ម្ចាស់ពានរង្វាន់វីរជនបរិស្ថាន Goldman Environmental Prize និងសកម្មជនព្រៃឈើ៣រូបទៀត ត្រូវបានសាលាដំបូងខេត្តក្រចេះ សម្រេចដោះលែងឱ្យមានសេរីភាពវិញ ប៉ុន្តែ ត្រូវធ្វើតាមលក្ខខណ្ឌចំនួន២របស់តុលាការ។
ម្ចាស់ពានរង្វាន់វីរជនបរិស្ថាន Goldman Environmental Prize លោក អ៊ូច ឡេង មានប្រសាសន៍ថា ព្រះរាជអាជ្ញាខេត្តក្រចេះ បានសម្រេចដោះលែងរូបគាត់ និងសកម្មជនបីរូបទៀត រួមមាន លោក ខេម សុឃី លោក ស្រី ថី ហើយនិងលោក មេន ម៉ាត់ ឱ្យមានសេរីភាពវិញ ប៉ុន្តែ លោកថា តុលាការបានឱ្យលោកធ្វើលិខិតដាក់លក្ខខណ្ឌចំនួនពីរចំណុច រួមមាន ឱ្យលោកផ្អាកសកម្មភាពការងាររបស់ខ្លួនបណ្តោះអាសន្ន និងឱ្យទៅបំពេញបែបបទជូនដំណឹងទៅក្រសួងមហាផ្ទៃ ដើម្បីសុំដំណើរការអង្គការរបស់លោកស្របតាមច្បាប់។
វីរជនបរិស្ថានរូបនោះបញ្ជាក់ថា អង្គការរបស់លោកត្រូវបានអតីតប្រធានអង្គការដែលត្រូវគេបាញ់សម្លាប់ឈ្មោះ ឈុត វុទ្ធី បង្កើតឡើងស្របតាមច្បាប់ និងបានចុះបញ្ជីនៅក្រសួងមហាផ្ទៃ ព្រមទាំងអតីតប្រធាននោះ ផ្ទេរសិទ្ធិឱ្យលោកគ្រប់គ្រងបន្តផងដែរ។
លោក អ៊ូច ឡេង ចាត់ទុកការសម្រេចរបស់តុលាការថា លំអៀងទៅក្រុមហ៊ុនច្រើនជាងផ្តល់យុត្តិធម៌ឱ្យរូបលោក។
លោកមានប្រសាសន៍ថា៖ «ក្រុមហ៊ុនខលទៅប៉ូលីស តែប៉ូលីសខលទៅព្រះរាជអាជ្ញា ឱ្យព្រះរាជអាជ្ញាចាត់វិធានការតែម្តង ព្រះរាជអាជ្ញាគាត់បំពេញនីតិវិធីបែបបទ ដើម្បីតម្រូវចិត្តក្រុមហ៊ុន ធ្វើម៉េចឱ្យឃាត់ខាងក្រុមខ្ញុំឱ្យទាល់តែបាន ឱ្យខានតែបាន និយាយឱ្យសាមញ្ញ ដូចភាសាររកស៊ី អស់ប៉ុន្មានអស់ទៅឱ្យតែឃាត់ពួកហ្នឹងបាន»។
ទាក់ទិននឹងករណីនេះ ក្រុមអ្នកស្រលាញ់បរិស្ថានប្រហែលជាជិត៤០នាក់ បានប្រមូលផ្តុំនៅមុខសាលាដំបូងខេត្តក្រចេះចំនួនពីរថ្ងៃនេះផងដែរ ដើម្បីទាមទារឱ្យតុលាការដោះលែងលោក អ៊ូច ឡេង និងសកម្មជន៣រូបទៀត មានសេរីភាពវិញ និងឈប់យាយីលើអ្នកការពារបរិស្ថានផងដែរ។
សកម្មជនបរិស្ថាន កញ្ញា ឡុង គន្ធា ព្រមានថា បើតុលាការនៅតែគំរាមកំហែង និងបន្តធ្វើទុក្ខបុកម្នេញលើលោក អ៊ូច ឡេង និងសកម្មជនបរិស្ថានទាំង៣រូបនោះ ពួកគេនឹងនាំគ្នាធ្វើបាតុកម្មទាមទារយុត្តិធម៌ ដើម្បីការពារធនធានធម្មជាតិជាដើម។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក សឹង សែនករុណា ដែលតាមដានអង្កេតរឿងនេះផ្ទាល់ មានប្រសាសន៍ថា បន្ទាប់ពីព្រះរាជអាជ្ញាសាកសួរ និងចាក់វីដេអូនៅព្រឹកថ្ងៃនេះ ពាក់ព័ន្ធនឹងវីដេអូដែលសមត្ថកិច្ចរឹបអូសពីលោក អ៊ូច ឡេង និងសកម្មជន៣រូបទៀត មិនឃើញមានសកម្មភាពណាថាពួកគេចូលទៅក្នុងទីតាំងក្រុមហ៊ុននោះទេ។
មន្ត្រីស៊ើបអង្កេតរូបនោះ ចាត់ទុកការសម្រេចរបស់តុលាការ ដែលដាក់ឱ្យលោក អ៊ូច ឡេង និងសកម្មជនផ្សេងទៀត ស្ថិតក្នុងលក្ខខណ្ឌពីរចំណុចនោះ ជារឿងមិនត្រឹមត្រូវ។ លោកជំរុញទៅតុលាការ គួរតែធ្វើការស៊ើបអង្កេតលើក្រុមហ៊ុន ដោយយករូបភាពកាប់ឈើដែលលោក អ៊ូច ឡេង ថតបាន ជាជាងចោទប្រកាន់សកម្មជនការពារព្រៃឈើ។
លោកមានប្រសាសន៍ថា៖ «ភ្ញាក់ផ្អើលដែរ ព្រោះការបង្ហាញវាអត់មានភស្តុតាងណាដែលបង្ហាញថា លោក អ៊ូច ឡេង ឬក៏សកម្មជនទៅក្នុងក្រុមហ៊ុនទេ រូបភាពព្រៃឈើដែលលោកថតរូបឈើភ្ជាប់ជាមួយនឹង GPS ទីតាំងបំផ្លិចបំផ្លាញព្រៃឈើទៅវិញទេ។ អញ្ចឹង វាជាតម្រុយភស្តុតាងមួយទៀត ដែលក្នុងនាមលោកជាព្រះរាជអាជ្ញា ជាអ្នកអនុវត្តច្បាប់ គួរតែទទួលយកភស្តុតាងទាំងអស់វិញ ដើម្បីសហការជាមួយគាត់ [លោក អ៊ូច ឡេង] បើកការស៊ើបអង្កេតទៅលើក្រុមហ៊ុន [ឈ្មោះ ស៊ីងបាយអូតិក] វិញបានត្រូវ»។
វីអូឌី មិនអាចទំនាក់ទំនងទៅព្រះរាជអាជ្ញារង លោក ជា សុភ័ក្រ ព្រះរាជអាជ្ញារង សៅ វុទ្ធី និងព្រះរាជអាជ្ញា កែវ សុជាតិ បានទេនៅរសៀលថ្ងៃនេះ។
អ្នកការពារព្រៃឈើទាំង៤នាក់នោះ ត្រូវបានបុគ្គលិកក្រុមហ៊ុនឯកជនមួយឈ្មោះ ស៊ីងបាយអូតិក (Think Biotech) ចាប់ឃាត់ខ្លួនកាលពីព្រឹកថ្ងៃទី១៣ ខែមីនា នៅចំណុចដំបូកស ភូមិរមួល ឃុំបឹងចា ស្រុកសំបូរ ខេត្តក្រចេះ ។
ទាក់ទងនឹងសំណុំរឿងនេះដែរ អង្គការចំនួន៦ បានធ្វើសេចក្តីថ្លែងការណ៍រួមមួយកាលពីម្សិលមិញ បានអំពាវនាវទៅសមត្ថកិច្ចខេត្តក្រចេះ រក្សាសុវត្ថិភាព និងដោះលែងអ្នកទាំង៤នាក់ ដោយគ្មានលក្ខខណ្ឌ និងស្នើឱ្យធ្វើការស៊ើបអង្កេត ចំពោះភាពមិនប្រក្រតីនៃការឃាត់ខ្លួនសកម្មជនការពារបរិស្ថានទាំង៤នាក់នោះផងដែរ៕