រដ្ឋាភិបាលសម្រេចកាត់ផ្ទៃដីបឹងតាមោក (បឹងកប់ស្រូវ) ចំនួន៧៥ហិកតា ស្ថិតនៅសង្កាត់គោករកា ខណ្ឌព្រែកព្នៅ ឱ្យសាលារាជធានីភ្នំពេញ ដើម្បីបង្កើតសួន និងឧទ្យានធម្មជាតិសាធារណៈ។
នេះបើយោងតាមលិខិតរបស់ទីស្តីការគណៈរដ្ឋមន្ត្រី ផ្ញើទៅក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដី នគរូបនីយកម្ម និងសំណង់ ក្រសួងធនធានទឹក និងឧតុនិយម និងសាលារាជធានីភ្នំពេញ កាលពីថ្ងៃទី១៣ ខែមីនា ឆ្នាំ២០២០។
អភិបាលរាជធានីភ្នំពេញ លោក ឃួង ស្រេង មានប្រសាសន៍ថា បច្ចុប្បន្ននេះ សាលារាជធានីភ្នំពេញកំពុងគូសប្លង់ រៀបចំធ្វើការអភិវឌ្ឍនៅតំបន់នោះនាពេលឆាប់ៗខាងមុខនេះ។ លោកបន្ថែមថា ការបង្កើតជាសួន និងឧទ្យានសាធារណៈនៅបឹងតាមោក នឹងធ្វើឱ្យពលរដ្ឋក្នុងរាជធានីមានជម្រើសច្រើន មិនប្រមូលផ្តុំតែមួយកន្លែងដែលនាំឱ្យមានការកកស្ទះចរាចរណ៍។
លោកមានប្រសាសន៍ថា៖ «មនុស្សត្រូវការឧទ្យានជាតិ មានដើមឈើ មានភាពបៃតង ដើម្បីទ្រទ្រង់ទៅថ្ងៃអនាគត។ នេះជាការគិតគូរការងារបរិស្ថាន បើនិយាយពីកន្លែងសប្បាយ យើងត្រូវមានប៉ូលមួយផ្សេងទៀត ឬប៉ូលច្រើនទៀត ដើម្បីឱ្យប្រជាពលរដ្ឋទៅលេងកំសាន្ត ក្នុងន័យកាត់បន្ថយការកកស្ទះផ្តុំគ្នា នៅតាមមុខវាំង ឬកន្លែងណាមួយ ឥឡូវយើងមានកន្លែងលេងច្រើន យើងមានមុខវាំង យើងមាននៅវិមានឈ្នះៗ យើងបង្កើតនៅកន្លែងនេះ [នៅបឹងតាមោក] មួយទៀត ធ្វើយ៉ាងណាឱ្យប្រជាពលរដ្ឋយើងមានជម្រើសច្រើន គាត់ទៅលេងមិនផ្តុំគ្នាច្រើន»។
នាយកប្រតិបត្តិសមាគមធាងត្នោត (STT) លោក សឿន សារ៉ន មានប្រសាសន៍តាមរយៈបណ្តាញសង្គមថា រដ្ឋាភិបាលសម្រេចកាត់ផ្ទៃដីបឹងតាមោក៧៥ហិកតា ជៀសមិនផុតពីការប៉ះពាល់ដល់សហគមន៍ដែលរស់នៅជុំវិញ និងការប្រកបរបរនេសាទរបស់ពួកគេនៅទីនោះ។ ប៉ុន្តែ លោកស្នើទៅរដ្ឋភិបាលធ្វើយ៉ាងណាកុំឱ្យជះឥទ្ធិពលអវិជ្ជមានដល់ជីវភាពរស់នៅរបស់ប្រជាពលរដ្ឋដែលងាយរងគ្រោះ។
លោកមានប្រសាសន៍ថា៖ «ចង់មិនចង់ តិចឬច្រើន វានឹងមានផលប៉ះពាល់ ក្នុងនាមអង្គការសង្គមស៊ីវិល ខ្ញុំគិតថា រាជរដ្ឋាភិបាល លោកគួរតែធ្វើការសិក្សាស្រាវជ្រាវអំពីផលប៉ះពាល់ ទាំងបរិស្ថាន សង្គម និងសេដ្ឋកិច្ចទៅលើប្រជាពលរដ្ឋដែលពួកគេរស់នៅតំបន់នោះ។ ហើយរបាយការណ៍ហ្នឹងគួរតែចេញផ្សាយជាសាធារណៈ ដើម្បីឱ្យមានតម្លាភាព និងគណនេយ្យភាពចំពោះអ្នកពាក់ព័ន្ធទាំងឡាយ»។
កាលពីដើមខែកុម្ភៈ ឆ្នាំ២០១៦ រដ្ឋាភិបាលកម្ពុជាបានចេញអនុក្រឹត្យស្ដីពីការកំណត់ផ្ទៃបឹងតាមោកជាសម្បតិ្តរបស់រដ្ឋ ដែលមានផ្ទៃដីសរុបប្រមាណ ៣ ២៣៩ហិកតា សម្រាប់ស្តុកទឹកកខ្វក់ និងរំដោះទឹកចេញពីរាជធានីភ្នំពេញ។
កាលពីខែមិថុនា ឆ្នាំ២០១៨ រដ្ឋាភិបាល ក៏បានសម្រេចកាត់ផ្ទៃបឹងតាមោកចំនួន២០ហិកតាតាមសំណើរបស់សាលារាជធានីភ្នំពេញ ដើម្បីអភិវឌ្ឍធ្វើផ្សារបន្លែ និងចំណតរថយន្ត។
បើតាមរបាយការរណ៍សមាគមធាងត្នោត ឱ្យដឹងថា នៅជុំវិញបឹងតាមោកមានចំនួន ១៩ភូមិ ៥សង្កាត់ និងចំនួន២ខណ្ឌ (ព្រែកព្នៅ និងសែនសុខ)។ របាយការណ៍បញ្ជាក់ថា ប្រជាពលរដ្ឋដែលរស់នៅជុំវិញបឹងនោះបានអាស្រ័យផលពីបឹង មានដូចជា ការធ្វើស្រែ រកត្រី និងដាំដំណាំ ជាដើម៕