ក្រសួងសុខាភិបាល បានប្រកាសថាចំនួនអ្នកផ្ទុកកូវីដ-១៩ ដែលរកឃើញក្នុងប្រទេសកម្ពុជាគិតត្រឹមយប់នេះមាន៩៦ករណី។
នេះបើយោងតាមសេចក្តីជូនព័ត៌មានរបស់ក្រសួងសុខាភិបាលដែលចេញផ្សាយនៅថ្ងៃទី២៥ ខែមីនានេះ។ តាមក្រសួងសុខាភិបាលក្រៅពីស្រ្តី និងបុរសជនជាតិបារាំង២នាក់ដែលរកឃើញមានកូវីដ-១៩ នៅខេត្តព្រះសីហនុ ពលរដ្ឋខ្មែរ៣នាក់ទៀតក៏ត្រូវបានរកឃើញថាមានកូវីដ-១៩ ដែរ។ បុរសជនជាតិខ្មែរវ័យ៥៩ឆ្នាំម្នាក់នៅខេត្តកណ្តាលត្រួវបានរកឃើញថាមានកូវីដ-១៩ ដែលគាត់បានឆ្លងពីបុរសវ័យ៦០ឆ្នាំដែលចូលរួមពិធីសាសនានៅម៉ាឡេស៊ី។ ចំណែក១ករណីទៀតត្រូវបានរកឃើញលើបុរសជនជាតិខ្មែរអាយុ២៧ឆ្នាំនៅរាជធានីភ្នំពេញ។ រីឯករណីទី៣ត្រូវបានរកឃើញលើបុរសខ្មែរវ័យ៣៧ឆ្នាំនៅខេត្តសៀមរាបដែលជាអ្នកបើកបរឱ្យក្រុមទេសចរបារាំងដែលរកឃើញថាមានកូវីដ-១៩។
គិតត្រឹមថ្ងៃនេះក្រសួងសុខាភិបាលអះអាងថាខ្លួនបានព្យាបាលអ្នកផ្ទុកកូវីដ-១៩នេះ បានជាសះស្បើយចំនួន១០នាក់ហើយ៕