រដ្ឋាភិបាលថា ខ្លួនពុំមានវិធានការដោះលែងអ្នកជាប់ពន្ធនាគារឱ្យនៅក្រៅឃុំដោយសារការរីករាលដាលនៃកូវីដ១៩នោះទេ ដោយថា បញ្ហានេះ វាទាក់ទងនឹងសណ្ដាប់ធ្នាប់ និងសន្ដិសុខសង្គម។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា រដ្ឋាភិបាលពុំមានវិធានការដោះលែងអ្នកជាប់ឃុំឱ្យនៅក្រៅឃុំនោះទេ ក្នុងពេលដែលកម្ពុជាបារម្ភពីជំងឺកូវីដ១៩នេះ ដោយថា វាជាប់ទាក់ទងនឹងបញ្ហាសន្ដិសុខ សណ្ដាប់ធ្នាប់សង្គមដែលអាចកើតមាន ប្រសិនជាមានការដោះលែង។ លោកបន្ថែមថា ជាវិធានការឆ្លើយតបនៅពេលនេះ គឺមានតែពង្រឹងការថែរក្សាអនាម័យនៅពន្ធនាគារប៉ុណ្ណោះ។
លោក ជិន ម៉ាលីន៖ «ការដោះលែងអ្នកជាប់ឃុំ យើងមិនទាន់ពិចារណានោះទេ ព្រោះវាពាក់ព័ន្ធនឹងសន្ដិសុខ ស្ថិរភាពរបស់សង្គម តែអ្វីដែលអាចធ្វើបានគឺការថែរក្សាអនាម័យ និងវិធានការចាំបាច់ផ្សេងៗក្នុងការរក្សាអនាម័យ ក៏ដូចជាសុខភាពរបស់អ្នកជាប់ឃុំ។ រឿងហ្នឹងដែលយើងអាចធ្វើបាន ហើយបណ្ដាប្រទេសផ្សេងទៀតក៏គេបានធ្វើដែរ។ ចំណែកឯការដោះលែងអ្នកជាប់ឃុំនោះ ដូចជាមិនទាន់ឃើញប្រទេសណាមួយគេអនុវត្តនោះទេ»។
កាលពីថ្ងៃទី២៥ ខែមីនា កន្លងទៅ អគ្គនាយកដ្ឋានពន្ធនាគារបានសម្រេចមិនឱ្យមានការចូលសួរសុខទុក្ខអ្នកដែលជាប់ឃុំនៅពន្ធនាគារទាំងអស់នៅទូទាំងប្រទេស ដោយថា ដើម្បីការពារការឆ្លងរាលដាលនៃជំងឺកូវីដ១៩នៅក្នុងពន្ធនាគារ។
អ្នកនាំពាក្យអគ្គនាយកដ្ឋានពន្ធនាគារ លោក នុត សវនា មានប្រសាសន៍ប្រាប់VOD ថា ក្រៅពីវិធានការទាំងនេះ ពន្ធនាគារទូទាំងប្រទេសក៏បានពង្រឹងនូវការថែរក្សាអនាម័យ សម្លាប់មេរោគ និងការពិនិត្យសុខភាពនៅពន្ធនាគារទូទាំងប្រទេសផងដែរ។
លោក នុត សវនា៖ «ចំពោះមុខ ការគ្រប់គ្រងជនជាប់ឃុំ យើងឱ្យពួកគាត់នៅកន្លែងដូចដើមនៅឡើយទេ។ តែសម្រាប់អ្នកចូលថ្មី យើងដាក់គាត់ដាច់ដោយឡែកសម្រាប់រយៈពេល១៤ថ្ងៃ បើអត់មានអាការអី ទើបយើងបញ្ចូលទៅឃុំដូចគេដូចឯងដែរ។ ហើយចំពោះការដោះលែងឱ្យនៅក្រៅឃុំនោះ រឿងនេះវាជាគោលការណ៍ច្បាប់ ទាល់តែមានការឯកភាពពីស្ថាប័នតុលាការ»។
ថ្លែងកាលពីថ្ងៃទី១ ខែមេសា រដ្ឋមន្ត្រីក្រសួងមហាផ្ទៃ លោក ស ខេង បានឱ្យដឹងថា គិតត្រឹមថ្ងៃទី៣០ ខែមីនា ឆ្នាំ២០២០ ជនជាប់ឃុំក្នុងពន្ធនាគារនៅទូទាំងប្រទេស មានចំនួន ៣៨ ៩៩០នាក់ ក្នុងនោះស្ដ្រី ២ ៥៩៣នាក់ ដែលភាគច្រើនជាបទល្មើសគ្រឿងញៀន។
យោងតាមរបាយការណ៍របស់អង្គការសិទ្ធិមនុស្សលីកាដូ ពន្ធនាគារទាំង២៨ទូទាំងប្រទេស អាចផ្ទុកអ្នកទោសបានត្រឹម ៨ពាន់នាក់ប៉ុណ្ណោះ។
ភរិយាផលិតកររឿង«ម្ដាយខ្ញុំលក់ខ្ញុំ» លោក រ៉ាត់ រត្នមុនី ដែលត្រូវបានតុលាការចោទប្រកាន់ និងឃុំខ្លួនក្នុងពន្ធនាគារជាង១ឆ្នាំមកហើយនោះ អ្នកស្រី ឡុង គឹមហ៊ាង មានប្រសាសន៍ថា អ្នកស្រីមានការបារម្ភចំពោះសុវត្ថិភាព និងសុខភាពប្ដីរបស់អ្នកស្រីជាខ្លាំងចំពោះបញ្ហាកូវីដ១៩នេះ ខណៈពន្ធនាគារបានបិទមិនឱ្យមានការចូលសួរសុខទុក្ខ ហើយជាងនេះទៀតនោះក៏មិនអាចមានមធ្យោបាយណាអាចទាក់ទងទៅប្ដីរបស់ខ្លួនបានទៀតនោះ។
អ្នកស្រី ឡុង គឹមហ៊ាង៖ «ខ្ញុំពិតជាបារម្ភចំពោះប្ដីរបស់ខ្ញុំខ្លាំងមែនទែន ពីព្រោះដោយសារតែគាត់រស់នៅជុំអ្នកដទៃពាក់ព័ន្ធច្រើន មិនដឹងអ្នកណាខ្លះ ខ្ញុំមិនដឹង។ ហើយខ្ញុំអត់បានដំណឹងរបស់គាត់ ពីព្រោះដោយសារគេផ្អាកមិនឱ្យជួបសាច់ញាតិ ដែលធ្វើឱ្យប្អូនស្រីខ្ញុំមិនបានទៅជួប។ អ៊ីចឹង ខ្ញុំអត់ដឹងថា ប្ដីខ្ញុំសុខទុក្ខរបៀបណា យ៉ាងម៉េច ដែលខាងពន្ធនាគារ ឬក៏រដ្ឋាភិបាលអ្វីបន្ថែមក្រៅតែពីហាមឃាត់មិនឱ្យមានការជួប ឬការការផ្ញើអីវ៉ាន់ ឱ្យមានយន្តការអ្វីផ្សេងដើម្បីឱ្យយើងបានជួបក្រុមគ្រួសាររបស់យើងពីក្រៅទៅខាងក្នុងហ្នឹង អត់មានឃើញ។ អ៊ីចឹង ខ្ញុំសុំឱ្យរដ្ឋាភិបាលពិចារណាពីរឿងនេះ ដើម្បីឱ្យពួកយើងបាត់ការព្រួយបារម្ភ»។
អ្នកស្រីស្នើដល់រដ្ឋាភិបាលមានការពិចារណាដោះលែងប្ដីរបស់អ្នកស្រី ក៏ដូចជាអ្នកដែលត្រូវជាប់ឃុំដោយគ្មានកំហុសផ្សេងទៀតផងដែរ។
កញ្ញា កែវ ចាន់រចនា ដែលជាកូនស្រីបង្កើតរបស់អតីតប្រធានគណបក្សសង្គ្រោះជាតិ លោក កែវ ថៃ ប្រចាំខេត្តកំពង់ឆ្នាំង ដែលត្រូវសមត្ថកិច្ចចាប់ខ្លួន និងបញ្ជូនទៅពន្ធនាគារកាលពីចុងខែមីនាកន្លងទៅ បានឱ្យដឹងថា កញ្ញាមានការបារម្ភចំពោះឪពុកខ្លួនជាខ្លាំង ខណៈឪពុកកញ្ញាមានវ័យចំណាស់ និងមានជំងឺប្រចាំកាយទៀតនោះ។
កញ្ញាថា៖ «ខ្ញុំបារម្ភ ព្រោះអី ដោយសាររឿងកូរ៉ូណាហ្នឹងផង ទីពីរ គឺជំងឺប្រចាំកាយរបស់គាត់។ គាត់ឧស្សាហ៍ឡើងឈាម មានជាតិអាស៊ីតឡើង និងអាលែកហ្ស៊ីច្រមុះទៀត»។
ក្នុងសេចក្តីប្រកាសចុះថ្ងៃទី៦ ខែមេសា អង្គការឃ្លាំមើលសិទ្ធិមនុស្ស Human Right Watch បានជំរុញដល់រដ្ឋាភិបាលកម្ពុជា ឱ្យមានវិធានការកាត់បន្ថយការប្រឈមនៃជំងឺកូវីដ១៩ នៅក្នុងពន្ធនាគារ ដោយកាត់បន្ថយការលើសចំនួននៃអ្នកទោសនៅពន្ធនាគារ ដោយដោះលែងអ្នកទោសនយោបាយ អ្នកប្រព្រឹត្តិបទល្មើសតូចតាច និងគួរជ្រើសរើសជម្រើសផ្សេងក្នុងការឃុំខ្លួនអ្នកទោសដែលមានវ័យចំណាស់ ស្ត្រីដែលមានផ្ទៃពោះ និងកុមារជាដើម។
Human Right Watch បានដកស្រង់ប្រសាសន៍របស់នាយករងប្រចាំតំបន់អាស៊ី លោក Phil Robertson ដោយលើកឡើងថា៖ «ពន្ធនាគារដែលចង្អៀតណែននៅក្នុងប្រទេសកម្ពុជា គឺតំបន់គ្រោះមហន្តរាយនៃជំងឺកូវីដ១៩ ដែលកំពុងរង់ចាំការកើតឡើង។ […] ប្រទេសកម្ពុជាគួរតែដោះលែងអ្នកទោសដែលមានការប្រឈមខ្ពស់ ក៏ដូចជាអ្នកដែលត្រូវបានឃុំខ្លួនពីបទល្មើសតូចតាច និងចាត់វិធានការបន្ទាន់ដើម្បីធានាថា អ្នកទោសទទួលបានការថែទាំសុខភាពគ្រប់គ្រាន់»។
កាលពីថ្ងៃទី២៥ ខែមីនា កន្លងទៅ ឧត្តមស្នងការសិទ្ធិមនុស្សអង្គការសហប្រជាជាតិ លោកស្រី Michelle Bachelet បានជំរុញដល់រដ្ឋាភិបាលប្រទេសនានាឱ្យធ្វើការកាត់បន្ថយចំនួនអ្នកជាប់ឃុំ ដោយដោះលែងអ្នកដែលងាយរងគ្រោះពីជំងឺកូវីដ១៩ ដែលមានដូចជា ជនចាស់ជរា ជនមានជំងឺប្រចាំកាយ ក៏ដូចជាអ្នកប្រព្រឹត្តិបទល្មើសតូចតាចផងដែរ។ ជាងនេះទៅទៀត នៅពន្ធនាគារត្រូវផ្ដល់ការថែទាំសុខភាពដល់អ្នកទោសជាស្ត្រីរួមទាំងស្រ្តីមានផ្ទៃពោះ អ្នកទោសជាជនពិការ និងអនីតិជនផងដែរ។
យោងតាមសេចក្តីប្រកាសរបស់ឧត្តមស្នងការសិទ្ធិមនុស្សអង្គការសហប្រជាជាតិ ក្រោយការប្រកាសនេះ ប្រទេសអ៊ីរ៉ង់បានសម្រេចដោះលែង និងសម្រេចឱ្យនៅក្រៅឃុំដល់អ្នកទោសជាង ១០ម៉ឺននាក់ ប្រទេសឥណ្ឌូនេស៊ី ក៏កំពុងពិចារណាដោះលែងអ្នកទោសដែលប្រព្រឹតិ្តបទល្មើសតូចតាចជាង ៣ម៉ឺននាក់ ខណៈប្រទេសតួគី និងឥណ្ឌា ក៏កំពុងពិចារណានូវការដោះលែងអ្នកទោសនេះដូចគ្នាដែរ៕
