រដ្ឋាភិបាល​​បញ្ជាក់​​ថា ​ជនជាតិ​​ជប៉ុន​​ដែល​​រក​​ឃើញ​​មាន​​ផ្ទុក ​​COVID-19 ​ធ្លាប់​​ចេញ​ចូល​​កម្ពុជា​​២​ដង​

បុគ្គលិកសុខាភិបាលបាញ់ថ្នាំសម្លាប់មេរោគលើយន្តហោះធ្វើដំណើរមួយគ្រឿង នៅអាកាសយានដ្ឋានអន្តរជាតិមួយកន្លែង ក្នុងប្រទេសវៀតណាម នៅដើមឆ្នាំ២០២០។ (VGP)

ឯកអគ្គ​រាជទូតកម្ពុជា​ប្រចាំ​ប្រទេស​ជប៉ុន​បញ្ជាក់​ថា ​បុរសជនជាតិ​ជប៉ុនដែល​ត្រូវ​បាន​​រក​ឃើញ​ថា​មាន​ផ្ទុក​កូវីដ១៩ (COVID-19) ធ្លាប់​ចេញ​ចូល​កម្ពុជា​ចំនួន​២​លើក​។

ក្នុង​លិខិត​ជូន​រដ្ឋមន្ត្រី​ក្រសួង​ការបរទេស​ចុះ​ថ្ងៃ​ទី៥ ខែមីនា ឯកអគ្គរាជទូត​កម្ពុជា​ប្រចាំ​ប្រទេស​ជប៉ុន​ លោក អ៊ឹង រចនា បាន​បញ្ជាក់​ថា ​បុរស​ជនជាតិ​ជប៉ុនអាយុ​ជាង​៤០ឆ្នាំ​​រូប​នោះ​ បាន​ធ្វើ​ដំណើរ​ចេញ​ចូល​កម្ពុជា​ចំនួន​២​លើក គឺ​លើក​ទី​មួយ​នៅ​ថ្ងៃ​ទី​១៦ ខែកុម្ភៈ​ ហើយ​បាន​ចាក​ចេញ​ទៅ​ភីលីពីន​ថ្ងៃ​ទី​២១ និង​លើក​ទី​ពីរ​នៅ​ថ្ងៃ​ទី​២៨​ ខែកុម្ភៈ ហើយ​បាន​ចាក​ចេញ​ទៅ​ជប៉ុន​កាត់តាម​វៀតណាម​នៅ​ថ្ងៃ​ទី​៣ ខែមីនា។

ក្នុង​សេចក្តី​ជូន​ដំណឹង​នោះ​ក៏​បាន​បញ្ជាក់ផង​ដែរ​ថា បុរស​នេះ​បាន​ចេញ​រោគ​សញ្ញា​ដំបូង​នៅ​ប្រទេសភីលីពីន​នា​ថ្ងៃ​ទី​២១ និង​រោគ​សញ្ញា​លើក​ទីពីរ​នៅ​កម្ពុជា​នា​ថ្ងៃ​៣ ខែ​មីនា មុន​ចាក​ចេញ​ពី​ប្រទេស​។

ក្នុង​លិខិត​នោះ​បញ្ជាក់​ថា៖ «គាត់​ត្រលប់​មក​កម្ពុជា​វិញ​នៅ​ថ្ងៃ​ទី​២៨ ខែ​កុម្ភៈ​ ហើយ​នៅ​ថ្ងៃ​ទី​៣ ខែ​មីនា បាន​ទៅ​ពេទ្យ​ (ស្រុក​ខ្មែរ​មិន​បញ្ជាក់​ឈ្មោះ) (ព័ត៌មាន​ពី​មន្ត្រី​ការ​បរទេស​ជប៉ុន)។ ពាក់ព័ន្ធ​នឹង​ការទៅពេទ្យ​នេះ​ Nagoya TV បាន​បញ្ជាក់​ថា​គាត់​មាន​អាការៈ​ពិបាក​ដក​ដង្ហើម​»។

ពាក់ព័ន្ធ​នឹង​ករណីជំងឺ​COVID-19​នេះ ​ក្រសួង​សុខាភិបាល​កម្ពុជា​ក៏​នឹង​ធ្វើ​សន្និសីទ​កាសែត​នារសៀល​នេះ​ផង​ដែរ។

យោង​តាម​សារព័ត៌មាន​ Vietnam​ Express​ ចេញផ្សាយ​កាល​ពី​ម្សិលមិញ​ ជនជាតិជប៉ុនម្នាក់ដែលបានចេញពីកម្ពុជាតាមព្រលានយន្តហោះខេត្តសៀមរាប ត្រូវបានពិនិត្យឃើញមានផ្ទុកមេរោគកូរ៉ូណាថ្មី ឬខូវីដ១៩ ពេលទៅដល់ប្រទេសកំណើត៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ