អ្នកនាំពាក្យក្រសួងសុខាភិបាល ឱ្យដឹងថា ក្រសួងនឹងតាមរកអ្នកដែលធ្លាប់បានប្រាស្រ័យទាក់ទងជាមួយជនជាតិជប៉ុនម្នាក់ ដែលត្រូវបានរកឃើញថា មានផ្ទុកមេរោគកូវីដ១៩ (COVID-19)។
ការបញ្ជាក់របស់អ្នកនាំពាក្យក្រសួងសុខាភិបាលកម្ពុជាធ្វើឡើង ក្រោយពីសារព័ត៌មានវៀតណាមមួយបានចុះផ្សាយកាលពីម្សិលមិញថា ជនជាតិជប៉ុនម្នាក់បានធ្វើដំណើរតាមក្រុមហ៊ុនអាកាសចរវៀតណាម ចេញពីព្រលានយន្តហោះសៀមរាប ត្រូវបានពិនិត្យឃើញថា មានផ្ទុកមេរោគកូវីដ១៩ (COVID-19) ពេលទៅដល់ព្រលានយន្តហោះ Nagoya របស់ប្រទេសជប៉ុន។
អ្នកនាំពាក្យក្រសួងសុខាភិបាល លោក លី សុវណ្ណ បានលើកឡើងថា ទោះបីជាការឆ្លងរបស់បុរសជនជាតិជប៉ុនរូបនោះមិនមែនកើតចេញពីប្រទេសកម្ពុជាក៏ដោយ ក៏គាត់មានអាចមានការប៉ះពាល់ជាមួយអ្នកដទៃក្នុងកំឡុងពេលស្នាក់នៅកម្ពុជាពីថ្ងៃទី២៨ ខែកុម្ភៈ ដល់ថ្ងៃទី៣ ខែមីនា។
លោក លី សុវណ្ណ បានបន្តថា៖ «ដូច្នេះ យើងនឹងតាមរុករកអ្នកដែលប៉ះពាល់ទាំងអស់ ដែលគាត់បានប្រាស្រ័យជាមួយ បាទ! ប៉ុន្តែ រហូតដល់ពេលនេះ យើងអត់ទាន់រកឃើញអ្នកដែលមានវិជ្ជមាន ដែលប៉ះពាល់គាត់នៅឡើយទេ ប៉ុន្តែ យើងត្រូវតាមដាន១៤ថ្ងៃបន្តទៀតបាទ»។
ក្នុងលិខិតជូនរដ្ឋមន្ត្រីក្រសួងការបរទេសចុះថ្ងៃទី៥ ខែមីនា ឯកអគ្គរាជទូតកម្ពុជាប្រចាំប្រទេសជប៉ុន លោក អ៊ឹង រចនា បានបញ្ជាក់ថា បុរសជនជាតិជប៉ុនអាយុជាង៤០ឆ្នាំរូបនោះ បានធ្វើដំណើរចេញចូលកម្ពុជាចំនួន២លើក គឺលើកទីមួយនៅថ្ងៃទី១៦ ខែកុម្ភៈ ហើយបានចាកចេញទៅភីលីពីនថ្ងៃទី២១ និងលើកទីពីរ នៅថ្ងៃទី២៨ ខែកុម្ភៈ ហើយបានចាកចេញទៅជប៉ុនកាត់តាមវៀតណាមនៅថ្ងៃទី៣ ខែមីនា៕
