លោកនាយករដ្ឋមន្ត្រី ហ៊ុន សែន ចោទអ្នកវិភាគបញ្ហាសង្គមមួយរូបថា ជាអាយ៉ងបរទេស ទាក់ទងនឹងការវិភាគជុំវិញសហភាពអឺរ៉ុបផ្តាច់ប្រព័ន្ធអនុគ្រោះពន្ធ EBA ដែលធ្វើឱ្យកម្ពុជាប៉ះពាល់សេដ្ឋកិច្ចកម្ពុជា។
លោក ហ៊ុន សែន បានថ្លែងសារពិសេសមួយជូនជនជាតិខ្មែរទាំងអស់ ពាក់ព័ន្ធស្ថានភាពថ្មីៗចុងក្រោយ ដែលធ្វើឡើងនៅវិមានសន្តិភាព នាព្រឹកថ្ងៃនេះ ដោយថា រដ្ឋាភិបាលកម្ពុជាមិនយកអធិបតេយ្យកម្ពុជាដោះដូរជាមួយបរទេសជុំវិញការស្នើសុំឱ្យរក្សាប្រព័ន្ធអនុគ្រោះពន្ធ EBA ដូចការវិភាគរបស់លោក មាស នី នោះទេ ដោយលោកចោទលោក មាស នី ថាជា«អាយ៉ងបរទេស»។
លោកថ្លែងបែបនេះថា៖ «ខ្ញុំផ្តាំទៅ មាស នី គឺ មាស នី ឯងកុំជ្រុលហួស ការវិភាគរបស់ មាស នី ឯងមិនមែនជាខ្មែរទេ គួរតែជាជនជាតិបរទេសវាត្រឹមត្រូវជាង ខ្ញុំហ៊ានវាយតម្លៃ អ្នកឯងគឺជាអាយ៉ងបរទេសពិតប្រាកដ មិនមែនជាខ្មែរទេ»។
លោក មាស នី មានប្រសាសន៍ថា លោកគ្រាន់តែជាអ្នកវិភាគបញ្ហាសង្គម បែបជាទស្សនៈយល់ឃើញផ្ទាល់ខ្លួនតែប៉ុណ្ណោះ ដោយថា មិនមានបំណងអាក្រក់លើមេដឹកនាំណានោះទេ។
ចំណែកទាក់ទងនឹងប្រសាសន៍លោកនាយករដ្ឋមន្ត្រី ហ៊ុន សែន ដែលចោទលោកថា ជាអាយ៉ងបរទេស មិនត្រឹមត្រូវទេ ពីព្រោះលោកមិនបានធ្វើការងារជាមួយបរទេស និងយកប្រាក់ខែពីបរទេសនោះទេ។
លោកមានប្រសាសន៍ថា៖ «កាលណាអាយ៉ង ទាល់តែខ្ញុំបម្រើបរទេស ដើម្បីផលប្រយោជន៍អ្វីមួយ ផ្តួលរំលំរដ្ឋាភិបាលផ្សេងៗ បានជាអាយ៉ង ប៉ុន្តែ បើខ្ញុំគ្រាន់តែជាអ្នកវិភាគ ហើយខ្ញុំមិនមានឥទ្ធិពល ហើយខ្ញុំក៏មិនមែនជាបុគ្គលិករបស់សហគមន៍អឺរ៉ុបដែរ»។
បើគ្មានអ្វីប្រែប្រួលទេ ៦ខែទៀត ផលិតផលនាំចេញរបស់កម្ពុជាប្រមាណជាជាង ៤០មុខ មានសម្លៀកបំពាក់កាត់ដេរ សម្ភារធ្វើដំណើរ វ៉ាលី កាបូបស្ពាយ ស្បែកជើង និងស្ករសផងនោះ ត្រូវបង់ពន្ធឡើងវិញក្នុងចំណែក ២០ភាគរយនោះ។
របាយការណ៍របស់សហភាពអឺរ៉ុប បង្ហាញថា ការនាំចេញទំនិញកម្ពុជាទៅអឺរ៉ុបក្នុងឆ្នាំ២០១៨ មានទំហំប្រមាណ ៥,៨៨ពាន់លានដុល្លារ ដែលក្នុងនោះធ្វើឡើងក្រោមប្រព័ន្ធអនុគ្រោះពន្ធមានរហូតដល់ជិត ៩៦ភាគរយ ឬក្នុងទំហំទឹកប្រាក់ ៥,៦៦ពាន់លានដុល្លារ។
របាយការណ៍របស់សហភាពអឺរ៉ុបដដែលឱ្យដឹងថា ទំនិញដែលកម្ពុជានាំចេញទៅទីផ្សារអឺរ៉ុបរួមមាន សម្លៀកបំពាក់ ៧៤,២ភាគរយ ស្បែកជើង ១២,៦ភាគរយ កង់ ៥,៧ភាគរយ និងអង្ករ ៣ភាគរយ៕