រដ្ឋមន្ត្រីក្រសួងសុខាភិបាលបានរាយការណ៍ផ្ទាល់មាត់ប្រាប់លោកនាយករដ្ឋមន្ត្រី ហ៊ុន សែន កាលពីម្សិលមិញថា បុរសជនជាតិខ្មែរអាយុ៣៨ឆ្នាំដែលផ្ទុកមេរោគកូវីដ១៩មុនគេ នៅមិនទាន់ជាសះស្បើយនៅឡើយ ខណៈបុរសរូបនេះក៏កំពុងមានជំងឺរលាកថ្លើមផងដែរ។
នៅក្នុងពិធីសំណេះសំណាលជាមួយក្រុមគ្រូពេទ្យស្ម័គ្រចិត្តប្រឆាំងមេរោគកូវីដ១៩ កាលពីម្សិលមិញ លោកនាយករដ្ឋមន្ត្រី ហ៊ុន សែន បានលើកឡើងពីវិធានច្បាស់លាស់របស់រដ្ឋាភិបាល ក្នុងការប្រយុទ្ធប្រឆាំងការឆ្លងរាលដាលមេរោគកូវីដ១៩។ លោកក៏បានលើកឡើងពីជំងឺមួយចំនួនទៀត ដែលក្រុមគ្រូពេទ្យខ្មែរបានព្យាបាលជាសះស្បើយ។
ក្នុងឱកាសនោះ លោកនាយករដ្ឋមន្ត្រីក៏បានសួរទៅរដ្ឋមន្ត្រីក្រសួងសុខាភិបាល លោក ម៉ម ប៉ុនហេង ពីសុខភាពបុរសជនជាតិខ្មែរដែលឆ្លងមេរោគកូវីដ១៩មុនគេនៅសៀមរាប។
លោក ហ៊ុន សែន៖ «អ្នកនៅសៀមរាបដូចជានៅយូរជាងបន្តិចហេ! រលាកថ្លើម? ចឹងក្រៅពីអាជំងឺឆ្លងហ្នឹង គាត់មានជំងឺរលាកថ្លើមស្រាប់? តាមដឹងថា គាត់ជើងផឹកខ្លាំងដែរ?»
បុរសជាជនជាតិខ្មែរដំបូងគេរកឃើញមានផ្ទុកមេរោគកូវីដ១៩ គឺក្រសួងសុខាភិបាលបានរកឃើញកាលពីថ្ងៃទី៧ ខែមីនា មូលហេតុបុរសរូបនេះបានប៉ះពាល់ដោយផ្ទាល់ជាមួយជនជាតិជប៉ុនដែលផ្ទុកមេរោគនេះ។
