កម្មការិនីជិត៧០នាក់បម្រើការងារនៅរោងចក្រមួយនៅស្រុកគងពិសី ខេត្តកំពង់ស្ពឺ បានដួលសន្លប់ជាបន្តបន្ទាប់នៅថ្ងៃនេះ ខណៈដែលពួកគេកំពុងបំពេញការងារ។
ប្រធានមន្ទីការងារ និងបណ្តុះបណ្តាលវិជ្ជាជីវៈខេត្តកំពង់ស្ពឺ លោក ចឹក បូរិន ប្រាប់វីអូឌីថា នៅម៉ោងប្រហែល៩ព្រឹកនេះ កម្មការិនី៦៩នាក់បម្រើការងារនៅរោងចក្រ វីងស្តារ ស៊ូ ស្ថិតនៅភូមិអង្គសុគន្ធា ឃុំមហាឫស្សី បានដួលសន្លប់តាមគ្នាជាបន្តបន្ទាប់។
ប្រធានមន្ទីរការងាររូបនេះឱ្យដឹងថា ក្រោយមានការដួលសន្លប់របស់កម្មករ គឺមន្ទីរការងារខេត្តបានសហការជាមួយអាជ្ញាធរពាក់ព័ន្ធ បញ្ជូនកម្មករដួលសន្លប់ទាំងនោះទៅសម្រាកព្យាបាលនៅតាមមន្ទីរពេទ្យក្បែរៗនោះ ហើយថា រហូតមកដល់ម៉ោង៣រសៀលនេះ កម្មករភាគច្រើនបានចេញពីមន្ទីរពេទ្យទៅផ្ទះវិញហើយ។
លោក ចឹង បូរិន មិនអាចបញ្ជាក់ពីមូលហេតុនៃការដួលសន្លប់នេះច្បាស់លាស់នៅឡើយទេ ដោយថាគណៈកម្មការទប់ស្កាត់ករណីដួលសន្លប់ កំពុងចុះពិនិត្យកន្លែងកើតហេតុ។
ប៉ុន្តែ យ៉ាងណា លោកប្រាប់ថា ដើមហេតុដំបូងនៃការដួលសន្លប់នោះគឺមានស្ត្រីជាកម្មករម្នាក់ដែលមានជំងឺប្រចាំកាយបានដួលសន្លប់មុនគេ ក្រោយមកកម្មការិនីដែលឈរធ្វើការក្បែរនោះឃើញ បានទន់ដៃទន់ជើងហើយដួលសន្លប់តាមតៗគ្នារហូតមានគ្នា៦៩នាក់។
លោកបន្ថែមថា៖ «ហើយយើងបានធ្វើការងារជាមួយ ប.ស.ស ខេត្ត ដើម្បីចេញថ្លៃព្យាបាលឱ្យពួកគាត់ទាំងអស់។ ហើយឥលូវហ្នឹង គណៈកម្មការទប់ស្កាត់ករណីសន្លប់ កំពុងតែចុះមកពិនិត្យមើលរោងចក្រហ្នឹងជាក់ស្តែង»។
ប្រធានសហភាពការងារកម្ពុជា លោក អាត់ ធន់ ធ្លាប់លើកឡើងថា តាមការស្រាវជ្រាវ កម្មករដួលសន្លប់គឺដោយសារបរិយាកាសទាំងក្នុង និងក្រៅរោងចក្រមិនល្អ ការប្រើប្រាស់ថ្នាំគីមីផ្សេងៗ ធ្វើការហួសកម្លាំង ការហូបចុកមិនគ្រប់គ្រាន់ ការធ្វើការយូរឆ្នាំ និងច្រើនម៉ោងជាដើម។
មេសហជីពរូបនេះ ស្នើទៅមន្ត្រីក្រសួងការងារចុះពិនិត្យរាល់រោងចក្រដែលមានករណីកម្មករដួលសន្លប់ និងជំរុញឱ្យភាគីរោងចក្រធ្វើការកែលម្អឡើងវិញនូវបញ្ហាផ្សេងៗដែលធ្វើឱ្យប៉ះពាល់ដល់កម្មករ។
លោកបន្ថែមថា៖ «ដោយសារគាត់ធ្វើការក្នុងបរិយាកាសអាក្រក់ ដូចជា នៅក្នុងរោងចក្រនោះមានជាតិគីមី ធូលី កម្ដៅ ពន្លឺ និងអុកស៊ីសែននៅកន្លែងខ្លះមិនគ្រប់គ្រាន់ ហើយអគារខ្លះបិទជិត មិនឱ្យខ្យល់អុកស៊ីសែនចូលគ្រប់គ្រាន់ ធ្វើឱ្យកម្មករខ្សោយ។ ដល់អញ្ចឹង ពេលទៅជួបព្រឹត្តិការណ៍ ឬក្លិនអីថ្មីៗ ធ្វើឱ្យកម្មករសន្លប់តែម្តង»។
របាយការណ៍បេឡាជាតិរបបសន្តិសុខសង្គមឆ្នាំ២០១៧ បានឱ្យដឹងថា ការដួលសន្លប់របស់កម្មការិនី បណ្ដាលមកពីបញ្ហាក្លិនគីមីនៅក្នុងរោងចក្រ ទីតាំងរោងចក្រមិនមានបរិយាកាសល្អ ចង្អៀត ផ្នែកចិត្តសាស្ត្រសង្គម ករណីកម្មករស្លុតដួលតាមគ្នា បញ្ហាមេកានិចស្របពេលសុខភាពកម្មករមានសភាពទន់ខ្សោយដោយសារការសម្រាកមិនគ្រប់គ្រាន់ ការហូបអាហារមិនទៀងទាត់ និងគ្មានជីវជាតិ៕
