ប្រមុខ​​រាជ​រដ្ឋាភិបាល​​ប្រកាស​​ថា ចិន​​សម្រេច​​ឱ្យ​​​នាវា​​ដឹក​​វត្ថុ​ធាតុ​​ដើម​​ចំនួន​​៧​​គ្រឿង​​ចេញ​​​មក​​កម្ពុជា​

កំពង់ផែខេត្តព្រះសីហនុ ថ្ងៃទី ២៥ មិថុនា ២០១៨ (រូបភាព៖ ហ្វេសប៊ុក លោក ហ៊ុន សែន)

​លោក​នាយករដ្ឋមន្ត្រី ​ហ៊ុន សែន បាន​ថ្លែង​ថា ចិន​បាន​សម្រេច​បញ្ជូន​នាវា​ចំនួន​៧គ្រឿងដឹក​វត្ថុ​ធាតុ​ដើម​មក​កម្ពុជា​ ដើម្បី​ផ្គត់ផ្គង់​ដល់​សង្វាក់​ផលិត​កម្ម​រោងចក្រ​កាត់ដេរ បន្ទាប់​ពីរោង​ចក្រ​មួយ​ចំនួន​ប្រកាស​ព្យួរ​ការងារ​កម្មករ​ដោយ​សារ​ខ្វះវត្ថុធាតុ​ដើម។

ថ្លែង​ក្នុង​ពិធី​សម្ពោធ​ផ្លូវ​មួយ​ខ្សែ​ក្នុង​ខេត្ត​ពោធិ៍សាត់​នៅ​ព្រឹក​នេះ លោក​នាយករដ្ឋមន្ត្រី​ ហ៊ុន សែន បាន​ប្រកាស​ថា​ នាវា​ទាំង​៧​ដែល​ដឹក​វត្ថុធាតុ​ដើម​នោះ​មាន​៥​គ្រឿង នឹង​ចូល​ចតនៅ​កំពង់ផែ​ស្វយ័ត​ខេត្ត​ព្រះសីហនុ និង​២​គ្រឿង ចូល​ចត​នៅ​កំពង់​ផែ​ទីក្រុង​ហូជីមីញ។

លោកនាយករដ្ឋមន្ត្រី ហ៊ុន សែន ថ្លែងក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ៥៥ តភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅកាន់ព្រំដែនថ្មដា ជាប់ជាមួយខេត្តត្រាត ប្រទេសថៃ និងបើកការដ្ឋានសាងសង់ផ្លូវជាតិ១០ តភ្ជាប់ពីសំឡូត ទៅខេត្តកោះកុង នាព្រឹកថ្ងៃទី០៩ ខែមីនា ឆ្នាំ២០២០។ (ហ្វេសប៊ុកលោក ហ៊ុន សែន)

លោក​ថ្លែង​ថា៖ «ហេតុ​អី​បាន​ត្រូវ​ចូល​នៅ​ហូជីមិញ? គឺ​តំបន់​សេដ្ឋកិច្ច​ពិសេស​នៅ​ស្វាយ​រៀង ដឹក​ពី​ហូជីមិញ​មក ​វា​ជិត​ជាង បើ​ធៀប​នឹង​ដឹក​ពី​កំពង់​សោម​ទៅ ​គឺ​វា​ឆ្ងាយ​ជាង។ ហើយ​បើតាម​ព័ត៌មាន​មិត្ត​ចិន​ឱ្យ​ដឹង​ នាវា​៧​គ្រឿង​នេះ​មិន​មែន​ដឹក​ត្រឹម​ខែ​បី​នេះ​ទេ គឺ​ដល់​ខែប្រាំ​គឺ​រហូត​ដល់​សភាព​ការ​ធូរស្រាល»។

ក្រសួង​ការងារ​បាន​ឱ្យ​ដឹង​កាល​ពី​សប្ដាហ៍​មុនថា មាន​រោង​ចក្រ​កាត់ដេរ​ និង​ផលិត​ផល​ស្បែក​ជើង​សរុប​៣៣រោង​ចក្រ​នៅ​ទូ​ទាំង​ប្រទេស​ បាន​ស្នើ​សុំ​ព្យួរ​កិច្ច​សន្យាការងារ​រយៈពេល​២សប្ដាហ៍ ដល់​១ខែ ដែល​មាន​កម្មករ​សរុប​ជិត​២ម៉ឺន​នាក់​ត្រូវ​ប្រឈម​នឹង​ការ​ព្យួរ​ការងារ ក្រោយ​ពី​រោង​ចក្រ​ទាំង​នោះ​កង្វះ​វត្ថុធាតុ​ដើម​ដើម្បី​បម្រើ​សង្វាក់​ផលិត​កម្ម។

ទាក់ទង​នឹង​ករណី​នេះ​ VOD មិន​ទាន់​អាច​សុំ​ការ​បញ្ជាក់​បន្ថែម​ពី​អ្នក​នាំពាក្យ​ក្រសួង​ការងារ លោក ហេង សួរ និង​អគ្គលេខាធិការ​រង​នៃ​សមាគម​រោង​ចក្រ​កាត់​ដេរ លោក កាំង ម៉ូនីកា បាន​នៅឡើយ​ទេ​នៅ​ព្រឹក​នេះ។

អ្នក​ត្រួត​ពិនិត្យ​នៅ​រោង​ចក្រ​កាត់​ដេរ 7NG ដែល​ត្រូវ​បាន​រោង​ចក្រ​ព្យួរ​ការងារ​ដោយ​សារ​រោងចក្រ​ផ្អាក​សង្វាក់​ផលិត​កម្ម​ អ្នក​ស្រី​ លាង ធារី ថា​អ្នក​ស្រីមិន​ទាន់​ទទួល​ដំណឹង​ណា​មួយ​ពីរោង​ចក្រ​ក្នុង​ការ​ទទួល​ទៅ​ធ្វើ​ការ​ងារវិញ​នៅ​ឡើយ​ទេ ខណៈ​អ្នក​ស្រី​ថា ​មិន​សូវ​មាន​សង្ឃឹម​ថា ​នឹង​អាចចូល​ធ្វើ​ការ​វិញ​នាពេល​ឆាប់ៗ​នេះ​ទេ។

ប្រធាន​សហភាព​ការងារ​កម្ពុជា​ លោក អាត់ ធន់ មាន​ប្រសាសន៍​ថា វា​ជា​រឿង​ល្អ​ដែល​ចិន​សម្រេច​បញ្ជូន​នាវា​មក​ពេល​នេះ តែ​ថា​ការ​បញ្ជូន​នេះ​គឺ​អាច​ដោះស្រាយ​បាន​តែ​មួយ​គ្រា​ប៉ុណ្ណោះ។ 

លោកថា៖ «នៅ​ក្នុង​ទំហំ​នេះ​ យើង​មិន​ច្បាស់​ថា ​មាន​ប៉ុន្មាន​កុងតឺន័រ ប៉ុន្មាន​តោន​ទេ! ដែល​យក​មក​៥​ ទៅ​៦​កប៉ាល់​នេះ ខ្ញុំ​គិត​ថា ​មិន​ទាន់​ច្រើន​ទេ ព្រោះ​កាល​ពី​ទំហំ​ចាស់ក្នុង​១​ថ្ងៃចូល​មក​យ៉ាង​ហោច​ណាស់​១ ទៅ​២​កប៉ាល់​ដែរ​នោះ»។

ក្រោយ​ផ្ទុះ​ជំងឺ Covid-19 នៅ​ប្រទេសចិន​កាល​ពី​ចុង​ឆ្នាំ​មុន ចិន​បាន​សម្រេច​ផ្អាក​រោងចក្រ​ផលិត​កម្ម​មួយ​ចំនួន​ធំ​នៅ​ប្រទេស​ខ្លួន ដែលការ​ផ្អាក​នេះ​គឺបាន​​ធ្វើ​ឱ្យ​ប៉ះពាល់​ដល់​សង្វាក់​ផលិត​កម្ម​ប្រទេសមួយ​ចំនួន​ ក្នុង​នោះ​ក៏​មាន​កម្ពុជាផង​ដែរ ដោយ​សារ​ប្រទេស​នេះ​ពឹង​ផ្អែក​លើ​ការ​នាំ​ចូល​វត្ថុ​ធាតុ​ដើម​សម្រាប់​វិស័យ​កាត់​ដេរ​​ពី​ប្រទេស​ចិន។ អ្នក​ធ្វើ​ការ​ក្នុង​វិស័យ​ការងារ​ជំរុញដល់​រដ្ឋាភិបាល​គួរត្រលប់​ជំរុញ​ឱ្យ​មាន​ការ​បង្កើត​វត្ថុធាតុ​ដើម​ក្នុង​ប្រទេស​វិញ​ ដើម្បី​​ទប់​ស្កាត់​បញ្ហា​នេះ​កុំ​ឱ្យ​កើត​មាន​ទៀត​នៅ​ថ្ងៃ​ខាងមុខ៕  ​

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ