អ្នកនាំពាក្យក្រសួងសុខាភិបាល បានបញ្ជាក់ថា ជនជាតិឥណ្ឌូនេស៊ី២នាក់ដែលមានកូវីដ-១៩ បានធ្វើដំណើរពីប្រទេសថៃ ដោយសារលឺថា ប្រទេសកម្ពុជាព្យាបាលដោយមិនគិតថ្លៃ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលលើកឡើងថា ជនជាតិឥណ្ឌូនេស៊ីទាំង២នាក់នោះបានពិនិត្យឃើញវិជ្ជមានកូវីដ-១៩តាំងពីនៅប្រទេសថៃ តែពុំមានលទ្ធភាពបង់ថ្លៃព្យាបាល ទើបធ្វើដំណើរមកកម្ពុជា។
លោកស្រី ឱ វណ្ណឌីន មានប្រសាសន៍ថា៖ «[…] គាត់មើលនៅពេទ្យផាយ៉ាថៃ នៅបាងកក ដល់ពិនិត្យទៅធ្វើតេស្តនៅហ្នឹងទៅឃើញថាវិជ្ជមាន ប៉ុន្តែ ដូចដែលយើងដឹងហើយ ថៃមិនមែនមើលទទេទេ។ គាត់(ថៃ) charge (គិតថ្លៃ)លុយ។ ខ្ញុំមិនដឹងថា charge លុយប៉ុន្មានទេ ប៉ុន្តែ យើងលឺហើយការប្រកាសរបស់ថៃ ជនបរទេសហ្នឹងទាល់តែមាន health insurance (ធានារ៉ាប់រងសុខភាព) រហូតទៅដល់១០ម៉ឺនដុល្លារឯណោះ បានឱ្យចូលស្រុកថៃហ្នឹង។ អ៊ីចឹង ដោយសារឥណ្ឌូនេស៊ីហ្នឹងអត់មានលុយ អ៊ីចឹងគាត់ក៏ធ្វើដំណើរដោយសារលឺថា ស្រុកខ្មែរយើងហ្នឹងមើលដោយមិនយកលុយយកកាក់អីនោះ»។
អ្នកនាំពាក្យរូបនេះ បានបញ្ជាក់ថា នៅពេលដែលធ្វើដំណើរឆ្លងកាត់ព្រំដែនកម្ពុជា ជនជាតិឥណ្ឌូនេស៊ី២នាក់នោះពុំមានរោគសញ្ញា ឬអាការឡើងកម្តៅអ្វីនោះទេ។ លោកស្រីថា ប្រហែលជាពួកគាត់ប្រើប្រាស់ថ្នាំ ទើបនៅពេលដែលដើរឆ្លងកាត់ព្រំដែនចូលទឹកដីកម្ពុជា ក្រុមគ្រូពេទ្យខ្មែរស្គែនកម្តៅ តែមិនឃើញមានអ្វីខុសប្រក្រតីនោះទេ។
លោកស្រីបានឱ្យដឹងទៀតថា ជនជាតិឥណ្ឌូនេស៊ី២នេះបានជួលរថយន្តមួយដាច់តែពីរនាក់ ពីថៃមកចូលតាមច្រកប៉ោយប៉ែត ដោយនៅពេលដល់ខេត្តសៀមរាបភ្លាម ពួកគាត់បានទៅរកពេទ្យភ្លាម ថាគាត់មានកូវីដ-១៩។ លោកស្រី ឱ វណ្ណឌីន ថាអ្នកបើករថយន្តដែលពួកគាត់ទាំងពីរនាក់ជិះ ត្រូវបានរកឃើញរួចហើយដែរ ហើយកំពុងរង់ចាំលទ្ធផលតេស្ត។
គិតត្រឹមយប់ម៉ោង៨ ថ្ងៃទី២៦ ខែមីនា កម្ពុជារកឃើញអ្នកមានកូវីដ-១៩ ចំនួន៩៨ករណី ដែលក្នុងនោះព្យាបាលជាសះស្បើយ១១នាក់៕