អគ្គមេបញ្ជាការទ័ពបានបញ្ជាដល់កងទ័ពទាំងអស់ឱ្យត្រៀមខ្លួនក្នុងការចេញអន្តរាគមន៍ទប់ស្កាត់ការរាលដាលនៃជំងឺកូវីដ១៩ ក្នុងឱកាសបុណ្យចូលឆ្នាំខ្មែរខាងមុខ។
ក្នុងបទបញ្ជាចុះថ្ងៃទី៣១ ខែមីនា អគ្គមេបញ្ជាការទ័ព លោក វង្ស ពិសេន បានបញ្ជាឱ្យទ័ពទាំងអស់រក្សាកម្លាំងខ្លួនក្នុងបន្ទាយ មិនត្រូវប្រមូលផ្ដុំជប់លៀង និងត្រូវត្រៀមកម្លាំងដើម្បីអន្តរាគមន៍ទប់ស្កាត់ការរីករាលដាលនៃជំងឺកូវីដ១៩។
ក្នុងបទបញ្ជានោះបានលើកឡើង៖ «នាយកខុទ្ទកាល័យអគ្គបញ្ជាការដ្ឋាន មេបញ្ជាការប្រភេទ និងទ័ពជំនាញ នាយកស្ថាប័ន និងសាលាចំណុះអគ្គបញ្ជាការដ្ឋាន ត្រូវចាត់តាំងអនុវត្តបទបញ្ជានេះឱ្យមានប្រសិទ្ធភាពខ្ពស់ចាប់ពីពេលចុះហត្ថលេខានេះតទៅ រហូតដល់មានបទបញ្ជាថ្មី និងរាយការណ៍ជាប្រចាំមកទីចាត់ការកលយុទ្ធអគ្គបញ្ជាការដ្ឋាន»។
បញ្ជាឱ្យទ័ពត្រៀមកម្លាំងនៅពេលនេះគឺក្នុងពេលដែលកម្ពុជាកំពុងធ្វើច្បាប់ដាក់ប្រទេសក្នុងភាពអាសន្ន និងឱកាសចូលឆ្នាំខ្មែរជិតមកដល់។
កាលពីថ្ងៃទី៣០ ខែមីនា លោក ហ៊ុន សែន បញ្ជាក់ដោយសំណូមពរដល់ពលរដ្ឋខ្មែរឱ្យប្រារព្ធពិធីចូលឆ្នាំនៅផ្ទះរបស់ខ្លួនរៀងៗខ្លួន ក្នុងឱកាសបុណ្យចូលឆ្នាំខាងមុខ និងហាមដាច់ខាតការជួបជុំគ្នាដែលមានគ្នាច្រើនដូចឆ្នាំមុនៗ ដោយថា ដើម្បីទប់ស្កាត់ការរីករាលដាលនៃជំងឺកូវីដ១៩៕
