួយក្រសួងព័ត៌មាន។
លោកថា៖ «វិធានគឺជាវិធានការ។ […] ហើយបើបើកមិនឃើញ គឺគេបិទហើយ»។
VOD មិនអាចស្វែងរកការឆ្លើយបំភ្លឺពីតំណាង TVFB ណាមួយបាននៅឡើយទេ។
នាយិកាប្រតិបត្តិនៃអង្គការក្រុមការងារដើម្បីដោះស្រាយទំនាស់ លោកស្រី ស្រី សុធាវី យល់ថា វិធានការរបស់រដ្ឋលើបណ្ដាញសារព័ត៌មានបែបនេះ គឺហាក់បីដូចជាធ្ងន់ធ្ងរពេក មិនអាចទទួលយកបាន។
លោកស្រី ស្រី សុធាវី៖ «ព្រោះនេះគ្រាន់តែជាការបញ្ចេញមតិ ជាការផ្សព្វផ្សាយ ឱ្យអ្នកទស្សនាគាត់ពិចារណាខ្លួនឯងពីអ្វីដែលពួកគាត់យល់ឃើញពីស្ថានភាពនៅក្នុងសង្គម។ ការឈានដល់ការបិទ និងឈានដល់ថា ជាបទឧក្រិដ្ឋហ្នឹង គឺហាក់បីដូចជាធ្ងន់ធ្ងរ។ វាប៉ះពាល់ដល់សិទ្ធិសេរីភាពបញ្ចេញមតិរបស់បុគ្គលទូទៅ និងសិទ្ធិសារព័ត៌មាន»។
លោកស្រីឱ្យជាយោបល់ថា រដ្ឋាភិបាលគួរតែប្រើប្រាស់វិធានការណែនាំ បណ្ដុះបណ្ដាល ជាជាងប្រើប្រាស់វិធានការក្ដៅបែបនេះ។
កាលពីថ្ងៃទី២៨ ខែឧសភា ឆ្នាំ២០១៨ រដ្ឋាភិបាលបានសម្រេចឱ្យក្រសួងព័ត៌មាន ក្រសួងទូរគមនាគមន៍ និងក្រសួងមហាផ្ទៃ ធ្វើការជាមួយគ្នាក្នុងការសហការតាមដាន សិក្សាស្រាវជ្រាវ ស្វែងរកការធ្វើអាជីវកម្ម និងការផ្សព្វផ្សាយល្មើសច្បាប់តាមគេហទំព័រ និងបណ្តាញសង្គម ដើម្បីចាត់វិធានការតាមនីតិវិធីច្បាប់។
សេចក្ដីប្រកាសរួមនោះ បានកំណត់ថា ការផ្សព្វផ្សាយល្មើសច្បាប់ទាំងនោះ គឺជាការផ្សព្វផ្សាយ ឬចែករំលែក ខ្លឹមសារព័ត៌មានទាំងអស់ ដែលមានចេតនាបង្កចលាចលដល់វិស័យការពារសន្តិសុខជាតិ ទំនាក់ទំនងជាមួយប្រទេសដទៃ សេដ្ឋកិច្ច សណ្តាប់ធ្នាប់សាធារណៈ ការរើសអើង និងវប្បធម៌ ប្រពៃណី។
អង្គភាពសារព័ត៌មាន TVFB ត្រូវបានបង្កើតឡើងនៅដើមឆ្នាំ២០១៣។ ជាអង្គភាពសារព័ត៌មានផ្នែកព័ត៌មានទាន់ហេតុការណ៍ និងសន្តិសុខសង្គម ដែលបច្ចុប្បន្នមានស្នាក់ការនៅភូមិបូរីពិភពថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ៕
