មន្ត្រីជាន់ខ្ពស់រដ្ឋាភិបាលបញ្ជាក់ថា វិធានការលើអ្នកបង្កើតព័ត៌មានមិនពិត គឺដើម្បីការពារស្ថិរភាពសង្គម និងធានាកុំឱ្យមានការបំផុសបំផុលធ្វើឱ្យជ្រួលច្របល់តទៅទៀតនាថ្ងៃអនាគត។
ថ្លែងក្នុងកិច្ចពិភាក្សាស្ដីពី សារព័ត៌មាន ចំពោះមុខកូវីដ-១៩ (COVID-19) និងព័ត៌មានក្លែងក្លាយនៅព្រឹកថ្ងៃទី១១ ខែមីនា អ្នកនាំពាក្យក្រសួងព័ត៌មាន លោក ផុស សុវណ្ណ មានប្រសាសន៍ថា ជាទូទៅក្រសួងតែងតែប្រកាន់នូវគោលការណ៍អប់រំជាជាងវិធានការក្ដៅដល់អ្នកសរសេរ ឬបង្ហោះលើអ៊ិនធឺណិត តែលោកថា នៅពេលដែលព័ត៌មានមិនពិតត្រូវបានបង្កើតកាន់តែច្រើន គឺរដ្ឋាភិបាលត្រូវមានវិធានការខ្លះហើយ ដើម្បីកុំឱ្យមានទំនោរនេះកើតឡើងនាថ្ងៃអនាគតទៀត។
លោក ផុស សុវណ្ណ លើកឡើងថា៖ «កន្លងទៅ សម្តេចនាយករដ្ឋមន្ត្រីធ្លាប់ធ្វើការអំពាវនាវច្រើនជាមួយសារព័ត៌មាន ហើយក៏ចាត់ចំណាត់ថ្នាក់អ្នកដែលបំផុសព័ត៌មាន ឬដំណឹងក្លែងក្លាយស្ទើរតែជាភេរវករ។ បើសិនយើងយោងតែអនុសាសន៍មួយនេះ គឺយើងអាចកៀរគរកម្លាំងមកធ្វើបានហើយ តាំងពីអាវុធហត្ថ ឬក៏ក្រសួងយុត្តិធម៌ចូលរួម។ ថ្មីៗ ក៏យើងឃើញក្រសួងយុត្តិធម៌ចូលរួមធ្វើការងារដែរ អ៊ីចឹង យើងអាចនិយាយបានថាយើងអាចចេញជាកម្លាំងសរុបមួយធ្វើព្រមគ្នា»។
ការលើកឡើងរបស់លោក ផុស សុវណ្ណ នេះ គឺបន្ទាប់ពីរដ្ឋាភិបាលចាប់ផ្ដើមមានវិធានការជាបន្តបន្ទាប់លើអ្នកចែកចាយព័ត៌មានមិនពិតពីជំងឺកូវីដ-១៩ (COVID-19) នៅលើបណ្ដាញសង្គមហ្វេសបុក។
អ្នកនាំពាក្យក្រសួងសុខាភិបាល លោកស្រីវេជ្ជបណ្ឌិត ឱ វណ្ណឌីន បានថ្លែងក្នុងកិច្ចពិភាក្សានេះផងដែរថាព័ត៌មានមិនពិតពាក់ព័ន្ធនឹងជំងឺកូវីដ-១៩ (COVID-19) នៅកម្ពុជាភាគច្រើន គឺមានប្រភពចេញពីក្រៅប្រទេស និងបន្តចែកចាយដោយអ្នកនៅក្នុងប្រទេស។ លោកស្រីថា កាលណារដ្ឋមិនធ្វើការទប់ស្កាត់ព័ត៌មានមិនពិតនេះទាន់ពេលវេលា វានឹងធ្វើឱ្យពលរដ្ឋយល់ថា ជាព័ត៌មានពិតដែលនឹងធ្វើឱ្យប៉ះពាល់ធ្ងន់ធ្ងរដល់សង្គម។
លោកស្រី ឱ វណ្ណឌីន មានប្រសាសន៍ថា៖ «ហាក់បីដូចជាមានក្រុមតូចមួយនៅក្នុងប្រទេសហ្នឹងចាំទទួលបន្ត ហើយនៅពេលដែលក្រុមនេះទទួលបន្ត នោះគាត់ក៏ប្រសាចភ្លាម ហើយនៅពេលដែលគាត់ប្រសាចភ្លាមហ្នឹង ដូចយើងបាននិយាយខាងដើម ព័ត៌មានអ្នក Share [ចែករំលែក] ហ្នឹង គឺច្រើនជាងអ្នកមិន Share។ អ៊ីចឹងការដែល Share ពីមួយទៅមួយហ្នឹង នៅពេលដែលយើងទប់ស្កាត់អត់ទាន់ទេ ព័ត៌មានមិនពិតហ្នឹងនឹងក្លាយជាព័ត៌មានពិត»។
អគ្គលេខាធិការនៃក្លិបអ្នកកាសែតកម្ពុជា លោក ពុយ គា មានប្រសាសន៍ថា ពលរដ្ឋគួរតែមានជំនាញក្នុងការពិនិត្យលើព័ត៌មាន ដើម្បីឱ្យដឹងថា ព័ត៌មាននោះពិត ឬមិនពិត ដើម្បីកុំឱ្យចែកចាយទៅបង្កជាបញ្ហាដល់សង្គម។ លោកបន្ថែមថា ព័តមានពិតគឺមានប្រភពព័ត៌មានច្បាស់លាស់ សំណេរគ្មានលំអៀង គ្មានការបំផុសបំផុល ឬធ្វើឱ្យភ័យខ្លាចហួសហេតុ មានកាលបរិច្ឆេទ និងអ្នកសរសេរច្បាស់លាស់។
លោក ពុយ គា និយាយថា៖ «បើយើងក្រឡេកមកព័ត៌មានក្លែងក្លាយហ្នឹង សួរថា វាចេញមកពីណា? បច្ចុប្បន្ននេះ ដោយសារបច្ចេកទេសទំនើប ដូច្នេះ អ្នកណាក៏ធ្វើបានដែរព័ត៌មានក្លែងក្លាយ ចង់គាត់នៅកន្លៀតណា ចាស់ក្មេងអី គឺអត់បញ្ហាទេ។ កន្លែងណាក៏អាចសរសេរបានដែរ តែបញ្ហាដែលធំហ្នឹងតែប៉ុន្មានម៉ោងក្រោយការផ្សាយហ្នឹង វាធ្វើឱ្យសង្គមវាជ្រួលច្របល់ បើសិនជាព័ត៌មានរសើបមែនទែន វាធ្វើឱ្យសង្គមវាជ្រួលច្របល់»។
រហូតមកដល់ពេលនេះ មានមនុស្សយ៉ាងហោចណាស់៥នាក់ហើយដែលត្រូវចាប់ខ្លួន និងធ្វើកិច្ចសន្យាពាក់ព័ន្ធនឹងការបង្កើតព័ត៌មានពីជំងឺកូវីដ-១៩ (COVID-19)នេះ ក្នុងនោះមានម្នាក់ត្រូវបញ្ជូនទៅតុលាការ។ លោកនាយករដ្ឋមន្ត្រី ហ៊ុន សែន កាលពីថ្ងៃច័ន្ទ បានអំពាវនាវឱ្យពលរដ្ឋទុកចិត្តលើរដ្ឋាភិបាលរបស់លោក កុំជឿលើការបំផុសបំផុលលើបណ្ដាញសង្គម ដោយថា ការជឿលើព័ត៌មានមិនពិត នឹងធ្វើឱ្យមានការជ្រួលច្របល់ក្នុងសង្គមកាន់តែខ្លាំង។
លោក ហ៊ុន សែន ថា៖ «ដំបូង ជំនឿទុកចិត្តលើរដ្ឋាភិបាលខ្លួនឯងតែម្ដង។ ប្រាប់ថា អញអត់ឈឺអីទេ ដូច្នេះអាណាចង់បំផុសអីបំផុសទៅ ទីចុងបំផុត អញអត់ឈឺ អ្នកដទៃទៀតដែលគេថា ឈឺក៏អត់ឈឺដែរ។ អាស្រវឹងស្រាដួលក៏កូរ៉ូណា តាមពិតវាស្រវឹងស្រាសោះ ដល់វាដួលចំពេលហ្នឹង វាយកទៅបំផុសបណ្ដោយ។ ជំនឿទុកចិត្តទីពីរ បើមានការសង្ស័យរត់ទៅរកពេទ្យ ដើម្បីសង្គ្រោះខ្លួនឯង រត់ទៅរកពេទ្យទៅ ដើម្បីឱ្យពេទ្យយកសំណាកទៅពិនិត្យ»។
រហូតមកដល់ពេលនេះ ក្រសួងសុខាភិបាលកម្ពុជាបានរកឃើញអ្នកជំងឺកូវីដ-១៩ (COVID-19) ចំនួន៣នាក់ហើយ ក្នុងនោះមានជនជាតិខ្មែរម្នាក់ដែលនៅខេត្តសៀមរាប បន្ទាប់ពីមានការរកឃើញនេះ ពលរដ្ឋខ្មែរមួយចំនួនបាននាំគ្នាទៅរកទិញស្បៀងអាហារ និងម៉ាស់ស្តុកទុកនៅផ្ទះរៀងខ្លួន ដែលសកម្មភាពនេះត្រូវបានលោកនាយករដ្ឋមន្ត្រីចាត់ទុកថា ជាការភ័យខ្លាចជ្រុលហួសហេតុ៕
