រដ្ឋបាលក្រុងប៉ោយប៉ែត ខេត្តបន្ទាយមានជ័យ បានច្រានចោលព័ត៌មានដែលផ្សាយលើបណ្តាញសង្គមថា មានពលរដ្ឋចំនួន ១៥នាក់ឆ្លងជំងឺកូវីដ-១៩ និងមានអ្នកស្លាប់ជាដើម។
ក្នុងសេចក្តីប្រកាសព័ត៌មានរបស់រដ្ឋបាលក្រុងប៉ោយប៉ែត ខេត្តបន្ទាយមានជ័យ ចេញផ្សាយនៅថ្ងៃទី២៩ ខែមីនានេះថា កាលពីពេលថ្មីៗនេះ មានព័ត៌មានតាមបណ្តាញសង្គមមួយចំនួនផ្សព្វផ្សាយថា មានពលរដ្ឋចំនួន ១៥នាក់នៅក្រុងប៉ោយប៉ែត កើតជំងឺកូវីដ-១៩ និងមានអ្នកស្លាប់ទៀតផង។
ករណីនេះ រដ្ឋបាលក្រុងប៉ោយប៉ែត បញ្ជាក់ថា គិតត្រឹមថ្ងៃទី២៩ ខែមីនានេះ ក្រុមការងារបានយកសំណាកប្រជាពលរដ្ឋចំនួន ២៣នាក់ ទៅពិនិត្យនៅមន្ទីរពិសោធន៍ប៉ាស័្ទររាជធានីភ្នំពេញ ហើយរកឃើញអ្នកឆ្លងតែមួយករណីគត់ និងមិនមានអ្នកស្លាប់ដូចព័ត៌មានផ្សព្វផ្សាយលើបណ្តាញសង្គមនោះទេ។
ប្រភពដដែលបញ្ជាក់ថា អ្នកឆ្លងនោះជាស្ត្រី អាយុ ៣៦ឆ្នាំ បំរើការងារនៅស្តាស៊ីធី (Star City) ស្នាក់នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ហើយកំពុងសំរាកថែទាំ និងព្យាបាលនៅមន្ទីរពេទ្យបង្អែកប៉ោយប៉ែត។ រដ្ឋបាលក្រុងប៉ោយប៉ែត បញ្ជាក់ថា មិនមានចេតនាលាក់បាំងព័ត៌មានជុំវិញជំងឺកូវីដ-១៩នោះទេ។
ក្រសួងសុខាភិបាលឱ្យដឹងថា គិតត្រឹមម៉ោង៩ព្រឹក ថ្ងៃទី២៩ ខែមីនានេះ អ្នកដែលក្រុមគ្រូពេទ្យកម្ពុជាបានព្យាបាលឱ្យជាសះស្បើយពីកូវីដ-១៩ មានចំនួន២១នាក់៕