ក្រសួងសុខាភិបាលបានអះអាងថាស្ថាប័នខ្លួនគ្មានហេតុផលណាមួយដែលត្រូវលាក់ព័ត៌មានជុំវិញករណីមន្រ្តីជាន់ខ្ពស់កម្ពុជាម្នាក់ផ្ទុកកូវីដ-១៩នោះទេ។
នាយកដ្ឋានប្រយុទ្ធប្រឆាំងជំងឺឆ្លងបានលើកឡើងបែបនេះក្នុងទំព័រហ្វេសប៊ុករបស់ខ្លួននៅថ្ងៃនេះ បន្ទាប់ពីមានការចុះផ្សាយថាកម្ពុជាបានលាក់បាំងព័ត៌មានករណីមន្រ្តីជាន់ខ្ពស់ម្នាក់នៅក្រសួងការបរទេសឆ្លងកូវីដ-១៩។ នាយកដ្ឋាននេះសរសេថាស្ថាប័នខ្លួនបានបញ្ចូលទិន្នន័យទាក់ទងនឹងមន្រ្តីរូបនេះតាំងពីថ្ងៃទី១៨ខែមីនា មកម្ល៉េះ។
នាយកដ្ឋានប្រយុទ្ធប្រឆាំងជំងឺឆ្លងសរសេរថា៖«យើងបានបញ្ចូលទិន្និន័យមន្រ្តីជាន់ខ្ពស់ម្នាក់ជនជាតិខ្មែរធ្វើដំណើរពីស្រុកបារាំងដែលមានវិជ្ជមានCOVID19 ក្នុងតារាងទិន្នន័យរួមតាំងពីថ្ងៃទី១៨ មីនា ២០២០ ម្ល៉េះ ។ យើងគ្មានហេតុផលលាក់ទិន្នន័យ យើងធ្វើតាមជំនាញបច្ចេកទេសដោយមានសហការជិតស្និទ្ធជាមួយអង្គការWHO USCCDC និងវិទ្យាស្ថានប៉ាស្ទ័រកម្ពុជា។»
គិតត្រឹមម៉ោង៤រសៀលថ្ងៃទី២២ ខែមីនានេះ កម្ពុជាមានអ្នកផ្ទុកកូវីដ-១៩ ចំនួន៥៣ករណី ដែលក្នុងនោះក្រសួងសុខាភិបាលអះអាងថាព្យាបាលជាសះស្បើយមានចំនួន២នាក់៕