រដ្ឋមន្ត្រីក្រសួងមហាផ្ទៃ លោក ស ខេង បានថ្លែងថា វិជ្ជាជីវៈប៉ូលិសគឺត្រូវអនុវត្តច្បាប់ដោយមិនត្រូវខ្លាចការអនុវត្តប៉ះលើអ្នកណានោះទេ ខណៈលោកចាត់ទុកអ្នកមានបុណ្យសក្តិធំតែមិនគោរពច្បាប់ គឺជាមនុស្សភ្លើផងដែរ។
ថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៩ របស់រដ្ឋបាលខេត្តព្រៃវែង នៅព្រឹកថ្ងៃទី១២ ខែមីនានេះ លោក ស ខេង បានថ្លែងថា ប៉ូលិសកម្ពុជាមានការគោរពពលរដ្ឋណាស់ ដែលថា ពេលខ្លះគោរពរហូតដល់ថ្នាក់ខុសវិជ្ជាជីវៈរបស់ខ្លួន។ លោកបានបន្ថែមទៀតថា ពេលខ្លះប៉ូលិសបុណ្យសក្តិតូចមិនត្រូវបានអ្នកមានបុណ្យសក្តិធំគោរពសោះ បើទោះបីអ្នកមានបុណ្យសក្តិធំនោះខុសច្បាប់ក៏ដោយ។
លោក ស ខេង៖ «អ្នកខ្លះគេថា អេ!ខ្ញុំផ្កាយបី ទៅឱ្យព្រិន្ទបាលទោ ព្រិន្ទបាលត្រី ឆែកឆេរម៉េចហ្នឹងត្រឹមត្រូវ។ អ្នកខ្លះមកដល់ថ្ងៃហ្នឹង នៅតែគិតបែបហ្នឹងទៀត អ៊ីចឹងខ្ញុំថា អ្នកផ្កាយ៣ ផ្កាយ៤ហ្នឹង គឺភ្លើតែម្ដង។ ភ្លើជាងប្រជាជនទៀត! ថាអ្នកហ្នឹងសក្តិតូច មិនអាចទៅផាក [ពិន័យ] សក្តិធំបានទេ អ្នកហ្នឹងជាប៉ូលិសមិនអាចទៅផាកយោធាបានទេ។ វាអត់ត្រូវនិយាយអ៊ីចឹង វាខុសច្បាប់។ ច្បាប់គេនិយាយមួយម៉ាត់ គេថា អ្នកទាំងអស់គ្នាស្មើភាពចំពោះមុខច្បាប់! មានន័យថាម៉េច? មានន័យថា អ្នកទាំងអស់គ្នាដែលដើរលើផ្លូវ ច្បាប់ចរាចរណ៍គេនិយាយថាម៉េច គោរពតាមហ្នឹងទៅ»។
នាយកប្រតិបត្តិសម្ព័ន្ធគណនេយ្យភាពសង្គម លោក សន ជ័យ មានប្រសាសន៍ថា បញ្ហានេះបណ្ដាលមកពីវប្បធម៌នៃការរួចទោសរបស់អ្នកមានអំណាចក្នុងសង្គម ដែលបណ្ដាលឱ្យមន្ត្រីថ្នាក់តូចតាចមិនហ៊ានអនុវត្តច្បាប់លើអ្នកមានបុណ្យសក្តិធំ ឬក្រុមគ្រួសារអ្នកធំទាំងនោះ តែហ៊ានអនុវត្តលើប្រជាជនទន់ខ្សោយ។ លោកបន្ថែមថា បញ្ហានេះនឹងបង្កឱ្យមានអយុត្តិធម៌ក្នុងសង្គម ការគាបសង្កត់ និងអំពើជិះជាន់ក្នុងសង្គមកាន់តែខ្លាំង។
លោក សន ជ័យ៖ «វាមិនមែនរឿងដែលចម្លែកទេក្នុងសង្គមខ្មែរ ហើយថ្នាក់ដឹកនាំខាងលើចេះតែថា តែនៅថ្នាក់ក្រោមមានរឿងកើតឡើងពេញទី។ ហើយវាមានរឿងឆ្លុះបញ្ចាំងគ្នាទៅវិញទៅមកដែរ សព្វថ្ងៃនេះយើងពិបាកនឹងរកភាពជាគំរូណាស់! នៅពេលដែលនិយាយអំពីការប្រើប្រាស់ឥទ្ធិពល អំណាច ឬក៏តួនាទីដើម្បីទទួលបានផលប្រយោជន៍ក្នុងសង្គមនោះ»។
លោក សន ជ័យ ឱ្យជាយោបល់ថា រដ្ឋគួរតែមានច្បាប់ ឬវិធានការឱ្យបានច្បាស់លាស់ក្នុងការពិនិត្យទៅលើទំនាស់ផលប្រយោជន៍របស់មន្ត្រីរដ្ឋ ដើម្បីការពារកុំឱ្យមានរឿងបែបនេះកើតឡើងតទៅទៀត៕
